.. من 5-12-2014 إلى 15-3-2015 ..

.. 100 يوم من الزواج ..

.. شو تعليقك ع الموضوع بكعب الصفحة كتبتله ..

السلام عليكم و رحمة الله و بركاته ،، مرحبا يا جماعة الخير ،، دخلك شو أخبارك ئلي ،، اشتئتلك إنت اشتئتلي ؟؟

يعني الفكرة في بالي من زمان إني أكتب هالموضوع ،، بس ما كنت عارف بأي صيغة بدي أكتبه ،، ولا شو أكتب و ما أكتب فيه ،، لذلك شو قلت راح أعمل ؟؟ قلت راح أشوف الموضوع إللي كتبته إلى شريكتي المستقبليّة ،، خـظـي !! ،، و أكتب على نفس ترتيب النقاط المذكور في الموضوع .. و إذا في شي جديد ،، ببقى بحكي عنه كمان إن شاء الله 🙂

طب الجرة ع تمها ،، بتطلع البنت لأمها ..

لا ع سلامتها الأم والله ،، أحسن منها 😀 ،، بمزح بمزح ،، و الحمدلله بعدها منيحة معاي كثير الحمدلله – و أنا كمان منيح الحمدلله << يعيش التواضع 😀 😀

و بالعكس دايماً بتنصح بنتها لمصلحة البيت و بتسعى لإصلاح ذات البين 🙂 🙂

بابا جاي إمتى ؟

أبوها لمشاعل بضل يسأل عني أكثر ما أنا بسأل عنه ،، هلأ السؤال مش مشكلة ،، المشكلة بالمسجات الدينية إللي بضل يبعثلي إياها على الواتس أبب ،، بعرفش شو بدي أرد عليه !! تخيلوا مثلاً يبعثلي برودكاست دعاء ،، و أقوله : جزاك الله خيراً يا أخ العرب ،، إذهبوا بنا إلى قريش ،، درجن درجن درجن درجن درجن درجن 😀 😀 😀 😀 😀 😀

آخ من الـ ” أخ ” ..

لا ع سلامتهم محمد و عبد الله ،، أصلاً محمد الله يعينه ،، أخته بتكون معصبة و بتتصل عليه ،، و أنا قاعد بضحك 😀 😀

و أصلاً مثل ما بتعرفوا ،، مرات الواحد قبل ما يتزوج ،، بكون بقول بينه و بين نفسه ،، يا رب ما يكون أخوها زنخ ههههههههههههههههههههههههههههههههههههههه ،، بس لا والله ع سلامته محمد ،، أحسن مما كنت أتوقع بكثير 🙂 🙂

الباب إللي بجيك منه الريح ،، إخلعه عشان ما يوجعلك راسك !!

الحمدلله ،، كان في بعد نظر لما كان بدي أهلها يكونوا مش هون ،، تخيلوا كل ما نتخانق معاها تروح على بيت أهلها و أروح أجيبها ،، لبكة والله ،، يعني بالله عليكم لو كانوا أهلها ساكنين بشارع حمدان و لا بالخالدية ،، وين بدي ألاقي باركنج لما أروح أجيبها ههههههههههههههههههههههههههههههههههههههههه

و الحمدلله ،، البيت غرفتين نوم ،، يعني ما حدا بنام على الكنباية بالصالون ،، كل واحد بكرامته بنام على التخت 😀 😀

و شو المشكلة ؟

مشاكل إيفيري وير حضرتك ،، بس عادي مرات الواحد بوصل لمرحة التمسحة ،، يعني سبحان الله ،، في دمهم النسوان !!

أبوي و إمي ،، و أبوكي و إمك ..

بالبر و بالإحسان و بالخير ،، غير هيك ،، خط أحمر 🙂

بس كإني حسيت إن في شي غلط صار مرة ؟؟

أنـــــــــــــــــــا ..

أنا مش أنا ،، أنا مش أنا إللي كنت بعرف نفسي !! مممممممممم أنا مش هيك ،، ولا عارف كيف بدي أعبرلكم عن هيك !!

و بخصوص فقرة أنـــــــــــــــــــا .. في موضوع إلى شريكتي المستقبلية ،، خظي !!  راح أتركك إنتي تعلقي عليها ..

حبيبتي مشاعل // أنا بعرف إنك مش كاتبة الموضوع لسه ،، لأنك أصلاً مش عارفة إن اليوم بكون مر 100 على النكبة ،، هههههههههههههههههه دعابة دعابة ،، قصدي 100 على الزواج 😳 😳

فعادي يعني ،، خذي راحتك و إنتي بتكتبي ردك على كلامي ،، سواءً على هذا الموضوع أو الموضوع القديم ..

😆 😆 واثق من أفعالي و مرتاح الضمير ،، الحمدلله 😆 😆

ناوية تختبريني بالخطبة ؟؟

حكيت قبل هيك /  لا تختبريني ،، لأنك راح تتعبي / ،،

و نفس الشي بحكيلك إياه بعد الزواج /  لا تختبريني ،، لأنك راح تتعبي / ..

