الحمدلله وصلنا أمريكا اليوم ،، بعد رحلة طويلة !! من ٥ ساعات قبل الرحلة في أبوظبي ،، لـ ١٦ ساعة في الطيارة ،، لساعتين لوصلنا ع البيت في إرفاين ،، يمكن هاي كنت أكثر رحلة حاب أسافرها من كثر ما الشعب ظل يحكيلي أمريكا و أمريكا ،، و أسامة إنت بتعجبك أمريكا ،، و أسامة إنت على جوّك و مزاجك يبالك تسير أمريكا ..

قمنا الحمدلله قدمنا ع الفيزا و حجزنا و هينا وصلنا ..

راح أحاول خلال هاي الرحلة إني أنزل التدوينة بشكل يومي .. زي أيام رحلة المغرب .. إللي عاجبه عاجبه ،، و إللي مش عاجبه يحكي ،، عشان ما أظل أبعثله إيميلات بعد كل تدوينة ☺️☺️

طيب ،، طبعاً شو بدي أحكيلكم لأحكيلكم << بلشنا دراما ☺️☺️

طيب ،، يوم السفر في أبوظبي ،، داومت الصبح و شردت و قلتله لمديري رايح أضب كراكيبي ..

الحمدلله ،، روّحت ،، و تغديت ،، و طلعت مع الشباب ،، و رجعت ،، و رجعت طلعت مع المدام ،، و رجعنا ع البيت ..

الساعة صارت 10:30 الليل ،، و الشنط بعدهم فوق الخزانات .. استحوا على حالكم و قوموا ضبوا كراكيبكم ..

مشاعل بتحكيلي قوم ضب أغراضك ،، بحكيلها أنا عشر دقايق و بكون مرتب كل شي إن شاء الله ،، قومي إنتي ،، يلا شوي و بقوم ..

رتبنا الكراكيب و كله تمام و بقيت مستيقظاً << عجبتكم مستيقظاً ؟؟

المهم ،، صلينا الفجر ،، اتصلنا ع التاكسي ،، و مراكضة الله وكيلكم ،، التاكسي وصل بدقيقتين !! قلتله خليك ناطر ☺️☺️

المهم ،، طلعنا في التاكسي و وصلنا المطار الحمدلله و خلصنا الشنط ..

وصلنا عند الجوازات ،، الساعة 6 تقريباً ،، الموظف بسألنا لوين رايحين ،، بنقوله أمريكا إن شاء الله .. رحلة الساعة 9 ،، بقوللنا / يا ريّال تو الناس وايد ياي من وقت .. خخخخخخخخخخ ..

قلتله ياخي قالولنا إجراءات الجوازات الأمريكية دايماً زحمة و بتتأخر ..

المهم الزلمة قاللنا / مرافق خير و درب السلامة إن شاء الله ..

لا و نحن مستعجلين و رايحين مستعجلين ع الجوازات الأمريكية .. بس وصلنا ،، لقينا شرطيين إثنين بمشوا ورانا ،، بس شافوني شفت المدخل بعده مسكر ،، قالولي / يا ريّال نحن شفناك مستعيل بس ما حبينا نعطلك يعني ،، بس بعده قسم الجوازات الأمريكية بيفتح بعد ساعة ،، تباً ..

اعمل نفسك ميت ،، اعمل نفسك ميت ..

زي إللي أول مرة بسافر ههههههههههههههههههههههههههه

المهم عملنا لفة في المطار و طلعنا ع الطيارة و سافرنا الحمدلله ..

الرحلة كانت طويلة نسبياً ،، يعني ١٦ ساعة الحمدلله ..

نوم أكل تلفزيون تلفون و بالبجاما و ستريت فايتر كمان !! و عشان أستغل الوقت ،، كتبت هذا الكلام بالطيارة .. >> Time Management ..

المهم ،، كالعادة قبل ما يطلع الواحد من البيت ،، بكون متأكد إنه ناسي شي ،، المشكلة مش هون ،، المشكلة لما يتذكر بوقت كثير متأخر !! بعد ما يكون صارله 12 ساعة بالطيارة ..

أوكي لا تقرفوا كثير ،، بس نسيت الشطاف المتحرك خخخخخخخخخخخخخخ .. و أنا إللي دلّيت الشعب عليه ،، و نسيته .. هيييييييييه يالدنيا ..

وين أذنك يا جحا ؟؟

اللهم ارزقنا غطسة فيه يا رب 😀

Hello California 🙂 🙂

هبطنا بالمطار ،، و شو بدي أحكيلكم ..

الحمدلله على نعمة مطار أبوظبي .. بسواهن كلهم ☺️☺️

العربايات إيجار ،، خمسة دولار ! أو بتلاقيلك وحدة فالتة ! بس تطلع من المطار ،، على كثر الناس و الزحمة و الزمامير ،، بتفكر حالك في شارع من شوارع القاهرة !

إدفع عشان عرباية الشنط !!

هنا القاهرة

مرحبا ،، نحن مروان تلودي !!

رحنا تنوخذ السيارة ،، أخذناها و أخذنا معاها نافيجيشن ،، و أخت النافيجيشن شو بهدلنا !! تأخرنا ساعة و شوي عشان نلاقي البيت ..

حطينا أغراضنا ،، و ع السريع طلعناعلى / إيرفاين سبيكترم / نروح نشوف محلات الموبايلات ..

المهم ،، في أبوظبي ،، لما يكون في ممر مشاة ،، بنلاقي مطب صغير و إضاءة و إشارات و حركات ،، هون منيح ما تخانقنا مع واحد عشان كان بدو يمر و ما شفناه .. يعني بدون شي الدنيا ليل ،، و هو أسمر !! يعني كيف أشوفك بالله !!

و أخيراً الحمدلله أخذنا أرقام أمريكية ☺️☺️

كملنالفة في السبيكرتم ،،

وصلنا البيت الحمدلله ،، و نمنا ” طب ” << بفتح الطاء ،، ورانا يوم طويل بكرا ،، إن شاء الله على خير ،، بكرا رايحين على ” يونيفيرسال ستوديوز ” ،، ياه بيبي ياه ..

============

المهم ،، بعرف تأخرت كثير في تنزيل الموضوع ،، بس يلا ،، منيح إني بدأت فيهم ،، يوم ورا يوم 😀 😀

============

و السلام عليكم و رحمة الله و بركاته

============

ملاحظة // هذا الموضوع انكتب و انتشر متأخر 🙂 🙂

و الأيام الثانية راح أنزلها كألبوم صور ،، هيك بكون أسهل و ما بتأخر عليكم فيها 🙂

1053 Total Views 3 Views Today