عادي عادي لا تنصدموا !! الموضوع يمكن عنوانه غريب ،، بس أكيد مضمونه أغرب لــــول ،، أكيد في كثير شغلات يعني بتخطر على بالكم لما تقرؤوا هيك عنوان !! بس شو رأيكم بخطر على بالي أنا ؟؟

القصة و ما فيه يا جماعة الخير إن كنا قاعدين بالمكتب ،، و بتعرفوا نحن الحمدلله بنكون فاتحين أكثر من جبهة في الدوام ،، عنا جبهة الشغل ،، و جبهة الإيميلات ،، و جبهة الإجتماعات ،، و جبهات أخرى – لا تمت للواقع بصلة – مثل : جبهة الأكل ،، جبهة اللعب ،، جبهة طق الحنك ،، جبهة الحش كمان ،،

الموضوع هذا متعلق بإحدى النقاشات إللي كانت أثناء نقاشاتنا بجبهة طق الحنك لــــــول !!

كنا قاعدين في المكتب ،، و بما إن يعني المكتب صاير عنا ” حوامل جاردن سيتي ” بمناسبة إن عنا 3 من زميلاتنا و إخواتنا حوامل و كل وحدة فيهم ناطرة تخلّف !!

المهم كل واحد منا بلّش يلقي كلمة ،، و يلقي ،، و يلقي ،، إللي يقولك مبروكين يالحوامل ،، و الثانية بتقول أصلاً ما حدا منكم بقدر يحس بوجع المرأة الحامل ،، و وحدة من الحوامل عنا من كثر ما هي صارت منفوخة >> صرت أحس إنها راح تنفجر !! يعني أنا سمعت عن ولادة طبيعية ،، ولادة قيصرية ،، و قريباً في الأسواق :: ولادة إنتحارية !! هههههههههههه حلوة حلوة لا تحكوا لــــــول :)

لا و أحلى شي بنقول لواحد من الشباب :: يلا عقبالك !! لا عقبالك إنت !! لا إنت !!

و إجانا واحد من الشباب بقول // أنا خلص بدي أحوّل !! نعم ؟؟ بدي أحوّل و أصير أنثى لـــول

طبعاً نحن ما تركناها لهاي الجملة تمر مرور الكرام !! كنا لئيمين معاها :) :)

كيفك بدك تحوّل ؟؟ عملية ..

ما إنت متجوّز ياخي ؟؟ عادي مرتي بتحول لزلمة ،، أصلاً هي من زمان بدها تحوّل !!

لا ياخي بتمزح ؟؟ ليش عادي شو فيها ؟؟ حرية !!

ييييييي و بصير بدك تلبس حجاب !!

لا ،، بكون بعدني : سنة أولى بنت !! يعني بدي ليصير عمري 12 سنة و ساعتها بلبس الحجاب

هون عاد نحن يعني فرطنا ضحك ع الآخر و انتهى النقاش هههههههههههههه لأن بصراحة كان رد ” أفحمنا ” كلنا و ما عاد فينا نرد على شي يعني !!

المهم ،، هلأ نفوت في الموضوع ،، أنا حاب أسمع منكم هاي المرة !! 

إنت مبسوط إنك ولد ؟؟ ولا زلمة ؟؟ ولا بنت ؟؟ ولا مرة ؟؟ ولا إنت/إنتي لا هيك ولا هيك ؟؟

و ليش ؟؟

=================

“” برا و بعيد “”

من فيلم ” Bel Ami “

التعليق: والله بصراحة حياة الزواج حلوة كثير ،، طالع حمّال و نازل زبّال !!

=================

و مبروكين فاز مانشستر سيتي :)

و السلام عليكم و رحمة الله و بركاته

أحاول منذ بدأت كتابة شعري ،، قياس المسافة بيني و بين جدودي العرب ،، رأيت جيوشاً و لا من جيوش ،، رأيت فتوحاً ولا من فتوح ،، و تابعت كل الحروب على شاشة التفزة ،، فقتلى على شاشة التلفزة ،، و جرحى على شاشة التلفزة ،، و نصر من الله يأتي إلينا على شاشة التلفزة !!

على فكرة ،، مش أنا إللي بحاول منذ كتابة شعري ،، هذا الشعر من كلمات نزار قباني :)

شوفوا // إللي أوله شرط ،، آخره سلامة !! اتفقنا !!

لاني ضد الغناء ..

و لاني ضد المواهب ..

و لاني بفتي بالحلال و الحرام ..

و نعم أنا عنصري ،، بس بهذا الموضوع حطيت العنصرية على جنب !!

و لاني فاضي أصلاً أكتب هالموضوع لأن عندي عشرين شغلة بدي أخلصها !!

و لاني جاي أسوق فيها الـ Role Model

لأني الحمدلله عندي مواهب مطلعها و موجودة ع اليوتيوب !! و في منها أشياء مش مواهب بالمرة !!

طيب

هلأ تنفوت في الموضوع :)

كإنهم مستقصديني الجماعة في قناة الـMBC و حابيني كثير هاي الأيام !!

يعني ثلاث مرات يصادف يوم الجمعة أكون في البيت و أحضر برنامج المفروض إسمه

” Arabs Got Talent “

ياخي مواهب ،، مواهب ،، مواهب ،،

أوعدك إن شاء الله إذا قدرت في يوم من الأيام أنا راح أتكفل بمصاريف علاجك من التخلف إللي إنت فيه !! ياخي و مش بس هيك ،، راح أعملك برنامج إسمه :: عاهاتك يا وطن !!

ياخي روح احضر حفلات الليدي جاجا !! عادي والله ما راح أزعل !! ولا راح أسأل عنك ولا عن إللي خلفك !! بس من شان الله

ياخي بسببك خليتني أكتب موضوع ما إله لزمة أصلاً !!

أصلاً أنا عارف إني راح حدا يرد علي و يقولي // إذا مش عاجبك ،، ليش تشوفه ؟؟

ياخي أنا مو ذنبي أشوفك !! يعني يرحم ستك بس طير من وجهي !!

بعدين نفسي أفهم ،، يعني هي المواهب صارت بس يا غناء يا رقص !! يعني استحوا على حالكم شوي !! قلنا مواهب ،، مو موهبتين بس !!

Or Click Here: http://www.youtube.com/watch?v=zrZ0litP31w

آه صحيح تذكرت

شو بخصوص حركة الجوليه و إنت داخل ع المسرح ؟؟ قوي والله !! فكرتك فايت تضرب الشباب و تروح !!

ياخي رجاء خاص ،، و طلب خاص ،، إلك ،، و لكل العاهات إللي شفتهم ،، إرحمونا من شان إللي خلفكم !!

عادي ،، والله أنا كمان حاب أشوف مواهب !! و ماله يعني ،، في مواهب حلوة بصراحة !! بس دخيلكم زهقتونا غناء و رقص !!

=================

“” برا و بعيد “”

من فيلم ” Margin Call “

التعليق: خذ راحتك ،، المهم تخلّصني من هالعاهات إللي عم تطلع ،، حتى لو اضطريت تقتلهم !!

=================

الحمدلله الموضوع ما أخذ معاي كثير وقت !!

آه صحيح ،، عم بحضّرلكم فيلم عن الوساخة !! مش المصاخة :)

إبقوا إلحقوني ع تويتر لو سمحتوا ،، صايرة موضة :) :)

https://twitter.com/Jordanian_AD

:) و السلام عليكم و رحمة الله و بركاته :)

بما إن من زمان ما كتبنا في المدونة شي عن أحداث بتصير حوالينا أو بنشارك فيها ،، قلنا هاي المرة نحكيلكم عن حدث : TEDxAlAin ،، و هو عبارة عن تجمع لشباب المجتمع و كل واحد بشارك بأفكار ،، تجارب ،، دارسة ،، اختراع ،، الحدث شعاره
.. Discover Your Community Ideas ..

طبعاً لازم نحكيلكم شوي عن الموضوع :

TED = Technology, Entertainment, Design

و هي منظمة يعني او فيكم تسموها ” تجمّع ” للناس ،، بعملوا أحداث في كل مكان في العالم و كل واحد بقدر ينظم هذا الحدث – إذا استوفى الشروط طبعاً – و العرض الرئيسي من الموضوع كله هو ” مشاركة الأفكار ” ،، كثير حلوة فكرة التجمع ،، و الحلو إن ناشرينها في العالم كله ..

طبعاً أنا من الحماس – الزايد شوي – رحت قلت بدي أنام عند وائل في العين قبلها بيوم ،، ضلينا صاحيين للساعة 3:30 الصبح ،، و بدأت مرحلة الصراع ،، أنام !! ولا أظل صاحي !! و أكيد الشيطان شاطر ،، قلت أظل صاحي ،، الساعة صارت 5:45 ،، صليت الفجر الحمدلله ،، و انطلقت !! آه آه انطلقت !! انطلقت بكير كثير !! بس قلت إذا كمّلت القعدة في البيت راح أنا و مش راح أروح ،، طلعت أخذت جولة في العين ،، و رحت ع مكان الحدث ،،

طبعاً كنت أول واحد واصل هناك ،، وصلت لقيت الشباب شي نايم ،، و شي عم بشتغل !! و شي رايح يبدل ملابسه و يرجع !! أزمة الحمدلله ،،

كان عدد المتحدثين 14 متحدث ،، و هاي ليستة أسماءهم :)

و طبعاً بما إني كنت أول الواصلين الحمدلله ،، كان إلي معاملة خاصة !! خلوني أشارك معاهم بالترتيب و التنظيم و الاستعدادات و التشطبيات !!