حبيبي وين بدنا نعمل العرس ؟؟

إن شاء الله يكون عجبك ؟؟ و شكراً لكل الشباب إللي نزلوا من الإمارات ،، فرداً فرداً ،، ما قصرتوا ،، و إن شاء  الله تكونوا إنبسطتوا كمان يا رب في الأردن و في العرس 🙂

طيب و شهر العسل ؟؟

إن شاء الله يكون عجبك ؟؟ شهر العسل ،، و مفاجأة قطر ،، و استعدوا للكبيرة إن شاء الله يا رب 8) 8)

طيب إنت قديه بتحبني ؟؟

تارك الجواب لإلك 😈 😈

حبيبي كمّل صحني أنا شبعت !!

الحمدلله ،، ما كنت بجبر ،، و بعدني ما بجبر ،، كملي صحنك لحالك 😛 😛

طيب و شو بخصوص لبسي ؟؟

كله تمام الحمدلله 🙂

بالمطبخ ..

فاجأتيني كثير والله ،، يعني كنت مفكر حالي راح أقضيها معكرونة أول فترة و باستا و هالسوالف ،، بس فاجأتيني بالإبداع – ما شاء الله عليكي – ،، فديتج أنا :* :*

رايح جاي ،، رايحة جاية ..

لحد هلأ ،، كله تمام الحمدلله ،، و لو إني تفاجأت من بعض الناس ،، بس يلا ،، المعاملة مع ربنا الحمدلله 8) 8)

إنت شو بتشتغل ؟؟

بعدني بنفس الوظيفة الحمدلله 🙂

بدك تشتغلي ؟؟

يلا هانت هانت شوي إن شاء الله و نخلص طلب ترخيص هيئة الصحة 😀 😀

ناوية تصرعينا مسلسلات تركية و برامج تلفزيون ؟؟

لا ع سلامتك والله ،، كله مسلسل سوري واحد بس 😆 😆

شو إنترنت ما إنترنت ؟؟

شوفي الفقرة بالمقال القديم ،، و أنا بترك التعليق لإلك ..

بخصوص الموبايل ؟؟

أعتقد إني نبهتك على هذا الموضوع قبل هيك ،، بس لازم تشتغلي على حالك أكثر في هذا الموضوع :mrgreen: :mrgreen:

أعياد و مناسبات ..

شوفي يا حبيبتي ،، أنا قلتلك قبل هيك // لا تتوقعي كثير هدايا // ،، يعني عادي طنشي طنشي ،، عادي أول فترة يكونوا كثار ،، بس إن يعني بتعرفي ،، دوام الحال من المحال ،، و أنا أصلاً بدي أترك المجال لإلك عشان تبدعي و تورجيني مهاراتك 😛 😛

الشيطان يكمن بالتفاصيل ..

أصلاً بالله عليكي ،، إنتي كنتي عارفة إن اليوم يكون مرة 100 على زواجنا ؟؟ أنا الشيطان ،، و أنا التفاصيل ،، و أنا أسامة بن زيد ..

حكي الناس ،، و الحكي عن الناس ؟؟

أصلاً هاي في دمي 😆 😆

بس خففتها كثير الحمدلله ،، أمجادي عم بتضيع في هذا المجال هههههههههههههه

حبيبي ممكن تتغير عشاني ؟؟

قلتها قبل شوي ،، أنا نفسي مش عارف نفسي ،، شكلاً و خلقاً ،، ولا نسيتي الكرش إللي طلعلي 😀 😀

إنت ليش مش رومانسي !!

نحن بنعطي دروس يا كبيــــــــــــــــــــــــــــــــــر 8) 8)

ابتسمي 😀 😀

أردنيين ،، شو بدي أحكي ،، ما بتعرفوا تضلوا مبتسمين ..

و لو شفتوا حدا مبتسم هيك من الله لحاله ،، بتقوله شو مالك شو صايرلك ،، عادي والله ،، أنا متعود أمشي و أضل أوزع إبتسامات :mrgreen: :mrgreen:

و ناوي تصرف علي ولا أصرف على حالي ؟

راح ألتزم الصمت ..

شراشف التخت !!

أعتقد شفتوا مهاراتي و مواهبي ..

أواعيي و Oz1985

ماضون في المسيرة الحمدلله ..

بخصوص OsamaZaid.Com ..

والله أصلاً أنا نفسي مش عم بلحق أكتب فيه ،،

مش عارف المشكلة من مين بالضبط ،، بس كإن الإلهام الفكري بخف كثير بعد الزواج !!

مصباح علاء الدين ..

أوكي ،، كان الصمت بكون أفضل من أي كلمة ممكن أحكيها 🙂

نصيبي من الهم .. 

الحمدلله على كل حال يا رب 🙂 🙂

و بنقول //  ( رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ ) [البقرة/286]

تسكنوا إليها ..

بتركها لإلك ..

