خلاصة الرحلة

الحمد لله ،، رجعنا بالسلامة لأرض الإمارات بعد رحلة استمرت أسبوع في رباط المملكة المغربية ،، كانت من أجمل الرحلات إللي طلعتها و انبسطت فيها ،، هذا الموضوع راح يكون خاص في بعض الأمور إللي يمكن ما تكلمت عنها في يوميات الرحلة ،، و فيه بعض الملاحظات عن الرحلة ،، إيجابية و سلبية ..

^

^

النقطة الأولى // الرفقة !!


شيء مهم في كل رحلة الشخص حاب يروحها هو الرفقة إللي معاها ،، بالنسبة لرحلة المغرب ،، كانت رفقة رائعة بصراحة مع ” أ-ب-ت ” و رشيد ،، نعم الأخوين و الصديقين والله ،، كان في كثير مواقف حلوة بصراحة جمعتنا مع بعض و خلتنا نتعرف على بعض أكثر ،، كنا بنعرف بعض هون ،، بس إذا بدك تجرب صديقك >> اختبره بالسفر ،، و الحمد لله ،، ما قصروا الشباب والله ،، نعم المراجل ،، و مثل ما كان يقول أخونا رشيد ،، يوم بتحارب : حارب بسيفك

^

^

النقطة الثانية // الحاجة !!


لو بتتذكروا ،، في آخر فقرة في موضوع اليوم الخامس من الرحلة ،، ذكرتكم بالجملة تبعت :: لو كان الفقر رجلاً لقتلته :: بتعدد طرق الحصول على المادة من المغرب ،، شفت عينات و أصناف متنوعة ،، أضافت كثير إلى الرصيد الفكري الموجود عندي ،، أكثر مما كنت متوقع من الرحلة ،،

إحدى المرات دار هذا الحوار بيني و بين مديرة المنزل حوار عن سمعة ” المغربيات ” ،، فكانت عم تحكيلي عن عينات مرت عليها ،، منهم بنات حملة ماجستير ،، بتقولي أسامة هدول ما عندهم فلوس و أهلهم ما بعطوهم ،، ما بلاقوا غير هذا الشغل عشان يجيبوا فلوس الدراسة !! كل وحدة إللي أبوها مطلق أمها أو متوفيين و ساكنة عند صاحبيتها !! يعني حتى حملة الشهادات مو لاقيين شغل بالمغرب ،، و هذا الشي كمان حتى عند الشباب ،، يعني شفت واحد من الشباب دارس تجارة ،، بشتغل DJ ،، فلما سألته شو إللي وداك على هذا الشغل ،، قالي بصراحة ” المادة ” ،، أنا قعدت أدور على شغل و ما لقيت ،، و محتاج فلوس عشان أقدر أعيش ،، قالي حتى مرة حاولت أشتغل بماكدونالدز ،، كانوا يعطوني 8 دراهم مغربية (( حوالي 4 دراهم إماراتية )) في الساعة ،، يعني كان يطلعلي حوالي 100 دولار في الشهر ،، قالي ما كانوا يكفوا لشي !! حتى مواصلات و أكل ما كانوا يكفوا !!

حتى موقف الشرطي في المطار في اليوم الأول يوم طلب الشرطي فلوس مني !! و يوم أنا مروح كمان صار نفس الموقف ،، ما ذكرته بس صارت خناقة في المطار ،، بس الشرطي بالأخير سألني: معاك عملة !! يعني عيني عينك المسألة !! مهما وصلت درجة السؤال عند الناس ،، بس مستحيل الواحد يوصلها لهاي الدرجة ،، يعني بضل في كرامة عند الناس شوي يا جماعة الخير ،، يعني في معادلة صعبة بين ” الحياة الكريمة ” و ” الحاجة ” !!

مرة كنا في ميغا مول ،، إجا الـSecurity و سلم على أ-ب-ت و قاله :: طال عمرك بس والله الحياة صعبة و محتاج و و و و !!!!!!!!!! يعني الواحد كيف بدو يتصرف في هاي المواقف يا إخواني ؟؟

يعني طول عمرنا بنعرف إن المحتاج عنده كرامة و بحافظ عليها و ما بظل يسأل من الناس !! بس إللي شفته ” مختلف ” بالمرة عن إللي بعرفه و حتى عن إللي شفته في دول ثانية !!

^

^

النقطة الثالثة // الهجرة الداخلية !!


المغرب بلد فلاحي ،، يعني دولة قائمة بالأصل على الفلاحة و الزراعة ،، بس إحدى المشاكل الموجودة الحين هي هجرة الفلاحين إلى المدن بحثاً عن أي سبيل للحياة !! مهما يكون هذا العمل !!! المهم يعيش ،، و هذا مسبب أزمة و إرتفاع بمستوى الجريمة ،، هدول لو في تسهيلات من الحكونة لإلهم كانوا ضلوا بأراضيهم و حافظوا على مهنهم و عملهم في الأرض ،، خسارة كل هاي الأرض الخضراء حالتها هيك !! المفروض يكون في طرق للحد من هاي الهجرة ،، خلي أهل الأرض بالأرض و أهل المدينة بالمدينة ،، و بنفس الوقت إخلق فرص عمل بالأراضي بدل نسبة الباطلة الموجودة !!

^

^

النقطة الرابعة // الحسن و الحسين !!


الملك حسين بن طلال – رحمه الله – ،، و الملك – الحسن الثاني – رحمه الله – ،، اكتشفت إن كان في بينهم علاقات دبلوماسية وطيدة جداً ،، تعلمت معلومات جديدة في هاي الأمور و في تاريخ العلاقة بينهم و التعاون إللي كان بينهم عملتلي UPDATE لمعلوماتنا التاريخية و السياسية بالمنطقة ،، شكراً لأخونا  ” هتلر ” على هذه الدروس ،، و على نقاشه بموضوع // لماذا أخرج أفلاطون الفلسفة إلى العامة ؟ //

^

^

النقطة الخامسة // كل شي حولي يذكرني بشي !!


بدي أرجع على المغرب ،، والله ارتحت كثير الحمد لله بهاي الإجازة ،، من أول يوم ،، بتحس إن في شي بجذبك و بصير يخليك ما بدك تروح ،، يعني شو بدكم أكثر من إني أأجل السفر 3 مرات !! و لو بإيدي كنت قعدت أكثر ،، بس ما باليد حيلة ،، كل ما أشوف شي >> بتذكر في المغرب !! كثير أشياء بتخليك توصل لمرحلة ” سارح عقله ولا يدري ”

كل شي كل شي كل شي ،، إن شاء الله يا رب نرجع نزورها مرة ثانية // صح يا ” أ-ب-ت ” ؟؟

قـتـــــــــــــــــــــــــــلتني في الصــــــــميم

و السلام عليكم و رحمة الله و بركاته

910 Total Views 2 Views Today