طبعاً الواحد لما بقرأ عنوان الموضوع ،، بقول أووووووووه شو هالنعومة و الحنيّة هاي إللي عند حوّاء ،، بس أنا تركتلكم النعومة و الحنيّة كلها لإلكم و بدي أحكيلكم عن الجانب الجديد إللي اكتشتفه و سمعت عنه بعد الزواج !!

يعني ما في داعي أحكيلكم إن الموضوع من زمان ببالي و أنا دايماً باجي بدي أكتبه بس بقول بكرا و بكرا و بكرا إن شاء الله على خير ،، و هكذا ..

// الموقف الأول //

إللي خلاني أكتب الموضوع أسرع شوي هو الموقف إللي صار مع مشاعل الأسبوع الماضي لما كان عندها امتحان رخصة السواقة ..

طلعت المحروسة بالباص تبع البنات ،، (( للي ما عنده فكرة عن الموضوع ،، هون بطلعوا الناس بباص ،، و قدامهم الشرطة و سيارة الإمتحان ،، و كل شوي بنزل حدا و بسوق ،، و هكذا للما يخلص الباص إن شاء الله ))

المهم ،، طلعت مشاعل في الباص ،، نزلت البنت الأولى ،، نزلت البنت الثانية ،، الثالثة ،، الرابعة ،، الخامسة ،، السادسة .. ولكم ملينا !! متى بدك تنزلي يا مشاعل !!

بتصل عليها ،، إلا شو بتحكيلي :: قال البنات عم بتخانقوا هون و إجت وحدة منهم سكرت الباب و قالت / والله ما حدا بنزل قبلي / و قلبت غريندايزر على الباب ..

شت !! تبا لك !!

وين قاعدين نحن !! باص أبوكي هو !!

وين الأنوثة يا شيخة ؟؟

===========================

// الموقف الثاني //

شوفوا الفيديو هذا ،، و أعتقد واضحة يعني !!

https://instagram.com/p/2QHejoSXSQ/?taken-by=t9mum

عادي يعني كلها إلا هو فستان !! الحمدلله على نعمة الشباب ،، لما يلاقي حدا لابس نفسه ،، بسلم عليه و بصيروا أصحاب و بتصوروا مع بعض !!

===========================

// الموقف الثالث //

هذا الموقف سريع شوي ،، كنت من فترة مع مشاعل بالمارينا مول ،، صار وقت الصلاة ،، دخلنا نصلي ،، لما طلعت ،، بسأل مشاعل و بقولها شو ما تأخرتوا بشوف ،، بتقولي مهو كل وحدة بتصلي لحالها ،، قلتلها ليش يعني ما في صلاة جماعة عند النسوان ؟؟ قالتلي و بدك النسوان يتفقوا على وحدة تكون الإمام بينهم !!

وين تراصوا و اعتدلوا و ساووا الصفوف ؟؟

ولا ما عندكم هاي الشغلات ؟؟

===========================

// الموقف الرابع //

هذا صار معاي أنا شخصياً من كم يوم في الدوام ،، نحن نقلنا على منطقة أرض المعارض ،، و أصنصير البناية : زلخرا والله !!

البناية فيها 6 أصنصيرات ،، و برمجتهم واضح إنها كثير زبالة !! كثير كثير زبالة !! الحمدلله على كل حال ..

المهم ،، كبست على الأصنصير ،، وصل الأصنصير ،، فتح باب الأصنصير ،، بدي أفوت على الأصنصير ،، لقيت بوكس !! بوكس في وجهي !! بوكس في وجهي طالع من الأصنصير !!

إلا هي بنت مادة إيدها بوكس و حاملة شنطتها عشان ما حدا يقرب عليها !!

بوكس يا شيخة !! أصنصير هذا ولا حلبة ملاكمة !!

المهم ،، إجيت بدي أدخل على الأصنصير ،، إلا هي بتحكي / معلش بس بتضايقني و المكان ضيق !!

طبعاً أسامة ما بيقدر يسكت هيك ! طرقتها : نسيت إن الأصنصير من أملاك أبوكي و أنا مش عارف !!

طبعاً ما بصير الموقف يمر هيك ،، بعد أسبوع إجا مديري بحكيلي إنت عامل هيك هيك هيك هيك هيك ،، قلتله عندك مشكلة ؟ قالي مش هيك بس البنت انحرجت قدام الموظفين !!

أوه ياه !! سيريَسلي ؟؟ شي فيلت إمباريسد !! سيري زئي !!

===========================

// الموقف الخامس //

إنتوا بدكم تشاركونا فيها !! عادي يعني والله ما بزعل !! اكتبوا الموقف بالتعليق ،، و خلينا نشوف شو عندكم !!

===========================

و طبعاً بحب أذكركم بأغنية :: البنات البنات ،، ألطف الكائنات ،، غنّوا يا إخوتي ،، تا فا تي في تا تي تا ..

على فكرة ،، يعني هو أنا ما حكيت كل المواقف ،، ولا حتى ربعهم ،، بس قلت أشارككم في كم موقف خفيف و أترك الباقي لإلكم ،، طبعاً و هذا بس عم نحكي عن النعومة ،، بعدنا ما دخلنا في الأمور الثانية !!

للحديث بقية ..

صحيح ،، شو رأيكم بتعديلات المدونة ؟ عندكم إقتراحات جديدة يعني لو سمحتوا ؟ ولا كمان ما بتعرفوا تقترحوا ؟

و السلام عليكم و رحمة الله و بركاته

3149 Total Views 1 Views Today