هاي مجسمات من عمل المشاركين ،، بإشراف المتحدث: Kiel Johnosn

و هي عبارة عن مجسمات كثير منها لمباني موجودة في أبوظبي و دبي و العين :)

Mark Your Journey

هاي استمتعت و أنا عم بسويها ،، سويناها 3 مرات ،، و كل مرة ننسى حرف !! آخر شي سوينا هاي ،، و نسيت حرف آخر شي ،، كتبته بخط صغير بينهم ،، شفتوه ؟؟

هذا إللي بسمّوه ” فن تجريدي ” لووووووول

و هذا ” فن الجداريات ” << على حد علمي يعني :

بالنسبة للمتحدثين ،، كثير كانوا روعة بصراحة ،، يعني يمكن شخصين بس إللي ما استمتعنا بالحكي تبعهم ،، بس الدكتور جمال الكعبي كان روعة كثير ،، تكلم عن تجربته لما سافر للعراق في المستشفى الميداني ،، و أبهرنا لما تكلم عن أهمية التقنية و إن الشخص لازم يكون معاه ” جهاز ” مفيد ،، الدكتور جمال اتصل من الجهاز الخاص إللي معاه على غرفة العمليات الخاصة للصحة ،، سألهم سؤال بسيط ،، و بأقل من دقيقة كان واصله الجواب !! سألهم :: كم سرير فاضي في المستشفيات في أبوظبي ،، و بسرعة وصله الرد مع التفصيل عن عدد الأسرّة في كل مستشفى ،، كان شي رائع بصراحة :)

الأستاذ جلال لقمان كمان كان حديثه كثير حلو عن تجربته لما راح يكمل دراسه في أمريكا و أهمية الاصرار على النجاح ،،

سلطان الدرمكي كثير حلو ،، ساجيت كمان كانت كثير قصته حلوة ،، و أكيد أصغر مخترع – 9 سنوات – أديب البلوشي كان ممتع بصراحة !!

و أحلى شي لما قعدت الجولة الثانية على ” كرسي تويتر ” ،، المطلوب إنك ” تغرّد ” و تستخدم الهاشتاج الخاص بالحدث : #TEDxAlAin

و كانت القعدة عليه ممتعة !! و الحمدلله الشباب ما قصروا بالمتابعة و ” إعادة-التغريد ” ،، شكراً كثير لإلكم :)

(( ما قهرني غير إن ما حدا قدر ياخذلي صورة واضحة لإلي و أنا ع الكرسي :( :( ))

من الأشياء كمان إللي كانت حلوة ،، حديث ” موزة ” أحد المنظمين عن الحدث و المجهودات إللي قاموا فيهم و التعاون

كانت كل شوي تراجع الورقة إللي معاها ،، و مرتبكة ع الآخر ،، و كل شوي تعيد ،، و تطلع من موضوع و تدخل بموضوع ،، بس كانت كثييييييييييير حلوة طريقة الإلقاء بصراحة و الكل انبسط عليها :)

الصورة لموزة ،، و في الفريم ” سَجَّاد ” مسؤول المنظمين ،، ما قصّر بصراحة :)

و ختامها مسك

التنظيم كثير كان مرتب ،، ما قصروا الإخوان و الإخوات ،، كل شي كان حلو ،، التعاون بين المنظمين نفسهم و بين المنظمين و الحضور كثير كان حلو ،، الأشخاص المتحدثين كمان كثير أمتعونا ،، شكراً إلكم كلكم ،، و إن شاء الله بنشوفكم عن قريب :) :)

=================

“” برا و بعيد “”

من فيلم ” Tactical Force “

التعليق: إذا عندك شي عنّي ،، لا تحكيلي إياه ،، لأن الكلام معي عقيم و ما راح توصل لنتيجة !!

=================

يسلمو كثير :)

My Twitter: @Jordanian_AD

=================

و السلام عليكم و رحمة الله و بركاته

يعني مؤلف هاي الرواية ما لاقى عنوان غيرها ؟؟ الكوليرا !! يعني لو كان حكى الحب في زمن الزكام ولا الحب في زمن الجدري كنا قلنا ماشي ،، في إلهم دواء ،، بس في زمن الكوليرا يعني حسيتها عوجة !! ولا كان عم بكتب فيها و هو بوسط أفريقيا !!

بدي أحكيلكم عن شخص عاش قصة حب ،، و في زمن الكوليرا كمان ..

كان قاعد في غرفة تشات ” خاصة للعرب ” في إحدى المواقع الأجنبية ،، كان دايماً دايماً موجود فيها ،، يخلص مدرسته ،، يروح ع الإنترنت عالتشات ،، يتغدى ،، يرجع ع التشات ،، يدرس ،، يرجع ع التشات ،، ينام ،، يصحى ع التشات عشان يسلم ع الناس قبل ما يروح ع المدرسة !!

لدرجة إن أصحابه بسموه مستر تشات !!

لدرجة إن صاحب التشات زهق منه !!

لدرجة إن كل الناس إللي هناك مفكرين إنه شريك في الموقع !!

لدرجة إن الكمبيوتر قاله من شان الله ارحمني !!

لدرجة إن سماعات الكمبيوتر صاروا يطلعوا صوت لحالهم و يحكوا :: من شان الله إللي خلّفك حل عني شوي !!

لوووووووووووووووووووووول

مرت الأيام ،، و الأسابيع ،، و الشهور ،، و حتى السنين !!

و بدأ صاحبنا ينعجب بوحدة في التشات !! قال معجب بأسلوبها !!

عشان تطوّر الأمور شوي ،، طلب منها يحكوا مع بعض على الـ MSN Messenger ،، قال عشان يكون في ” خصوصية ” في الحكي ..

البنت هبلة ،، وافقت !!

بلشوا يحكوا و يحكوا ،، و الزلمة نفس ما كان قارف العالم بالتشات ،، صار قارف العالم بالمسنجر !!

كالعادة ،، مدرسة مسنجر غداء مسنجر عشاء مسنجر نوم مسنجر !!

بس هاي المرة الحمدلله إن السماعات ما إشتكوا !! و أصحابه ما زهقوا منه !!

بس اللهم إن الكاميرا قرفت شكله ،، و المايكروفون قاله :: ريحة بوزك يا شيخ قرفتني !!

و حتى بيل جيتس بعثله إيميل و قاله // ياخي والله سوينا المسنجر عشان تحكي مع العالم كله ،، مو عشان تحكي مع وحدة 24 ساعة !! قرّفتنا المسنجر منك لإلها !!

زهق الزلمة من المسنجر ،، بس المشكلة إن صاحبته زعلت منه ،، لأن حط صورة وحدة حلوة ع المسنجر !! طلعت صورة وحدة ممثلة و المحروسة مش عارفة !! مفكريتها حبيبته الثانية !!

هبلة !! مفكريته ما بحبها ،، و هو ما عنده سيره غيرها ،،

هذا الموقف ،، غيّر كثير بالعلاقة بينهم ،، صارت تشك في إن في وحدة ثانية ،، و يمكن ثالثة و رابعة كمان في الليستة تبعت صاحبها !!

شو الحل كان ؟؟

كان بسيط // طلبت من المحروس تعطيه الباسوورد تبع المسنجر !! و هو مسكين ،، أعطاها !!

فاتت على حسابه ،، و شافت إللي ما كانت حابة تشوفه ،، شافت إن ما عنده غيرها ع الليستة !!

كانت مفكرة راح تعرف ” تكيد ” للمحروس و تبلش تمارس فيه ” كيد ” النساء !!

مرت الايام ،، و الأسابيع ،، و الشهور ،، و السنين كمان ،،

و المحروس و المحروسة صاروا يحبوا بعض !!

حبيبي مو قادرة أتخيل حياتي من دونك ،،

حبيبتي لا تحكي هيك أنا جنبك ،،

حبيبي خليك دايماً جنبي ولا تخليني ،،

حبيبتي هيني لازق فيكي حتى الموت !!

و كلهم بحبوا بعض ،، و بكذبوا على بعض طبعاً !!

تطورت العلاقة ،، و تطورت الأمور ،، و تطورت التكنولوجيا ،،

نقلوا الجماعة قصة الحب إللي بينهم ع الفيسبوك !!

و أكيد الفيسبوك صار ما عنده شغلة غير قصة حب محروس لحبيبته محروسة !!

و عملوا صفحة سمّوها // علاقتنا للأبد ،، محروس و محروسة //

و بلشوا يكتبوا كل يوم عن قصة حبهم

أنا بحب محروس ،، و محروس بحبني ..

محروسة حبيبتي ،، مش قادر أتخيل كيف ممكن يكون طعم الفيسبوك من دونك ..

محروس ،، لو بوقف الفيسبوك كله ضدي ،، ما راح أخليك تبعد عني ..

محروسة حبيبتي ،، لو بنات الفيسبوك كلهم بدهم إياني ،، ما راح أختار غيرك !!

أوووووووووووووووووووووووبس

كإن محروس كتب شغلة غلط !! محروسة بس سمعت سيرة بنات الفيسبوك ،، لعب الشيطان فيها ،،

قامت شو صارت تكتب ::

عزيزي الفيسبوك ،، إذا بعرف إن في بنت بتحكي مع محروس ،، أنا راح أهكّر عليك !! و أخرّبلك الموقع كله !! إنت ما بتعرف مين معارفي ،، ما في داعي أحكيلك ،، بس من رئيس الجمهورية و إنـــــزال ،، قصدي من ملك الهاكرز و إنـــــــزال !!

و كتبت مرة ،، يا بنات يا حيوانات والله لو بعرف إن وحدة منكم بتحكي مع حبيبي محروس راح آجي ألخبط مكياج وجهها !!

الحب عم بزيد ،، و الغيرة عم بتزيد ،، و الظروف عم توقف ضدهم ،، و همّ عم بحاولوا إن ما يخلي شي يأثر على علاقتهم :)

تعبوا كثير من المهاترات ،، و الشكوك بلشت تزيد ،، و تزيد ،، و تكتر ،، حتى صاروا يحطوا عليها سماد !!

عشان هيك قررت المحروسة تسكر هذا الباب كله !! و فعلاً ،، سكروا الفيسبوك ،، و نقلوا الحكي على البلاكبيري مسنجر ،، هيك أحسن ،، بتعرف وين هو ،، و شو عم بتعمل ،، و مين عنده ،، و شو ببعث ،، و شو بكتب ،، و كل شي الحمد لله ،، عشان ما تفوتها لقطة !!

محروس صار عليه كثير ضغوطات ،، لدرجة إن صار يحس حاله عم بصوّر جزء جديد من مسلسل جميل و هناء !!

بس شو بدّو يعمل ؟؟ بحبها !! و مثل ما قال الشاعر :

.. و عين الرضا عن كل عيب كليلة ،، كما أن عين السخط تبدي المساوئَ ..

محروسة كان فيها كثير عيوب ،، بس محروس كان بحبها ،، يعني كمان هو بعرف محروسة من 7 سنين تقريباً ،، فالموضوع مش سهل بصراحة !! و كان عنده نظرة إن محروسة صبرت علي ،، فأنا كمان لازم أصبر عليها ،، هاي العلاقة ما دامها صارت صامدة من 7 سنين ،، أكيد قادرين نخليها صامدة 70 سنة كمان !!

