يقال دائماً في الكثير من الثقافات أن الرقم 13 رقم نحس ! الغريب إني متفائل جداً في هذا الرقم ،، و في هاي المرحلة من حياتي تحديداً ،، بس تأكدوا إني ما اخترته لأنه نحس ،، و لا لأنه يعني الموت ،، بل سبب آخر ،، سبب جداً مهم ..

أول شي ،، السلام عليكم و رحمة الله و بركاته ،، كيف حالكم ؟ إن شاء الله تكونوا بعدكم بتتذكروني ،، أنا أسامة ،، أسامة بن زيد – حفظه الله و رعاه ،، و قدّس الله سره ،، و أخرجه من السرداب ..

المهم ،، اليوم عيد ميلادي الـ 32 الحمدلله ،، و هاي أكيد كانت مناسبة جداً سعيدة عليّ ،، الأسعد و الأجمل بالموضوع إنها صادفت مرور 13 شهر بالضبط على تفنيشي من وظيفتي القديمة :: Senior IT Application Consultant في إحدى الشركات الوطنية في أبوظبي.

حدث المفروض إنه يكون مهم بحياتي ،، و يكاد يكون: أحلى حدث صارلي خلال العشر سنين الأخيرة ،، يعني مبسوط فيه أكثر من حصولي على شهادة الماجستير و أكثر من زواجي 😀 😀 😀 شو بدكم أكثر من هيك كمان ..

تاريخ 31-08-2016 ،، بتتذكروا شي بهذا التاريخ ؟ غير ذكرى وفاة الأميرة ديانا و صاحبها دودي الفايد ؟ 😛 😛

قبل هذا التاريخ ،، خليني أحكيلكم شغلة ،، أنا كنت أداوم في نفس الشركة من تاريخ 02-01-2008 ،، و ولا مرة بحياتي إتصلت بمديري إذا كان بإجازة ،، هو كان يتصل كل كم يوم  يتطمن إذا في مشاكل ،، أو يحكيلي إن فلان حكى معاي عشان أخلصله شغلته بسرعة ..

أما أنا ،، فكنت ماشي على المبدأ إللي ربّاني عليه أبوي ،، و إللي هو كلمة وحدة فقط : تصرف ..

فكنت أتصرف و أتحمل نتيجة قراراتي في الدوام – و دايماً قدها الحمدلله 🙂

المهم ،، في تاريخ 31-08-2016 إتصلت على مديري لأول مرة في إجازته ..

أسامة :: السلام عليكم و رحمة الله و بركاته ..

مديري :: أسامة ،، صاير شي ؟؟

أسامة :: لا والله ما في شي مهم ..

مديري :: صارلي 8 سنين ما إتصلت علي و أنا بإجازة ،، الله يستر ..

أسامة :: لا والله ،، بس حلمت إني تفنشت ..

مديري :: ههههههههههههههه لا ما عليك الحمدلله ما في هيك شي بالمرة !!

أسامة :: يا سيدي هذا يللي صار ،، استمتع بإجازتك ،، و بنتلاقي بعدين إن شاء الله ،، مع السلامة ..

تاريخ 04-09-2017 ،، بتتصل عليّ وحدة و بتقولي :: أسامة في حدا عم بنبش وراك و ناوي عليك ..

تاريخ 05-09-2017 ،، قاعد الصبح مع الخل الوفي ( ريان أبو الحسن ) و بقوله إن فلانة حكت معاي مبيرح و بتحكيلي إن في حدا عم بنبش وراي ،، شكله تفنيشتي مش مطولة ..

بعدها بساعة و نص تقريباً ،، بطلبوني قسم الموارد البشرية ،، 5 ساعات و 30 دقيقة ،، و بالأخير :: بنتلاقى بكرا الصبح إن شاء الله ..

تاريخ 06-09-2017 ،، الموارد البشرية بقدمولي ورقة إقالتي ،، بس منيح إن الـCEO سمّاني يومها :: A Leader ..

فخور في نفسي ..

طبعاً روّحت على البيت بسعادة جداً كبيرة الحمدلله و قاعد بضحك ،، شفت زوجتي مشاعل العنزي لما دخلت البيت و قلتلها ::

تسمعيها منّي الحين أحسن مما تسمعيها من غيري بعدين ،، أنا اليوم تفنّشت الحمدلله ..

طبعاً أنا قاعد بحكي هيك ،، و بضحك و الحمدلله الحمدلله الحمدلله الحمدلله الحمدلله من أروع الأحاسيس إللي عشتها بحياتي ..