نفس ما كتبت في الموضوع القديم ،، الآية 21 من سورة الروم ،، يقول الله – عز و جل – : ( وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ ) ..

نظافة البيت ..

أصلاً بعدني بقولك ،، ريحي حالك أكثر ،، فديتك والله شادة زيادة عن اللزوم ..

و ضيوف الفجأة ..

بعد لازم يكون في استعداد أكثر

حبيبي عم بتعب من شغل البيت ،، بدي خدامة ..

بعد بكير ..

اضرب المرأة بالمرأة ..

أعتقد إني حكيتها قدامك و قدام أهلك و قدام أهلي قبل الكل ،، و أوضحت النوايا قدام الكل الحمدلله 🙂

الوقت الوقت الوقت ..

بعدني عم بحاول أحافظ على دقة مواعيدي ،، بس عم بتضيع الطاسة شوي ..

و آه صحيح ،، بعدني ما ركبت ساعة الحمّام !!

فلوسي ..

من كثرتهم هههههههههههههههههههههههههههههه ،، الحمدلله الحمدلله الحمدلله الحمدلله الحمدلله على جميع النعم يا رب ،، يا رب أكثر مالنا و حسنانتنا و أفعالنا بالخير يا رب 🙂 🙂 🙂

ما في Expiry Date ؟؟

نفس ما كتبت قبل هيك ،، .. ( لا تدري لعل الله يحدث بعد ذالك أمراً ) سورة الطلاق:1

بـ ســــــــــــــــلام ..

لازم تسعي أكثر في هذا الموضوع ،، و راح أترك التعليق كمان لإلك ..

لا تؤجل انبساط اليوم إلى الغد ..

و راح أضلني محافظ على هاي القاعدة طول ما أنا عندي القدرة على الإلتزام فيها يا رب ،، و الله يغير الحال للأحسن دايماً إن شاء الله يا رب يا رب يا رب 🙂 🙂 🙂

لا أريد أن أعيش غداً ،، لاحقاً .. أريد أن أعيش اليوم ،، الآن ..

========

المهم ،، في كمان أفكار ممكن يعني أشاركم فيها ..

للشباب ،، و حتى الشابات ،، تعلموا تنجزوا قد ما بتقدروا من أحلامكم و أفكاركم و طموحاتكم قبل الزواج ،، لحالكم بعدين راح تعرفوا ليش 🙂

في شغلات الواحد بنحصر فيها بعد الزواج ،، يعني أما متعود على أروح على السينما الساعة 12 بالليل بكون أهدى و ما في زحمة و ما في أولاد صغار ،، الحين ما بتقدر توخذ راحتك بهذا المشوار ،، يعني يا بتطلع مع مرتك الساعة 12 بالليل ع السينما ،، و إذا بدك تطلع مع الشباب بتصير تخليها أبكر ،، لما تقرر إنك تخليها أبكر ،، فبدك تعرف إنك طول النهار في الدوام برا ،، و بعدين بترجع ع البيت و بتبدل و بتطلع ع السينما ،، و بعدين بترجع لمرتك ع البيت ،، لو مرتك مثلاً عندها صاحبات هون تطلع و تيجي معاهم ،، بصير الموضوع أهون شوي ،، بس لما تكون جاية من بلد لبلد ،، بتنحكم ببعض الـ Constraints ..

كل الشكر للشباب و الشباب و الأقارب و الأصحاب إللي ساهموا معانا في النقوط ،، إللي كان رد نقوط >> ما قصرت ،، و إللي ما نقطناه ،، إن شاء الله بنقطكم في مناسبات أكبر و أكبر ..

المهم ،، النق ،، شيء لا بد منه في الحياة الزوجية ،، لا تستطيع الخلاص منه ،، مهما حاولت ،، و مهما عملت ،، خلاص ،، هم هيك النسوان ياخي ،، النق درجات ..

إسمعوا هاي السالفة صحيح ،، مرة رحت عند واحد بينا و بينه شغل ،، كنا ثلاثة ،، أنا و شب ،، و الثالث إللي رحنا عنده ،، ففتحوا موضوع الزواج و كل واحد بحكي رأيه ،، أنا ما كان إلي شهر متزوج ،، و هم ما شاء الله متزوجين و عندهم أولاد ،، الخلاصة ،، الأخ ع.م سأل سؤال مهم :: لو رجع فيك التاريخ لقبل الزواج بيوم ،، بتتزوج ولا بتغير رايك ؟؟

لا أؤمن بالحظ ،، أعمالنا ،، و توافيق ربنا .. و على نياتكم ترزقون ..

الآية ( وَ كَانَ الْإِنْسَانُ عَجُولًا ) ،، راح تعرف معناها منيح بعد الزواج 😉 😉

و بحب أقوللكم ،، لا شيء يريح القلب أكثر من سماع قول الله – عز و جل – ( لا تدري لعل الله يحدث بعد ذالك أمراً ) ..

3948 Total Views 1 Views Today