بس مو هون المشكلة ،، المشكلة إن محروسة كانت تتعمد إنها تلغي شخصية محروس بكثير شغلات !! هي بتهتم فيه دايماً و بتسأل عنه ،، بس كثير شغلات كان تحسس محروس إن هي إللي بتفهم و هو حمار ما بفهم !!

و محروس يضل ساكت !! من باب إن // الباب إللي بجيك منه الريح ،، سده و استريح !! فما كان بدو يفوت بهاي النقاشات عشان ما يخسر محروسة !!

مرت الأيام ،،و الناس بتحتفل بالعام الجديد و مرور سنة ،، و همّ بحتفلوا بعيد ميلاد التشات ،، قصدي عيد ميلاد حبهم :) :)

احتفلوا بـ 8 سنين ،، نعم ،، كانت 8 سنين !! و في هاي الذكرى ،، صارت المفاجأة الكبرى إللي غيّرت كل الأحداث المتوقعة ،، محروس تمادى ،، و تواقح ،، و تجاوز كل الأعراف ،، و التقاليد ،، و العادات ،، و حتى السلوكيات البشرية ،، و حتى أول مبادئ التواصل !!

لا يا محروس ،، خيّبت ظن الكل فيك !!

عارفين محروس الطماع شو طلب ؟؟

طلب يشوف ،، طلب يشوف !! طلب يشوف محروسة !!

نعم !! فعلاً !! هذا إللي حصل !! 8 سنين بعرفوا بعض !! و ما شافوا بعض !! عادي !! شو المشكلة !! هذا هو الحب في زمن الكوليرا !! قصدي في زمن الإنترنت !!

محروسة نسيت كل الصفات الحسنة في محروس ،، و طلبت إنها تنهي العلاقة ،، محروس كان حيوان ،، قاللها بدي أشوفك يعني بدي أشوفك ،، قالتله لا يا واطي ،، أنا أهلي مربيني ،، و بثقوا فيني ،، و ما فيني أخون ثقتهم !!

طيب ما إنتي إلك 8 سنين بتحكي معاي ،، و بتعرفيني منيح ،، شو المشكلة ؟؟

لا ،، هاي شي و هاي شي !!

كيف هاي شي و هاي شي ؟؟

محروس حبيبي ع النت غير ع الطبيعة ،، أنا ما بقدر أشوفك ،،

مبلى بتقدري يا محروسة

محروس حاول تفهمني ،، قدّر ظرفي يا محروس !!

لا إنتي إللي بدك تقدري ظرفي هلأ و بدي أشوفك يعني بدي أشوفك !!

محروس أنا كثير ناس إجوا تقدموا يخطبوني و أنا تركتهم عشانك (( كذابة ))

حبيبتي بعرف هالشي بس كمان أنا حقي أشوفك !! يعني معقولة صارلنا 8 سنين بنحكي مع بعض و ما أشوفك !!

محروس يا حبيبي من شان الله افهمني ،، أنا بدي فترة أتعوّد عليك (( محتاجة ربع قرن من المعرفة )) و بعدها بقدر أحكم إذا نحن بنقدر نكمل مع بعض ولا لأ !!

حبيبتي نحن في عصر الكوليرا ،، قصدي الإنترنت ،، يعني المفروض كل شي بمشي بسرعة !!

– جزء من النص محذوف لأنه بس للناس إللي فوق الـ 18 سنة –

محروس ،، تراها واصلة معاي لمكياج وجهي ،، خلص يعني خلص !!

لا يا محروسة ،، بدي أشوفك يعني بدي أشوفك !!

طيب ماشي خلص أنا ما بدي إياك و بدي أقطع علاقتنا !!

نعم ؟؟ بعد هالعمر و إنتي جاية تحكي هالحكي !!

طيب ماشي أنا بفرجيك شو راح أعمل ..

بتهدديني يا محروسة ؟؟

تخرس لحالك و لا أعملك بلوك ؟؟

كمان !! أنا بتعمليلي بلوك !!

..

..

..

محروسة عملت بلوك و ديليت

نعم ،، فعلاً ،، حقاً ،، عن جد ،، آه والله ،، really ،،

هذا هو الحب في زمن الكوليرا ،، قصدي في زمن الإنترنت ،،

منذ أن صار الحب في زمان محروس و محروسة إلكترونيًّا ،، أصبحت جميع الحكايات تنتهي بـ ” بلوك و ديليت ” !!

و توتة توتة ،، مات محروس و محروسة !!

فعلاً إنكم ما عندكم سالفة ،، مش قصدي عن إللي بقرأ الموضوع ،، قصدي محروس و محروسة !!

بالله عليكم كم واحد منكم كان مكان محروس ،، أو كم وحدة منكم كانت مكان محروسة ؟؟

لوووووووووووووووووووووووووووووووووووووول

إن شاء الله قصة محروس و محروسة راح تلاقوها في المكتبات قريباً (( بس المكتبات الإلكترونية )) ،، و بتفاصيل أكثر كمان بتحكي عن كل شي صار بينهم خلال معرفتهم لبعض !!

:* :* فديتكم أنا على آخر هالليل :* :*

=================

“” برا و بعيد “”

من فيلم ” The Cold Light of Day “

التعليق: مش عارف وين راحت محروسة ،، شوفها يمكن عم بتحب بواحد ثاني !!

=================

:) و السلام عليكم و رحمة الله و بركاته :)

هاي ،، كيفكن ؟؟ يا رب يكون الموضوع ع زوءكن و يعجبكن ،، لا لا حسيتها بايخة !! نرجع نعيد : مرحبا ،، كيفكم ؟؟ مش عارف شو بدي أحكيلكم ع التغييرات الخطيرة إللي صارت بحياتي من شهرين لليومين ،، حياتي انقلبت 180 درجة !! كل شي فيها تغير الحمدلله ،، الحمد لله يا رب ،، تعالوا تعالوا أحكيلكم ..

يا الله ،، مش عارف شو بدي أحكيلكم ،، ممممممم ،، أبلش من دوامي ؟؟ ولا من حياتي الخاصة ؟؟ ولا من شغلي الخاص ؟؟ ولا من وين يا جماعة الخير ؟؟ عادي عادي إحكوا ما بزعل ،، شاركوني بدل ما إنتوا ساكتين هيك !! تاركيني أحكي و أحكي و أحكي و ما حدا معبرني !!

يا الله دوامي ،، دوامي مكان مثالي ،، كل يوم الصبح و أنا رايح عليه ،، بضلني بقول الحمد لله الحمد لله الحمد لله الحمد لله الحمد لله على هيك دوام ،، أحسن من غيري إللي ما بدوام ،، وين بدي ألاقي دوام يقدرني هيك ؟؟ الناس دايماً و هي بالطريق للشغل بتكون بدها تترك الشغل ولا تروح على شغل جديد ،، أنا العكس الحمدلله ،، دوامي هو إللي بدو إياني أروح ع دوام جديد لووووووووووووووول ،، بمزح بمزح معاكم ،، دوامي حابيني كثير الحمد لله ،، و خصوصاً بعد ما خلصت الماجستير و اقتنعوا إن في فايدة كثير منه في مجال شغلي ،، عشان هيك قررت الشركة إنها تزيدني 11409 دراهم ،، الحمد لله :) و بتقوليلي ليش ما بحب دوامي ؟؟ وين بدي ألاقي دوام هيك يحترمني ؟؟

و مديري ،، شو بدي أحكيلكم عن مديري ،، الزلمة أعطاني جائزة الموظف المثالي !! و حتى المسابقة إللي كانت داخل الشركة عن تقديم فكرة جديدة للشركة دعم إسمي فيها و أعطوني المركز الأول الحمدلله !! يعني كل شي تغير بالشغل الحمدلله ،، هلأ صرنا على رأي المثل // سمن على عسل :) :)

تحيلوا حتى مديري دخلني بمشروعين جداد من مشاريع قسم الـIT عشان الزلمة و أخيراً اقتنع بإمكانياتي الحمدلله ،، و مو بس هيك ،، الإثنين من المشاريع الكبيرة الحمدلله في القسم عنا ،، والله ما كنت عارف إن شهادة الماجستير إلها دور هالقدة كبير في التغيير بصراحة !! يعني لو بعرف هيك راح يصير معاي كنت درست ماجستير على طول ،، بدون بكالوريوس ،، طيب هلأ هيك بالماجستير ،، كيف بكرا لو بيخطر على بالي أكمل دكتوراه ؟؟ شو رأيكم بصير ؟؟

حتى فلوس آخر الشهر صرت أوفّر ،، بعد ما كنت أوصل لآخر الشهر و أبلش أستعمل الكريديت كارد ،، هلأ مش عارف وين أروح بالفلوس الحمدلله يا رب :)

خلص بكفي ،، راح تحسدوني ،، بعرفكم ما بتعرفوا تقولوا // ما شاء الله ،، ولا يحميك ربي يا أسامة :) :)

تعالوا تنلف شوي ع حياتي الخاصة طيب لو سمحتوا ،، إن إذا ما عندكم مانع ،، ولا إذا بتحبوا تعرفوا يعني ،، حياتي الخاصة كمان تغيّرت 180 درجة الحمد لله ،، سيارتي بدلتها ،، و السيارة الجديدة راح توصل الأربعاء الجاي إن شاء الله (سيارة ولا مجلة ماجد هاي!!) و إن شاء الله السيارة الجديدة يكون وجها خير علي :)

السكن بدلته الحمد لله و هلأ ساكن بمكان جديد مؤقتاً عبين ما أنتقل ع شقتي الخاصة على أول شهر خمسة إن شاء الله :) :)

شغلي الخاص كمان تحسن كثير الحمدلله ،، مع إني هلأ تحت ” ضغط كبير ” ،، بس إن شاء الله أكون قده و أتجاوز هاي المرحلة ،، خصوصاً إنه مشروع عمري يعني ،، و صارلي ثلاث سنين و أنا عم بكافح فيه !!

