كم مرة قرأتوا هاي الآية في القرآن الكريم ؟ ولا من كثرتهم ما بتتذكروا ؟ المهم ،، أنا بدي أحكيلكم عن هاي الآية و عن كثير مواقف في حياتنا بنعيشها و مرات بنتعمد نكون قليلين أدب فيها !! طبعاً هذا مش موضوع ديني ،، إعتبروه أخلاقي لا أكثر ..

المشهد الأول // ياخي أسامة ،، بدي أروح أشتري هذيك الساعة إللي شفناها المرة الماضية بالمارينا مول ..

أسامة :: لا ياخي قبيحة مش حلوة ،، و غالية ع الفاضية ،، و شكلها زبالة ،، و أصلاً حتى لونها لون بنّاتي ،، مش لواحد حيط نفسك !!

المشهد الثاني // ياخي أسامة ،، رحت أمس و اشتريت الساعة إللي شفناها المرة الماضية بالمارينا مول ..

أسامة :: يلا مبروك مبروك و تهريها بالعافية إن شاء الله ،، عاد خلينا نشوفك لابسها ،، مش بس تشتريها و ترميها بالخزانة 😀 😀

عرفتوا وين الفرق ؟

ياخي إذا صاحبك رايح يشتري شغلة ،، و إنت مش عاجبيتك ،، يا تنصحه ،، يا تسد بوزك و تخرس ..

ياخي إذا صاحبك اشترى شغلة و مش عاجبتك ،، يا تحكيله / مبروك / ،، يا تسد بوزك و تخرس ..

طبعاً لاحظوا معاي إن / يا تسد بوزك و تخرس / مشتركة في الحالتين هههههههههههههههههههه

======================

لما كنا صغار ،، كان أبوي يجيبلنا كثير شغلات من برّا الحمدلله ،، طبعاً من باب شوفة الحال ،، أروح أداوم فيهم ولا هم أصلاً يكونوا أغراض للمدرسة ،، يعني شنطة ولا حذاء رياضة ولا ساعة ..

أطلع و أقول لنفسي ،، ياخي شوف هذا عنده شنطة عادية و أنا عندي شنطة أديداس ،، أنا أحسن منه ..

مع العمر ،، الشخص بكتشف شغلات جديدة ،، يعني مثلاً إللي أبوه ميّت و إللي ظروف شغل أبوه أو أمه ما بتسمحلهم يجيبوا شغلات جديدة و هكذا ..

طبعاً لاحظوا معاي إن / الشخص بكتشف شغلات جديدة / الشخص ،، مش الحمار !!

======================

ياخي في ناس بكون بدها تشتري سيارة جديدة ،، بتلاقي مثلاً مثلاً مثلاً حاطة ميزانية للسيارة تكون 100 ألف درهم ،، يعني على أساس بدفعوا 20 ألف دفعة أولى ،، و الـ 80 ألف الباقية بدفعوها أقساط ..

بس يطلّع السيارة من الوكالة ،، بكون قاعد مع الشباب و بيجي واحد بحكيله :: طيب ياخي كنت زدت كمان 30 ألف و طلعت رقم واحد بكون فيها مواصفات أكثر ..

ياخي يا تجيب الـ 30 ألف من عندك ،، يا تسد بوزك و تخرس !! أنا هاي إمكانياتي و تعبان في الفلوس و مجمعهم و مبسوط في السيارة ..

ياخي إذا الـ 30 ألف مش فارقة معاك ،، غيرك بشتري سيارة بـ 30 ألف !!

طبعاً لاحظوا معاي إن / بكون قاعد مع الشباب / و مرات مع الحيوانات ..

======================

ياخي في حدا بحب يشتري تلفون آيفون ،، و حدا بحب تلفونات الأندرويد ،، مش لأن الأندرويد رخيص ولا سيء بكون صاحبه كمان رخيص و سيء << بس ياخي تلفونات الأندرويد مش حلوة لوووووووووووووووووووووووووووووووووول بمزح بمزح ..

يعدين ياخي صحيح عادي أنا ممكن أنبسط في شغلة سعرها 10 دراهم ،، و ممكن أنبسط في شغلة سعرها 100 درهم ..

و بنفس الوقت ممكن ما أنبسط في شغلة سعرها 10 دارهم ،، و ممكن ما أنبسط في شغلة سعرها 1000 درهم ..

هذا لا يعني إن إلك حق تفتي في شغلة ما إلك خص فيها ..

طبعاً لاحظوا معاي إن / أحمد شوبير / قال مرّة :: إنت مالك إنت ؟ إنت مال أمك إنت ؟

======================

الخلاصة ،، ربنا بقول بسورة الأعراف (الآية 85) ::

{.. ولا تَبْخَسُوا النَّاسَ أَشْيَاءهُمْ ..}

و البخس في اللغة هو الإنقاص على سبيل الظلم و التعييب ..

و بعد القراءة عن الموضوع ،، تكتشف إن البخس في منه أنواع ،، فهو يشمل أيضاً بخس الحق و بخس المال و بخس العلم و بخس الفضل ..

يعني مش تنكر حق حد ولا تبخسه ،، سواءً حق الله – عز و جل – علينا ولا حق الوالدين ولا حق أي شي ،، ولا تسرق من مال حدا ،، ولا تقلل من علم شخص ،، و لا فضل أي إنسان عليك ،، ولا تقلل من جهد حدا حاول يعمل شي ..

======================

المهم ،، تأدبوا يا بشر ..

طبعاً لاحظوا معاي إني حكيت / يا بشر / و كل واحد حر وين يصنّف نفسه ..

فـ الله يخليكم فكونا من شغل النفسيات هذا و الله يرحم جدك إنت و إياه إللي كان يفكرة المرتديلا لزقة ظهر !!

أين أشيائي ؟

======================

بعيداً عن الموضوع ،، من كم شهر نزلت موضوع سفرة أمريكا / صوب دار أوباما ودّوني ،، 01 .. / و ما كملت باقي الأيام ،، ببقى بنزل الصور كلهم في موضوع ثاني إن شاء الله ..

و السلام عليكم و رحمة الله و بركاته ..

923 Total Views 6 Views Today