الجميل في الموضوع إني – و الحمدلله تعالى – كنت قبلها بفترة فعلاً عم بحضّر إني أستقيل ،، يعني حجزت الإسم التجاري لمشروع جديد كنت ناوي أعمله ،، و بلغت بعض الزملاء إني ناوي أترك على شهر أبريل 2017 إن شاء الله ( على أساس بعد الـ Bonus يعني إن شاء الله ) ،، و لما شفت الأمور سيئة بالدوام ،، قلتلهم يجهزولي بديل على أول السنة لأني مستقيل ،، اللهم إنهم عطوني إياها فجأة قبل التاريخ إللي كنت محضرله 😀 😀

المهم ،، قبل ما أحكيلكم عن مشروعي الجديد إن شاء الله على خير ،، تعالوا أحكيلكم بعض الدروس المستفادة خلال الـ 13 شهر إللي مروا ،، إللي أضافوا كثير نقاط على الـ 32 سنة من عمري 🙂 🙂

و بما إنهم 13 شهر ،، ما في أفضل من إني أخليهم 13 درس ..

1 – الواطي بظل طول عمره واطي

طبعاً هاي بحب أحكيها لكثير من البقر إللي كانوا حواليي ،، فعلاً أنا مش عارف كيف كنت مرابعكم ،، مش مشكلة ،، المهم إني كنت برعاكم 🙂

2 – عند الشدائد تظهر معادن الرجال

الحمدلله يا رب ،، و بشهادة ناس كانوا موجودين في قسم الموارد البشرية هذاك اليوم ،، أسامة كان قوي ،، و دافع عن ناس ما بتستاهل 🙂

3 – لا يوجد شخص كفو لمنافستي

هاي كانت من أهم الدروس إللي استفدتها من إقالتي ،، الحمدلله كل إللي بشوفهم يا واطيين يا موطيين راسهم ..

4 – قل الحق ،، و لو على نفسك

طبعاً ما في داعي لذكر أشخاص أو أسماء حفاظاً على أخلاقنا و أدبنا ،، بس خلي عندكم شوي شجاعة تعرفوا الحق مع مين ..

5 – في ناس فعلاً بتمشيهم زوجاتهم

و مش بس هيك ،، ما بمونوا عليها !! يعني أهلنا ربونا و علمونا من و نحن صغار إن // الرجال ما في بأشطاط و أنطاط // و كمان علمونا لما عندنا شي ،، نحكيه من زلمة لزلمة ،، عيب إني أحكي معاك عشان أحكيلك ضب مرتك ولا زوجتك ،، و تحكيلي :: أنا ما إلي خص ،، زوجتك هاي ،، إذا إنت ما بتمون عليها ،، استريح ،، نحن بنخرسك و بنخرسها ..

6 – كل يعوّد لأصل جده و مرباه (خالد الفيصل)

راعي الشرف يشرف و الأنذال يهبون .. ما بقدر ألومك إنت ولا إنت ولا إنتي ولا هو ولا هي على تصرفاتكم ،، مش ذنبكم لحالكم ،، إنتوا هيك تربيتوا ،، و هيك الحياة طلعتكم ،، عشان هيك أنا ما بحزن منكم ،، أنا بس بشفق عليكم 🙂

7 – يا الله شو في ناس بتكرهني

خذوا راحتكم ،، أنا أصلاً لا أراكم ..

تخيلوا لدرجة إن في ناس قالوها بوجهي :: يلا أحسن إنك تفنشت عشان نبطّل نحتار نسلم عليك ولا على فلان الفلاني !!

يا رباه ،، لهالدرجة كنتوا تكرهوا السلام عليّ يعني ..

So Many People To Hate Around Here But Such Little Time ..

– السلام عليك يا رسول الله –

8 – اذكروا الناس بالخير

مهما كانت المواقف ،، و الخلافات ،، و الأحقاد ،، و التربية ،، و الأخلاق إذا كانت عندكم ،، لا تنسى إنك طين حقير !!

9 – الجمايل

كان الوالد – حفظه الله و رعاه – ،، لما ننزل على الأردن إجازة ،، يرد كثير عزايم ناس و يرفض إنه يقبلها ،، و لأن / هذا الشبل من ذاك الأسد / سألته مرة عن السبب ،، و قالي:

لقمة الرجال على الرجال دين ،، و على المساكين صدقة ..