راح أصير ممثل عن قريب إن شاء الله !! هاي خطوة قبل رئاسة الوزراء :) و إن شاء الله في موضوع راح أكتبه لحاله عن موضوع المسلسل الجديد تبعي :)

طول عمرنا نسمع بمثل : بخلق من الشبه 40 ،، أنا ما تعبت حالي ،، ركزت على جملة ثانية كنت أسمعها // أسامة حبيبي ،، إنت 1000 بنت بتتمناك :)

الحمدلله هلأ لقيت 999 بنت ،، ضايلي وحدة بس و أوصل للـ ” متمنّية ” رقم 1000 ،، ساعتها بكون حققت الحلم إللي كل إللي حكيت معاهم حكولي إياه ،، مع إنهم مش كثار والله ،، بس إن أهم شي ضايل وحدة بس و أوصل لل1000 يـــــــــــــــــا رب :)

شو ضل تغيّر في حياتي ،، ممممممم ،، آه ،، قدرت أكمل يومين ورا بعض بدون ما أروح ع المجلس !! تخيلوا هاي الشغلة !!

والله كثير كثير الحمد لله تغيّرت في أشياء في حياتي ،،

صحيح في شغلة بعدني عم بحاول أغيرها و مش زابطة معي ،، ألا و هي ” الحش ” في الناس !! بس راح أضل أحاول و أسعى إني أغيرها إن شاء الله ،، إدعولنا إنتوا بس :)

و حتى كمان الشباب و المجموعة إللي حواليي عم تتغير كمان و الطلعات عم تتغير و الناس إللي بالطلعات إللي عم تتغير كمان ،، إن شاء الله للأفضل :)

=================

“” برا و بعيد “”

من فيلم ” Mirror Mirror “

التعليق: وقت الشدة فقط ،، تعرف من هم أحبابك و مَن هم حثالة اختيارك ..

=================

إييييييييييييييييييييييييييي

تذكرت أحكيلكم شغلة ،، شايفين الحكي كله هذا إللي فوق ؟؟ نسيت أحكيلكم إن هذا كذبة أبريل !!

:) و السلام عليكم و رحمة الله و بركاته :)

استمراراً لسلسة آخر التدوينات إللي كتبنا عنها في الفترة الماضية ،، سواءً عن النقاقون في الأرض ولا مراقبة الناس مروراً بمهارات اللطش و الفجع ،، و أخيراً وصولاً للحسد ،، اليوم بدي أحكيلكم عن ” ثقافة الشكر ” زي ما معالي حضرة سعادة سموّكم شايفين عنوان الموضوع !!

أكيد يعني الواحد منّا كم يوم بختلط بعشرات البشر ،، هذا إذا ما كان المئات منهم !! مواقف يومية بتمر معانا ،، بالبيت ،، بالشغل ،، بالسوق ،، بالشارع ،، بالسينما !! وين ما يكون ،، مش مهم ،، المهم إن في مواقف كثير بتمر ع البني آدم ،، حدا بخدمه ،، حدا بساعده ،، و لو حتى كان شي بسيط ،، بس كم واحد منكم بكلّف على حاله يقول “” شكراً “” ؟؟

يعني لهاي الدرجة هاي كلمة صعبة عليكم مرات !!

في آيات كثير ربنا ” حثنا ” فيها على الشكر ،، و مرات كثيرة انذكرت بصيغة ” الأمر ” ،، من بعض الآيات ::

” إِنَّ اللّهَ لَذُو فَضْلٍ عَلَى النَّاسِ وَلَـكِنَّ أَكْثَرَ النَّاسِ لاَ يَشْكُرُونَ ” (البقرة: 243)

يا رب يعني كم واحد منّا ربنا مفضّل عليه من النعم ،، التي ” لا تعد ولا تحصى ” ،، بس كم واحد بشكر ربه ؟؟ كم واحد منكم قرر إنه يصلّي ركعتين شكر لله ؟؟ و لو مرة وحدة بحياته ؟؟

” لِيُتِمَّ نِعمَتَهُ عَلَيكُم لَعَلَّكُم تَشكُرُونَ ” (المائدة:6)

فشّلتونا !! يعني فوق ما ربنا ” أتم ” علينا نعمته ،، كمان ما نشكره ؟؟ والله كبيرة هاي !!

لا تحزن إذا انجبرت على تعايش وضع قد يؤلمك ،، بل ابتسم ،، لأنه قال بكل رحمة :: ” وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ ” (البقرة:216) ،،

ربنا إله حكمة ،، أشكره عليها ،، و شوفها ،، راح تعرف قديه هو ” رؤوف رحيم “ :)

” وَجَعَلْنَا لَكُمْ فِيهَا مَعَايِشَ قَلِيلاً مَّا تَشْكُرُونَ ” (الأعراف:10)

هذا الموقف ” أكاد ” أن أعيشه بشكل شبه يومي ،، مع كثير ناس ،، بس في ” شخصية ما عندها شخصية ” كثير يعني حزّت بنفسي إنها لهاي الدرجة ،، فوق ما إنها برا ما تسوا ” درهم ” ،، ضربت الشركة الدرهم بعشرين ألف درهم ! و فوق هذا – والله على ما أقول شهيد – (( و إذا في حدا معانا بعرفها يا ريت يثبت كلامي أو ينفيه )) نفسي مرة أشوفها بتقول ” الحمدلله و الشكر ” أو حتى ” شكراً ” للناس إللي احترموها و عملوا منها قيمة !!

“ قَالَ هَذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَن شَكَرَ فَإِنَّمَا يَشْكُرُ لِنَفْسِهِ ” (النمل:40)

و من شكر فإنما يشكر لنفسه ،، أشكر عشان ربنا يزيدك من خيره ،، من نعمته ،، من رحمته ،، من فضله عليك يا بني آدم ..

إنّ الرحمن لا يبتليك بشيء ،، إلا و به خير ،، حتى و إن ظننت العكس ،، فأرح قلبك ،، و أشكره :)

” وَلَقَدْ آتَيْنَا لُقْمَانَ الْحِكْمَةَ أَنِ اشْكُرْ لِلَّهِ وَمَن يَشْكُرْ فَإِنَّمَا يَشْكُرُ لِنَفْسِهِ وَمَن كَفَرَ فَإِنَّ اللَّهَ غَنِيٌّ حَمِيدٌ ” (لقمان:12)

 من الحكمة ،، الشكر ،، الشكر يا عالم !! والله إنها ” لن تضركم ” ما دامها في طاعة ربنا ،، و ما دامها عبادة فأكيد عنده حساب عند ربنا ..

=======

من الأشياء إللي قرأتها مرة ،، و بعدها ضليت أقرأها ألف مرة ،، إني لاحظت تكرر تعبير ” أكثر الناس “ في القرآن الكريم ،، القرآن كلام الله ،، يعني كل كلمة موجودة في ” أفضل مكان ” لدرجة الإعجاز ،، بس حدا منكم شاف شو – في أغلب الحالات – بكون مكتوب بعد ” أكثر الناس ” ؟؟

أكثر الناس لا يعلمون ،،

أكثر الناس لا يؤمنون ،، 

أكثر الناس لا يشكرون ،،

أكثر الناس لا يعقلون ،،

ليش ما أسعى إني أكون من الفئة العالمة ،، المؤمنة ،، الشكورة ،، العاقلة ؟؟ أسعى ،، قلت أسعى ،، و إن شاء الله بنجتهد و بننجح ،،

<< برا الموضوع :: و بما أن أكثر الناس لا يعلمون ،، فكافي فلسفة من ” أكثر الناس ” ،، و ما عليكم من كلامهم :)

>> نرجع لموضوعنا :: ” انَّ الْإِنْسَانَ لِرَبِّهِ لَكَنُودٌ ” (العاديات:6) ،، بتعرفوا شو معنى هاي الآية ؟؟ بتعرفوا مين هو الكنود ؟؟

راح أقولكم مين ،، لأني عارف إن في ناس منكم ما راح تكلّف على حالها و تدوّر على معنى ” الكنود “ ،،

الكنود هو الإنسان إللي بكفر بالنعمة ،، إللي بعد المصايب ،، بما إنكم بتعدوا المصايب و شاطرين فيها ،، حدا خطر على باله يعد كم نعمة ربنا منعم عليه فيها ؟؟ ولا هاي صعبة كثير عليكم ؟؟

لما تكون طالع مع صاحبك ولا أصحابك >> أشكرهم على الوقت إللي قضوا معك ،، لأن يمكن يكون عندهم شغلة ثانية بدهم يعملوها ،، بس عشان قعدوا معك و أعطوك من وقتهم ..

أشكر صاحبك إللي وقّف معك لما كثير ناس تخلّت عنّك >> كان ممكن يكون زيهم ،، بس أشكره و أشكر ربك إن كان عند حسن ظنّك و ظل واقف معك ..

أكيد ما بحتاج بعد كل إللي فوق أرجع أذكركم بإن لازم تشكروا ربكم >> عشان يزيدكم على الأقل !!

أشكر الناس إللي بتبعثلك مسج يوم الجمعة >> أحسن مما ييجي يوم و ما تلاقي حدا يتذكرك بدعاء يوم الجمعة !!

أشكر كل الناس ،، المنيح و القبيح >> المنيح بنتعلّم منه ،، و القبيح كمان والله بنتعلّم منه !!

أشكر الناس إللي ” احترمتك ” في يوم من الأيام >> مع إنك يمكن ما كنت بتستاهل حدا يحترمك !! 

أشكر الناس إللي بعدها حواليك >> و أشكر الله إن ما صابها ” انفلونزا التغيير “

=================

مرات بكون سايق السيارة ،، بوصل لعند خطوط المشاة ،، بوقّف للناس عشان يمروا ،، نفسي يمر هندي مرة و يرفع إيده مرة وحدة بس و يقول شكراً !! ما بعرف ليش بحس إن هذا الشعب – برأيي – ما عنده ثقافة الشكر !! نفسي أفهم ليش ؟؟!!

بس كونوا أحسن منهم و أشكروهم لما يوقفولكم و إنتوا عم تقطعوا الشارع ،، هيك تربينا ،، و هيك ديننا علّمنا ،، و هيك نحن !!

يا جماعة الخير شوفوا الشعب اللبناني – ما شاء الله – عليه ،، بتلاقيه ” مزكّم – مرشّح – عم بعطس - sneezing ” و بقول الحمدلله ،، بترد عليه و بتقوله :: يرحمكم الله ،، برجع برد عليك و بقولك ” ميرسي ” << لوووووووووووووول !!

والله التنازل في بعض المواضيع لا يعتبر دليل ضعف ! و إنما دليل على وجود رغبة في الاستمرارية ،، حافظ عليها بالشكر ،، تنازل و أشكر الشخص !! أشكر الناس !! أشكر الله !!

=================

“” برا و بعيد “”

من فيلم ” Safe House “

التعليق: عادي إنـك تـخسر الحـاجة و تكسـب صـديق بس عيب تخـسـر صـديقك و تكسـب حاجـتـك !!

=================

يمكن ناس منكم راح تقول شو خطبة الجمعة إللي عم بسمّعنا إياها أسامة >>

” أشكروا الله إن عندكم أسامة ،، و أشبعوني قرباً ،، فغداً سأرحل دون وداع “

و السلام عليكم و رحمة الله و بركاته

قال إيـــــه ،، بيحسدوني عليه ،، بيفكروني إني ،، عشت في الجنة ،، بس جنة إيه ؟! حاسدين الفقير على موتة الجمعة ،، يحسدوا الأعمى على كبر عيونه ،، يـــــلا ،، أطرقه بعين و ارتاح ياخي !!

إحم إحم ،، سكـوت ،، ولا كلمة منّك لإله ،، يعني شكلكم عرفتوا عن شو الموضوع هاي المرة ،، و لو ،، بدها توضيح أكثر يعني !!

بما إن هلأ وقت أكل ،، فنحن راح ” نتناول ” الموضوع من أكثر من جهة إن شاء الله ،، أكيد أكيد لازم نبلّش بالماوقف إللي فيها حكي عن الناس !!

لووووووووووووووووووول

تعالوا أحكيلكم عن فلسطين ،، قصدي عن بعض مواقف الحسد إللي صارت معاي أو مع ناس بعرفها يعني يعني يعني :)

هاي المرة بدنا نبلّش نحكي الأحداث بالتسلسل الزمني

==================

“” يــــــــاه ،، دي قصر “”

هاي القصة تعود أحداثها لل1990 أو 1992 ،، مش متذكر بصراحة ،، لأني بتذكر جزء منها و في جزء بعدين لما أبوي كان بحكي القصة لقطتها منه :)

الدنيا صيف ،، مسافرين على الأردن بالسيارة ،، أبوي بنزّل الأغراض و بحطهم بالسيارة ،، و فديته أبوي من النوع إللي ما بحب يحط ولا شي ع السيارة من فوق !! مثل الزلمات إللي بتلاقي باني بناية فوق السيارة !! و كإنه مهاجر على كوكب ثاني !! يعني أبوي يا ما بحط ولا شي فوق السيارة ،، يا شنطة وحدة بس !! كان عم برتب الأغراض بالسيّارة ،، و كل إللي صار إن بس مر واحد مصري و قال “ يــــــــاه ،، دي قصر ” !! و عينك ما تشوف إللي النور !!

توكلنا على الله و طلعنا بالسيارة ،، كان في ” منخل – غربال ” مرمي ع الأرض من فترة ،، و دايماً يعني عادي الناس بتمشي عليه و ما في شي مش طبيعي !! إلا هذاك اليوم ،، بس أبوي مشى قام المنخل طلع بوجهه !!!!!!!!

قلنا عادي ،، موقف و بصير ،، و ينفجر العجل الأول ،، عادي بتصير مو مشكلة ،، و ينفجر العجل الثاني ،، و يوقّفلنا واحد كويتي أعتقد و يعطينا العجل الاحتياط من عنده ،، و ينحرق دينامو السيارة !! و ينفجر العجل الثالث !!!!!!!!!!!! لا و الوالد قبل السفر مبدلهم كلهم الحمد لله يعني عشان السفر !!!!

كانت رحلة من أطول الرحلات !! مش عارف يعني إبن المصرية ما عرف يقول ” ما شاء الله ” على طول قال :: ”" يــــــــاه ،، دي قصر “”

==================

” إيه الساعة الجميلة دي ؟؟ “

موقف ثاني ،، مع مصري ثاني ،، بمطعم سكن جامعة الإمارات ،، لما كنت بدرس البكالوريوس ،، قاعدين في المطعم ،، فأنا عم باكل بإيدي اليمين الحمد لله و حاط إيدي اليسار على خدّي ،، إلا شب إسمه ” أحمد السداسي ” بقولي :: ” إيه الساعة الجميلة دي يا أسامة ؟؟ ” ،، طبعاً الساعة كانت فعلاً مميزة ،، أبوي فديته جايبلي إياها من ألمانيا و بتيجي designer watch ،، يعني كانت شي مرتب كثير والله ،، طبعاً أنا بس قالي هيك ،، إجيت بدي أورجيه المميزات إللي فيها ،، و أكبس ع الزر عشان أورجيه شو المميزات إللي فيها ،، و ما يشتغل !! الزر الثاني ،، كمان ما يشتغل !! الزر الثالث ،، ردت علي الساعة بتحكيلي :: من شان إللي خلّفك إرحمني ،، من شان الله صاحبك طرقني بعين و ما عاد أشتغل !!

و سافر أبوي على ألمانيا بعدها بفترة و أعطيته الساعة على أمل إنها تزبط ،، بس ما زبطت ،، و ولا محل بأبوظبي قدر يفهم التكنولوجيا إللي فيها !!

==================

” هالسيارة كايفة “

موقف ع السريع (من أرض الوطن) ،، نزلنا مرة ع الأردن و استأجرنا سيارة ،، فكان حدا من عمومتي بدو بس يعبيها مي بتذكر ،، فالغطاء تبع السيارة من قدام مو ثابت ،، فرحت مسكت الغطاء عشان ما ينزل ،، مر حدا من العائلة الكريمة ،، شو قال ؟؟ قال: والله هالسيارة كايفة (يعني منيحة) ،، ما كمّل ،، ثواني ،، إنكسر الزجاج الأمامي للسيارة !!!

==================

” ضمان بتدفعلك منيح “

خذوا هاي ،، من أبناء لبنان الكرام !!

مرة كنت نازل من الدوام عندي شغلة برا ،، فصادفت إن مديري الكبير نازل معاي بالأصنصير ،، إلا بقولي لوين رايح ؟؟ قلتله رايح عندي شغلة بدي أخلصها برا بالبريك ،، قالي :: ليك توصلني بطريقك ع السفارة اليونانية ،، قلتله اوكي مو مشكلة تفضل ..

طلع بالسيارة معي ،، و بلّش ،، والله سيارتك كبيرة ،، شكلها ضمان عم تدفعلك منيح (<< على أساس ما بيعرف راتبي!!) ،، قلتله السيارة لأبوي مو لإلي ،، قالي بس مو كبيرة عليك ؟؟ قلتله لا بالعكس ،، لازم سيارتي تكون كبيرة عشان ” تتّسع لأفكاري ” ،، و أنا في قلبي عم بقوله :: قول ما شاء الله يا … ….. !!

دقيقة ،، الموضوع ما احتاج أكثر من دقيقة !! السيارة راح تنفجر !! الحرارة صارت ع الآخر !! وقفتها على جنب و فتحت الغطاء ،، كلها حرارة الحمد لله و الرادييتر راح ما ينفجر ،، بعد دقيقتين بطلّعلي راسه من الشباك و بقولي // بدك مساعدة ؟! قلتله لا ما عليك ،، قالي لا خلينا نتصل على الريكفري ،، قلتله بس إنت إنزل كمّل مشوارك و ما عليك ،،

كلفني تصليحها 1800 درهم :)

==================

” إللي راكب مرسيدس “

ع السريع كمان ،، بتتذكروا ” هذا الموضوع ” ؟؟ في الفقرة الخاصة بتاريخ 20-2-2009 ،، المصري إللي كان معانا في السيارة ضل طول الطريق و هو يقول المرسيدس دي إللي يركبها في مصر ده يبقى حاجة كبيرة و في G-Class مفيش زيّها في مصر و و و و و و و  و و و ثاني يوم صاحب السيارة فات علينا ع المجلس و السيارة مدعومة :)

==================

“ش” ،، و ما أدراك ما ”ش”  !!

مديري في الشغل ،، “ش” ،، هو بعرف إن بس ييجي يسافر ،، أسامة ما بيجي متأخر ع الشغل ،، يعني من باب الإحساس بالمسؤولية و إن ما بصير لازم أداوم بكير و الشغل على أكتافي و أمانة في عنقي و وو و و  و و و  هذاك اليوم قاعدين بنحكي في المكتب إن “ش” بدو يسافر ،، فواحد من الشباب عم بحكيله تنشوف بكرا إذا أسامة بداوم ولا لأ ،، ”ش” رد عليه و قاله :: لا أسامة أصلاً ما بيتأخر بس أنا أكون مسافر ..

النتيجة :: أسبوع كامل ولا مرة دخلت المكتب قبل الساعة 11 !!

مديري “ش” مرة قاعدين عم نستنى شغلة في مجلس صاحبي ،، قال والله بيت الحلو ..

النتيجة :: بس طلعت لقيت الدفاع المدني و الشرطة عن بطفوا الحريق !!

مديري ”ش” بنفس القعدة كان طالب مني أخلص شغلة في الدوام ،، و قالي لا هلأ بتفوت من لابتوبك و بتخلصها بعرفك ،،

النتيجة :: لابتوبي ما عاد اشتغل ليومين ،، و من رمضان لليوم ما انحلت المشكلة والله !! حتى بعد الفورمات !!

مديري ”ش” شاف السيارة البيجو إللي كانت معي فترة ،، حكى حلوة ريحتها ..

النتيجة :: بعد يومين سافر صاحب البيجو و كان ماخذ معاه سمك ،، السمك فرط في السيارة ،، و ريحتها لليوم سمك :)

مديري “ش” نفسه لما كنا عم بناقش معه هذا الموضوع ،، قال :: والله بديت أشك في نفسي !! حتى زوجتي عم بتقولي نفس الحكي !!

بكفي حكي عن ”ش” ،، فديته صابر علي لوووووووووووول :) :)

<< و لو إني ضارب بوز إلي كم يوم لأنه ما عم بخلينا نعمل عزايم في الشغل هع هع هع :) :)

==================

” تبيعه بألفين ؟ “

عندي تلفون نوكيا 6310 ،، أبو ليزر ،، بتتذكروه ؟؟ من 2004 و هو عندي الحمد لله ،، ما ضل حدا من الشباب ما حكى عنه !! إللي إجا بحكيلي تبيعه بألفين ؟؟ و إللي إجا بحكيلي كيف بعدك بتستخدمه لهالتلفون ؟؟ و إللي إجا بحكيلي الشيخ محمد بن راشد بستخدمه و إلي و إلي و إلي ،،

حبيت أطمّنكم إن التلفون ” غرق ” في المي و خرب ،، إن شاء الله كلكم تكونوا ارتحتوا !!