و بحكم إن أبوي كمان في الإمارات أيامها ،، و يلا يلا ينزل إجازة ،، كان يخاف إن ما يفضى يرد هذا الدّين ،، فكان أصلاً ما يعطي مجال إن يكون مديون لحد ..

و الحمدلله ،، ما حدا إله عليّ جميلة ،، و الجميلة ردينها بعشرة ،، إذا مش أكثر ..

تخسي و تعقب إنت و لا إنت ولا إنتوا ولا إنتي ولا أنتم ولا أنتن يكون علينا منكم جميلة وحدة حتى !!

آه و مو بس هيك صحيح ،، نحن ما بننسى ،، بنطنش ،، بنمشّي ،، بس ما بننسى ،، و بنعرف كيف نرد ،، حتى لو بعد سنة ،، بعد 365 يوم ..

10 – تـــرفّـــع

كنت ،، و ما زلت ،، و سأظل ،، ألتزم في الترفع عن كثير من التفاهات و السخافات إللي كنت محاط فيها ..

ربنا كرّمنا و أعطانا إسم ثقيل / أسامة بن زيد / و إن شاء الله نتعلم منه ..

11 – الصمت

لا تعلق على فلان ،، لا تبدي رأيك بالموقف الفلاني ،، لا تسولف عن الحركة الفلانية ،، الصمت جميل و مفيد جداً و هو الشي الوحيد إللي بفيدك و إللي ما بيعطي مجال لأي شخص آخر إن يفهمك ..

12 – احذر ولا تشتط تندم

الحذر ثم الحذر ثم الحذر من الأشكال إللي بتمثل إنها بدها مصلحتك ،، و هي فعلاً بدها شغلتين :: مصلحتها ،، و مصلحتها ..

13 – الصبر عند العرب طاعة

جربت الكثير من الحلول في حياتي ،، لكنني لم أجد مثل الصبر ..

و هكذا نكون قد انتهينا من الـ 13 درس ،، إللي أتمنى إنكم تستفيدوا منهم ،، أو على الأقل تتذكروا نفسكم و إنتوا سواءً كنتم كبار أو صغار ،، بالفعل مش بالعمر ..

في درس غير الـ 13 درس إللي فوق ،، أو اعتبروها حكمة ،، ما في داعي طبعاً أشرحها كثير ،، لحالكم ” خذوا العبرة ” منها ،، قرأتها من كم سنة على تويتر ،، و صرت استخدمها كثير في حياتي ::

و على فكرة ،، يعني والله حفاظاً على بعض ” الود ” و عملاً بـ ” الأخلاق ” إللي نشأنا عليها ،، ما ذكرت لا أسماء ولا مواقف محددة و تصرفات سواءً دون المستوى أو دون الإحترام أصلاً ..

و الحمدلله رب العالمين ،، حمداً كثيراً طيباً مباركاً فيه ،، يليق بجلال وجهه و عظيم سلطانه ،، و الصلاة و السلام على أشرف الخلق و المرسلين ،، سيدنا محمد – عليه الصلاة و السلام – و على آله و صحبه أجمعين ..

نبدأ ..

المهم ،، قررت ،، و بدعم من مجموعة من الأشخاص المحترمين ،، و قبلهم دعم و توفيق من رب العالمين إن شاء الله ،، تأسيس شركة :: عونك ليموزين و كونسيرج ..

الشركة كنت ناوي أكتبلكم عنها هون ،، بس بتهيألي الموضوع صار طويل ،، و بكفيكم لليوم ،، أعطوني بس كم يوم و أكتبلكم موضوع جديد إن شاء الله على خير عن الشركة لحالها و شو نشاطاتنا و شو بنشتغل فيها ..

و كمان صحيح في شغلة قبل ما أنهي الموضوع ،، بدل ما أظل دايماً أبعثلكم إيميلات بعد كل موضوع جديد ،، ترى عادي والله بحط اللينك في تويتر و خلاص ،، إلا إذا حابين أظل أبعثلكم إيميل بعد كل تدوينة ،، أو هل في أي حدا عنده اقتراحات أفضل ؟؟

https://www.instagram.com/p/BFN2xSoOtpL/

و طبعاً كالعادة راح أظل أحكيلكم :: إن شاء الله راح أرجع أكتب في المدونة أكثر و أكثر ،، و إنتوا خليكم مصدقين 😀 😀

و السلام عليكم و رحمة الله و بركاته ..

789 Total Views 2 Views Today