و على فكرة ،، كان معاه الآيبود ،، الإثنين خربوا ،، إن شاء الله تكونوا ارتحتوا أكثر !!

==================

“” مواقف من عند الشباب “”

“أحمد (ك)” :: وقّف واحد من الشباب عنده لمبرجيني ،، قالته تبيعها ،، قاله ببيعها ب 800 ألف ،، قاله ب650 ألف و بدفعلك إياهم كاش !! صاحب اللمبرجيني ما رضى يبيع >> نص ساعة وصل خبر إن الزلمة دعم و السيارة احترقت هههههههههههههههههههههه !!

“أحمد (د)” :: أخذ سيارة أبوه الرينج روفر ،، ضل 3 أيام ع التخت مش قادر يقوم بعدها !! على ذمته >> المصاروة إللي معاه في الشغل شافوا السيارة :)

==================

في حدا من قرايبي الدرجة الأولى كان/كانت يقول/تقول ::

” بدون شي نحن مطروقين بحجر كبير “

==================

في شغلة إسمها حسد و مذكورة بالقرآن ،، فما حدا يقولي مجرد صدفة هاي المواقف كلها !!

في شغلة كمان بدي أحكيلكم عنها ،، في شي إسمه حسد ،، و شي إسمه غبطة

الحسد : هو تمني ما عند الغير ،، مع زوال النعمة من عنده ..

الغبطة : هو تمني ما عند الغير ،، مع بقاء النعمة عنده :)

أذكار الصباح و المساء ،، بتحميكم ،، إسألوا مجّرب :)

و بدي أحكيلكم شغلة أنهي فيها الموضوع // لا تحسدوا غيركم على إللي عنده ،، لأنكم ما بتعرفوا ربنا شو أخذ منه ،، يحميكم ربي :)

==================

“” برا و بعيد “”

من فيلم ” New Year Eve “

التعليق :: فالوقت يقتلني ،، و الله على ما أقول شهيد ..

و السلام عليكم و رحمة الله و بركاته

مممممم ،، مش عارف كيف بدي أبلش هذا الموضوع يعني ،، هو بسيط ،، مش معقد كثير ،، بس بحكي عن شغلة رخيصة ،، عشان هيك ما عندي خبرة فيها هههههههه ،، تركتها لغيري دناوة النفس ..

في مواقف عم بتصير معي آخر فترة في الشغل ،، مع واحد نحن بنقول عنه :: نفسه دنيّة !!

يعني مش هيك الرخص و دناوة النفس يا شيخ !! خف علينا شوي !! ولا أعطي مجال لغيرك !!

:) :)

عنا واحد إسمه ” عقاب ” ،، هو من الجالية الهندية << هلأ لا تقعدوا تحكوا أسامة عنصري و لا عنده تفرقة ولا شو ما يكون ..

إللي عاجبه عاجبه ،، و إللي مش عاجبه مش لازم يعجبه أصلاً !!

نرجع لموضوعنا 

التحفة عقاب هذا عنده هواية إسمها الأكل !! و الفجع الزايد مرات !! و دناوة النفس في رواية أخرى !!

:) :)

خذوا الموقف الأول ::

معاكم كيس تحملوا فيه ؟؟ ولا أكتب الكلمات و إنتوا بعدين بتجمعوها ؟؟

تخيلوا المنظر ،، حاولتوا تتخيلوا ؟؟ طيب تخيلوا كمان مرة !!

لا لا ،، تخيلوا “أ ، د ، ر ، ع” قاعدين جنب بعض ،، إذا كان “ر” عم بحكي مع “أ” ،، راح يلف وجهه عليه شوي ،، بقوم “ع” بمد إيده ع طاولة “ر” عشان يوخذ بقلاوة ولا حلاوة موجودة ع مكتبه !! كإن عم بسرقها سرقة !!

طبعاً “ر” عزم “ع” كذا مرة ،، بس “ع” عنده دناوة نفس مستوى عالي ،، ما بشبع ،، مفجوع !! مش هيك !!!!

:) :)

طيب خذوا الموقف الثاني ::

“أ” بكون جايب معاه حلو ع الشغل ،، بقوم بعزم على الكل ،، بعد شوي بيجي ضيوف عندهم ع القسم ،، بقوم “أ” بعزم ع الضيوف ،، كانوا ثلاثة ،، قاعدين عند مكتب “ع” ،، بقوم “أ” ببلش بالضيف الأول ،، و بوصل للثاني ،، و فجأة بيجي “ع” بدّو يمد إيده ،، بقوم “أ” بقوله بس للضيوف ،، برجع “ع” و بقول لأ بدي !! “أ” بزبل “ع” و بضيّف الضيف الثالث ،، برجع “ع” عشان يخفف الفشلة قدام الثلاث ضيوف بقول :: 

hehehehehe ,, don’t worry i’ll take later

<< “أ” بسمعه و بقوله :: NO !!

:) :)

و خذوا الموقف الثالث :

بعد عشر دقايق ،، بخلص الإجتماع ،، بروح التحفة “ع” بقوم من مكتبه و بروح عند مكتب “أ” ،، بيجي بدو يفتح علبة الحلو ،، و بصير النقاش التالي:

“أ” : i think i said now

“ع” – و زي البجم – : hehehe common

“أ” : i’m not joking !!

“ع” – بستمر في عملية فتح العلبة

“أ” : can’t u understand that i said NO

“ع” – و كمان زي البجم – :: i’ll take

“أ” : keep it.. i said NO .. i’m not joking .. so please keep it and back to ur office

“ع” – مصدوم ،، برجع ع مكتبه

!!

ياخي قلنا دناوة نفس ،، بس مش هيك !!

:) :)

طيب استمتعوا في الموقف الرابع :

بيجي “د2″ بدو يوزّع شوكولاته عشان الكريسماس ،، بقوم “ع” بلحق “د” من مكتب لمكتب ،، من مكتب لمكتب ،، عشان يطلعله حبة شوكولاته ثانية !! أبو الرخص ..

:) :)

خلص خلص ،، بكفي نحكي عن “ع” ،، ولا شو رأيكم نخليهم خمسة ؟؟ بعين إللي ما يصلي ع النبي ،، عليه الصلاة و السلام :)

و هي الموقف الخامس طيب :

واحد من الشباب جاي من مصر ،، و جايب معاه بقلاوة ،، بقوم بعزم على “أ ، ر ، ع “ ،، “د” مسافرة ..

بس وصل لعند “ع” ،، أخذ الحبة الأولى ،، و الثانية ،، و الثالثة ،، و بلّش يعبي ،، و يعبي ،، و يعبي ،، و شو بقوله للشب إللي جايب البقلاوة ::

i didn’t had my breakfast

أحا يا رخيص !! بدك تفطر على حسابي !! بقلاوة !!

يعني نفسي أفهم كيف !!

<< طبعاً في موقف هو نفسه “ع” حكالنا عنه برمضان ،، بتتذكروه يا محمد حمزة و ريما ؟ و بتتذكروا المسج إللي بعثلي إياه مرة عن الحفلات ؟؟

خلص خلص ،، بكفي نحكي عن الناس ،، هههههههههههههههههههههههه :) :)

;) ;)

===============

نوع ثاني من دناوة النفس و الرخص ::

يا ربي تبعون التوصيل إللي بعملولك مسد كول ،، و تلفوناتهم ع الشركة ،، هدول شو حكمهم شرعاً !!

البقشيش ،، دناوة نفس ؟؟ ولا حق الموظف ؟؟

===============

النوع سبعطعش من دناوة النفس و الرخص ::

لما أطلع بتاكسي بعمّان ،، و يطلع العداد 80 قرش ،، و أستناه يرجعلي الباقي ،، و يقولي و لو ما إنت خليجي ،، و أقوله :: لا أنا أردني ،، يقولي يا زلمة منظرك مش منظر أردني ،، شو لازم أقوله أنا ؟؟

بقوله :: طز فيك !! و في إللي علّمك الأدب !!

===============

النوع ميّة و خمسطعش ::

إللي أخلاقه دنيّة و رخيصة و ما بصاحبك إلا للمصلحة ،، تراه بعد هذا رخيص :)

===============

طيب هلأ خلصنا حكي عن العالم

تعالوا أحكيلكم عن دناوة النفس عندي !!

<< تضربوا ،، الله يا رب يخليني محافظ أنا و العيلة الكريمة و كل إللي حواليي على عزة النفس إللي فينا ،، فديت أمي سمية والله :)

أمي سمية يا جماعة الخير كانت تحكيلنا شغلة ،، بس كبرت و شفت الحياة ،، و فهمت إللي بصير حواليي ،، حبيتها أكثر ..

كانت إمي و نحن صغار دايماً تحكيلنا بس نروح عند ناس و نشوف عندهم شغلة جديدة ولا أكلة جديدة ولا شي ما بنعمله في البيت ،، نقولهم أكلنا زيها ولا عندنا زيها ولا لأ شكرا ،، حتى لما يضيفونا شوكولاته ،، نوخذ حبة بالكثير ،، 

بتذكر كان في ناس بس ييجوا عنا ع البيت يقوموا يوخذوا شوكولاته 4 و 5 حبات ،، و يعبّوا لباقي العيلة في البيت !! و مش بس هيك ،، نضيّفهم كيس شيبس و كيسين و ثلاثة ،، و فعلاً مفاجيع !!

فالحمد لله ع النعمة يا رب ،، و الله يبعد عنا دناوة النفس هاي كلها :)

أما أبوي ،، علّمني شغلة ثانية ،، كان يقولي :: أبو سدّتين >> نذل !!

مين هو أبو سدّتين في أعراف و تقاليد البدو و العرب ؟؟

أبو سدّتين هو الشخص إللي بسد بطنه مرتين ،، يعني بتغدى عند ناس ،، و برجع يروح يتغدى عند ناس ثانيين ولا يتغدى في بيتهم !!

و لا بتعشى في البيت عنده ،، و بروح عند عالم و بتعشى مرة ثانية !!

هذا نذل ،، و رخيص ،، و نفسه دنيّة كثير ،، و مو بس هيك ،، بنته ما بتنطلب !! لأنه رخيص ،، ما بيشبع !!

===============

“” برا و بعيد “”

من فيلم ” Tresspass “

التعليق :: كل واحد يحكي عن عيلته ،، عيلة عن عيلة بتفرق يا ” رخيص ” :)

===============

جمعة مباركة ،،

و السلام عليكم و رحمة الله و بركاته :)

جملة كثير يمكن سمعناها :: خذ خبرة سنة و إطلع :: و أكيد إنتوا كثير سمعتوها بأول حياتكم المهنية ،، بس يا ترى كم واحد منكم عملها ؟؟ من قبل ما أبلّش شغل ،، أو حتى أدوّر على شغل و الكل بحكيلي هاي الجملة ،، و كان نفسي أسويها ،، بس ما زبطت الحمد لله :)

كالعادة ،، لازم أبلش الموضوع بتحميل جميلة لإلكم إن كان في عندي كذا موضوع بدي أكتبهم ،، مثل ” سوف لن نشتري هذا العيد شجرة ” و ” أمنيات العام الجديد ” ،، بس مشاغل الحياة << بتعرفوا يعني لازم أستعد لرئاسة الوزراء إن شاء الله ،، فإلتهيت عن الكتابة شوي ،، و قلت أكتب هذا الموضوع :)

طبعاً هذا الموضوع بكتبه بمناسبة الـ anniversary الرابعة لإلي في الدوام (( يرحم anniversary يا إبن الكرك )) << لووووول

في مثل هذا اليوم قبل 4 سنوات (( 2-1-2008)) كان أول يوم دوام رسمي لإلي ،، طبعاً ما بعرف كعالدة من وين بدي أبلّش الموضوع

عشان هيك راح تلاقوه كله فايت ببعضه ،،

ولا أقولكم ،، خلينا نحاول نكون منظمين هاي المرة ،، تنبلّش من لما قبل ما نداوم ،، كنا أيامها أنا و أخوي نشوان بنطبع ” السيفي-هات ” < خذ ،، تبعونا و بنروح كل يوم بنلفلف ع الشركات تنقدّم ،، و طبعاً بعدني بتذكر إني بتاريخ 6-8-2007 عملت حادث و طيرت واحد على دراجة نارية  ،، يحميني ربي :)

في يوم من الأيام ،، بنتفق إن نروح نقدم ع مجموعة شركات ،، و أكيد أسامة المهمل لازم ينسى يرتّب أموره كلها ،، فشو عملت ؟؟ أعطيت نسخة من السيفي لماما و قلتلها إذا ممكن تصوّرلي إياها معاها لو سمحت ،، و لما تيجي الصبح أنا باخذهم و بروح أقدمهم إن شاء الله ،، و فعلاً ،، أخذتهم ماما ،، و صوّرتلي إياهم الحمد لله و أنا ضليت نايم خخخخخخخخخخخخخخ

بصحى الساعة 10 و شوي على صوت واحد فلبيني بقولي معك ” جيلبيرت فانيو ” من الشركة الوطنية للضمان الصحي – قسم الآي تي ،، أهلين ،، قالي عندي السيفي تبعك و بدنا نعملك مقابلة ؟؟ قلتله بس أصلاً أنا ما قدّمت عندكم !! من أي لكم سيفيتي يا عرب ؟؟ قال لي :: لا أدري يا شيخ ،، يقولون أن أربابنا رمزي إبن رحال بعث لنا بها و طلب مقابلتك ،، أسامة :: حسناً حسناً ،، إذهبوا فأنتم الطلقاء ،، قصدي اوكي فاين آيم كومنيج إن شاء الله تو ذا إنتر-فيو ،، ثانك يو ،، ثانك يو ،، باي سير .. :)

<< عجبني التنوّع اللغوي في الفقرة السابقة :)

المهم ،، نرجع لموضوعنا ..

بصحى من النوم و بصحصح و بكون مركّز ،، إلا قاعد مع إمي و بتقولي – فديتها أنا – :: مبيرح قدمتلك ع شركة ضمان ،، قلتلها متى ؟؟ كيف ؟؟ وين ؟؟

قال مبيرح إجا عنا زلمة مرته بدها تخلف ،، فكان عم بحكيلي إن بشتغل مدير قسم الآي تي في ضمان ،، فديتها ماموشيا بتحكيله أنا إبني (( أسامة بن زيد )) بعده متخرج و عم بدوّر على شغل ،، قام قاللها إيه خلص خليه يبعثلي السيفي تبعته ،، إمي شو بتقوله :: دقيقة و بجيبلك إياها للسيفي موجودة معاي :)

و فعلاً الزلمة ما شاء الله ما قصّر يعني طلبنا للمقابلة و و و وو وو وو الحمد لله صرت موظف بضمان :)

أول يوم دوام لإلي كان 2-1-2008 ،، طبعاً شو بدي أحكيلكم ،، الحماس ضارب السقف ،، و من كثر ما أنا متحمس ،، وصلت ع الدوام الساعة 8 إلا عشر دقايق ،، و وين كانت الصدمة ؟؟ بالباركينج ؟؟ لأ الحمد لله ،، بالبرد و المطر بشهر واحد ؟؟ كمان لأ الحمدلله ،، الصدمة كانت بالأصنصيـــــــــــــــر ،، شو بدي أحكيلكم عن الأصنصير ،، يــــــــــا إلهـــــي ،، يعني تذكرت توزيح المساعدات الخيرية و الدور ع المعونة و كإن في مجاعة في البلد ع الأصنصير !! مش طبيعي المنظر ،، و أنا أول مرة بشوفه ،، و الساعة 8 إلا عشرة ،، و بدأت المهمة المستحيلة الجزء الرابع :: Floor 15 ،، و بلش الركض من الطابق الأرضي للطابق ال15 !! يعني فشلة أول يوم في الدوام و أكون متأخر !!

و أركض ،، و أنط ،، و أقفز ،، و أمشي ،، و أصعد ،، و كانت النهاية في خمس دقايق ،، الساعة 8 إلا خمس دقايق ،، أسامة بفوت ع الآي تي ،، بلاقيه فاضي ،، ما فيه غير السكرتير !! بطّلع عليه هيك ،، بقوله ما في دوام اليوم ؟؟؟؟؟؟؟؟؟؟ بقولي بعدها الساعة ما صارت 8:30 ،، و من يومها ،، يمكن خلال الأربع سنين بس 10 مرات إللي دخلت فيهم قبل ال8 ع المكتب ،، صار مثل الحلم بالنسبة لإلي لووووووووووووووول :) :)

المهم

طبعاً كثير مواقف مرّت بهالشركة ،، إشي ” حلو ” و إشي ” قبيح ” و ” بشع ” ،، 

المهم ،، بس بلّش الدوام ،، كل أهلي كانوا يحكولي :: خذ خبرة سنة و إطلع و إمي من جهة خذ خبرة سنة و إطلع و الشباب أصحابي خذ خبرة سنة و إطلع و الشباب خذ خبرة سنة و إطلع ،، كنت مفكّر راح تكون بس سنة ،، لأ و أنا يعني بلّشت أستعد لما قربت تخلص السنة ،، و غيرت خلفية الكمبيوتر و حطيت ” مش مطولة ” إن قربت الإستقالة و خلص و الشغل ع الأبواب و الناس و الشركات راح “” تتهافت ” على أسامة بن زيد و الأمور كلها تحت السيطرة و إن يعني من شان الله بس استقيل يا أسامة :)

و يرحم استقيل ،، الحمد لله بعدنا مكاننا ،، مكانك سر !!

تذكرت أخونا محمد أبو الحوف – الله يذكره بالخير – ،، لما إجا بدو يستقيل من ضمان ،، قال :: هاي أطول شركة بقعد فيها !! سنة و نص يمكن كانت أو شغلة هيك !! متعود المحروس كل 3 أو 4 شهور بشركة ،، و بتذكر قاللنا مرة إن في شركة قعد فيها بس أسبوع :)

و بتذكر كمان كان في بنات بقسم الـ Support عنا في كم وحدة يمكن ما كمّلوا يوم واحد في الشركة !! بس شافوا مديرتهم ” ساخطة ” و ما عجبهم الوضع ،، و في ناس إجوا و راحوا و نحن بعدنا مكاننا :)

يعني الشباب بتصبّر فيني ( وفي حالها ) من جهة ،، و أ.ب.ت من جهة ،، و أحلى شي مرة أخونا خالد القبيسي ،، ال Chairman تبع الشركة ،، كنت عم بحكي معه إني ما تطورت من سنتين و ما تعلمت شي جديد و قاعد زي ما أنا ،، قالي أسامة الحياة مش دايماً وردية ،، و أنا قعدت 4 سنين في بنك أبوظبي الوطني ما تطورت فيهم شي !! >> رفعلي معنوياتي إني استفدت من سنة و نص في ضمان :)

يلا الحمد لله ،، كمان ضمان نعمة كبيرة بالنسبة لغيرها لما عم بشوفها ،، و الحمد لله والنعم بالناس إللي فيها ،، و الجماعة – كلمة الحق تنقال – محترميني أكثر مما أنا محترمهم بصراحة يعني :)

ما حبّيت ” ألتّ و أعجن ” كثير بهذا الموضوع ،، ولا هو في كثير مواقف ممكن تنحكى و تنكتب ،، 

بس شو رأيكم ؟؟ ” مش مطولة ” ؟؟ ولا بنضل قاعدين هاي السنة كمان ؟؟

بكرا مع الأيام بنشوف إن شاء الله ،، و بكرا بدوب التلج ،، و ببان المرج :)

 ====================

“” برا و بعيد “”

هاي فقرة جديدة عم بفكر أخليها في كل التدوينات الجاية إن شاء الله ،، و هي عبارة عن ” سكرين شوت “  من أحد الأفلام ،، مع تعليق ( قد يكون مش حلو ) من عندي :)

هاي الفكرة إجت من كم صورة شفت أختي ” ديانا حباشنة ” كانت حاطيتهم ع الفيسبوك ،، فقلت أعدّل ع الفكرة شوي و أخليها بالمدونة ،، يسلمو ديانا :)

هاي المرة المشهد من فيلم : Black Gold ::

التعليق :: لا يا شيخ !! و بدك تبعثه لهيوستن على الخيل ولا بالحمام الزاجل ؟!

 ====================

HAPPY NEW YEAR

و السلام عليكم و رحمة الله و بركاته

احترامي للحرامي ،، صاحب المجد العصامي ،، قصيدة يمكن  كثير منكم سمعها قبل هيك – للأمير عبد الرحمن بن مساعد – بس أنا مو جاي أحكيلكم القصيدة و لا أسمّعلكم إياها ،، أنا بدي أحكيلكم عن الحرامي نفسه ،، أو نوع معيّن من الحرامية ،، بسمّوهم :: (( اللاطشون )) ،، بتعرفوهم شي ؟؟

طبعاً أكيد أكيد أكيد أكيد كل واحد منا (( و منكم )) إلا ما يكون لطشله كم شغله في حياته ،، من لما و هو صغير ،، و يمكن لقبل ما يموت بنص ساعة لوووووول ..

أنا كنت حاب أكتب عن الفورمولا ،، و لو إنها متأخرة شوي ،، بس صار موقف معانا يوم الجمعة الماضية و هو إللي ” هيّج ” مشاعري و خلاني أكتب هالموضوع :)

هذا بقولكم ” اللاطش ” أسامة بن زيد ،، إن يعني الحياة ما في أحلى من ” اللطش ” فيها ،، و إللي ما بلطش بحياته ،، أكيد حياته مو حلوة كثير و كلها ملل و روتين ،، حياته نفسها نفس إللي ما عنده أصحاب مجانين للمصايب جاهزين ،، أكيد ما ذاق طعم الوناسة :D

تعالوا أحكيلكم عن مهارة اللطش في مراحل عمرية متنوّعة

طبعاً الموضوع يعبر عن رأي كاتبه ،، إللي عنده رأي غير هيك ،، يا يكتبه ،، يا يسكت أحسنله ،، و أنا بالنسبة لإلي بعتبرها مواقف و مرّت و ربنا ستر علينا بشوي منها و انكشفنا بشوي منها ،، يعني إن شاء الله ما يكون فيها مجاهرة بشي غلط :)

=================================

.. عمو أبو فتحي ..

يعتبر عمو أبو فتحي من الشخصيات المشهورة في القرية عنا في الأردن ( قرية راكين – محافظة الكرك ) .. عمو أبو فتحي كان مشهور بشغلتين ،، دكانته ،، و شجرة الخوخ (البرقوق) إللي عنده ..

تنبلش بالدكانة ،، كنا في مرة من المرات نحن أسامة بن زيد – حفظه الله و رعاه – و معاي واحد من عيال عمي عم نتنافس :: مين يلطش من الدكانة أكثر ؟؟ و طبعاً اللطش السليم في التخطيط العقيم ..

كنا ندق عليهم الباب ع الساعة 2:30 ولا 3 العصر ،، عشان يكون عمو أبو فتحي نايم و يطلعلنا حدا من أولاده ،، نفوت ع الدكانة أنا و إبن عمي ،، و نبلش نسأل إبن أبو فتحي بقديه هاي ؟؟ و هاي ؟؟ و هديك إللي فوق ؟؟ و هو يلف ظهره من هون ،، و نحن نعبّي بجيابنا من هون .. و نعبي ،، و نعبي ،، و نشتري شغلة صغيرة بس .. و نروح نفضي الأغراض في الصالون عند بيت جدي و نفضي الأغراض هناك ..

نرجع ع الدكانة بعد شي ربع ساعة ،، بقديه هاي ؟؟ و هاي ؟؟ و هديك إللي فوق ؟؟ و هو يلف ظهره من هون ،، و نحن نعبّي بجيابنا من هون .. و نعبي ،، و نعبي ،، و تخيلوا إن لطشنا علبة فول !!!!!!!!!!!!!!!!!!!!!!!! أقوياء لووووووووووول ..

 و نرجع نروح (<< نرجع ولا نروح ؟!) نفضي الأغراض في الصالون عند بيت جدي و نفضي الأغراض هناك ..

و هكذا ،، و في إحدى ” السطوات ” ع الدكانة ،، مين يا حزركم كشفنا ؟؟

مين ؟؟

رأيكم عمو أبو فتحي ؟؟

رأيكم إبنه فتحي ؟؟

ولا بنته جميلة ؟؟

ولا نحن فاق ضميرنا ؟؟

ولا جميع ما ذكر ؟؟

ولا ليس مما ذكر ؟؟ >> مما أنثى لووووول

لا لا

أكيد كشفنا الملاك ،، الطاهر ،، البريء ،، الوديع ،، الرقيق ،، الحنون >> أختي ديانا !!!

ههههههههههههههههه

و ركض عند ماما ،، ماماااااااااااااااااااااااااااااااااا تعالي شوفي أسامة و طارق شو بعملوا ،، ماماااااااااااااااااااااااااااا

و آآآآآآآآآآآآه يا مامااااااااااااااااااااا

بس فديتها لشيختنا سمية ،، سمّعتنا إللي فيه النصيب ،، و أعطتنا فلوس ضعف قيمة إللي لطشناهم ،، و قال روحوا قولوله لقينا الفلوس هاي واقعة عند باب الدكان :D :D

كان يوم :) :)

هيك بنكون خلصنا من قصة الدكانة ،، شو بضل ؟؟

بضل قصة شجرة الخوخ ..

هات عمو أبو فتحي جارنا الباب بالباب ،، و مو بس هيك ؟؟ كمان البستان بالبستان ،، جدي – الله يرحمه – كان زارع عنب و زيتون و مشمش و خوخ و دراق ،، بس سبحان الله ،، اللطش طعمه أطيب ..

كنا نستناها بس تعتّم الدنيا ،، و نبلش حملة اللطش المنظم ،، مسكين عمو أبو فتحي ،، بنام الشجرة بتكون معبية خوخ ،، و بس يصحى ما بلاقي عليها شي !! و لا كله كوم و لما يصحى بالليل على صوت ضحك في البستان تبعه لوووووووووووووووول

لا و وين الأحلى في الموضوع ،، إن إللي بدو يفوت يلطش من بستان أبو فتحي ،، لازم يفوت من بستان جدي ،، فـ الله وكيلكم اشتغلنا نواطير ،، الناس تفوت تلطش ،، و نحن نوخذ عمولتنا من العملية لوووووووووووووووول >> شغل كوميشينات :D :D

كانت أيام والله ،، يمكن – و بدون مبالغة يعني – قعدنا سبع سنين نلطش منها لهالشجرة :) :)

=============================

.. طيران الإتحاد ..

و ما أدراك ما طيران الإتحاد ،، في هواية غريبة شفتها عن كثير ناس ،، و موجودة عندي ،، إسمها إني ألطش الحرام (الشرشف) تبع الطيارة !! عندي الحمد لله تشكيلة كبيرة و متنوعة من كثير خطوط طيران :D

المهم ،، مرة زهقت ،، قلت يا أسامة خلص بكفيك حرامات ،، خلينا نوخذ مخدة ،، هبطنا ع الأرض ،، و أنا طالع من الطيارة ،، ماسك بإيد شنطة اللابتوب و بالإيد الثانية مخدة ،، بس صرت عند باب الطيارة ،، بكل براءة بحكي للمضيفة :: معلش بس أخذت مخدة ،، إلا بتحكي آسفة ممنوع !! قال ممكن الحرام بس المخدة لأ !! أعطيتها إياها و قلتلها شكراً ..

و من يومها كل ما أسافر صرت أحط المخدة جوا شنطة اللابتوب !! و مو بس هيك ،، مرة كنا مسافرين ع البزنس كلاس أنا و علي ،، قمت لطشت الحرامين تبعون البزنس ،، حلوين كانوا و تقال و بدفّوا منيح :D :D

<< يستاهلوا !! حدا حكالهم يعندّوا و يحطوا راسهم براسي !!

=============================

.. الشاي المغربي ..

في أطيب من الشاي المغربي ؟؟ فتنا يوم الجمعة الماضية على كافيه الساعة 1:40 دقيقة بالليل بمنطقة المارينا بدبي ،، بس إجينا بدنا نقعد ،، إلا الزلمة بقوللنا :: نحن حنسكر بعد شوي !!

فلتله ننقلع يعني ؟؟

قالي لا والله ع حسابك يا خيي و خلص نحن آسفين و ما بعرف شوي ،،

طلبنا ،، فأنا من باب الأدب و عشان ما نتأخر ع الزلمة ،، أعطيته الفلوس عشان ندفع الحساب و نخلص قبل ما يسكروا !! 

إلا الزلمة تنّح و بقولي لا خلص هي ضيافة المحل و خليها علينا و و و و و و و أنا قلتله ياخوي ما بدي تحملنا جميلة !!

و فعلاً ما رضا !!

بلشوا يسكروا في المحل !!

و يسلمو الكنبايات و الكراسي و المساند

و إحنا قاعدين !!

صارت الساعة 3 !!

المحل سكّر من ساعة !!

و نحن لسه قاعدين !!

إلا حدا من إللي قاعدين معانا بقول :: بدي نفس إبريق الشاي هذا !!

قلتله بس هيك ؟؟ بسيطة هاي !!

يا بنوصيلك على واحد من المغرب ،، يا بنلطش الموجود !!

شووووووووووووو ؟؟ << بقولوا نعم 

نلطش الموجود ؟؟

إيه و شو المشكلة ؟؟ أول مرة يعني ؟؟ لووووووووووووول

قلت خلص بلفه بالجاكيت و بضلني طالع !!

بعدين قلت عشان أبرّي ذمتي ،، خليني أحمله بإيدي ،، و إذا حدا وقّفني بقوله ما لاقيت حدا من تبعون المحل فقلت أجيبلكم إياه عندكم لووووووووووووول

و ما حدا وقفنا !! وصلنا ع السيارة !! و طلعنا !! و ضل معانا الإبريق !! و عاشوا في تبات و نبات ،، و جابوا صبيان و بنات !! قصدي جابوا شاي و نعنع :)

=============================

طيب يا جماعة الخير

يلا كل واحد لو سمحتوا يعطينا من ” اللطشات ” إللي عنده

ولا ما عندكم استعداد ؟؟

– عجبني هذا الخبر – 

http://www.ammonnews.net/article.aspx?articleno=103793

و السلام عليكم و رحمة الله و بركاته