مكس كمان مرة !!

يعني شو أعمل إذا ما طلع معاي عنوان غير هيك ؟؟ مكس و مكس و مكس و مكس ؟؟ بدنا نقضيها مكسات يعني ؟؟ بطلنا نقدر نكتب عن موضوع واحد يعني من كثر الأشياء إللي عم بتصير مع الواحد الحمد لله ،، ممممممممم يعني إذا مو جاي على بالك تكمل قراءة ،، مو مشكلة ،، بعطيك الزبدة << و خلي البقرة كلها عندك كمان !! المحفظة و ضاعت و السيارة و اندعمت و بطاقة البنك و رجعت علقت و إجتني هدية من بنات المدرسة كمان ،، و مر 732 يوم على أكثر يوم بضحك فيه بحياتي !! حاب تكمل قراءة ولا لأ ؟؟

هذا الموضوع و ما فيه إن بتاريخ 21-7-2008 كان نشوان جاي من السفر و هو كان مخلي سيارته عندي عشان أشغلها كل يومين ثلاثة ،، يوم وصوله طلعت بدي أغسل السيارة ،، قال يعني مو حلوة الشب ييجي من السفر و أرجعله سيارته و هي وسخة ،، نشوان كان جاي من مطار الشارقة و نزل بباص الغزال من الشارقة لأبوظبي ،، فأنا رحت ألاقيه بسيارته على أساس يعني إن هو برجع يوصلني و بظل مكمل على بيته ..

طلعنا من محطة الباصات و وصلني على البيت ،، قبل ما أنزل ،، عم بتأكد إن تلفوني و المفتاح و المحفظة معاي ،، لقيت التلفون و المفتاح ،، بس ما لقيت المحفظة !!!

:sha3ar: حــــــــــــــــــــــــــــــلاتها يا بعد جبدي :sha3ar:

رجعنا على محطة الباصات ،، عل و عسى نلاقيها ،، ما لقينا شي ،، دور دور دور دور منيح منيح منيح منيح في السيارة ،، ما طلع شي !! تحت الكرسي تحت دعسة البريك فوق فتحة السقف في المكتة ،، خلص ” المحفظة بح ” :7:

مرينا على الشرطيين إللي هناك ،، قال ما إجاهم شي ،، و قالولنا // روحوا قدموا بلاغ بمركز شرطة الشعبية ،، رحنا على شرطة الشعبية قالولنا من على الباب إن هون ما في تقديم بلاغات ،، روحوا بكرا الصبح على شرطة العاصمة ،، روحت على البيت الحمد لله ،، بشرت الوالد ،، و وقفت بطاقات البنك ،، و ثاني يوم رحت على شرطة العاصمة من الصبح و قالولي // ما إجانا شي ،، نحن بنبلغك لو وصلنا شي .. يعطيكم العافية :28:

حكيت مع البنك و قلتلهم هيك هيك هيك صار ،، قالولي بنطلعلك بطاقة جديدة و بتاخذ 4 أيام عشان تكون في الفرع ،، قلتلهم أوكي ،، و فعلاً ،، رحت يوم الأحد عشان آخذ البطاقة ،، أخذتها و سحبت فيها شوية فلوس الحمد لله ،، يوم الإثنين رحت بدي أطلع بدل فاقد لليسن الصبح ،، لقيت الدور زحمة ،، سحبت حالي و روحت ،، رجعت المساء و قالولي لازم صورة الجواز !!! ما كانت معاي ،، طنشت ،، و قلت بروح الثلاثاء إن شاء الله .. يوم الثلاثاء و أنا طالع باستراحة الغداء ،، بنزل للسيارة ،، بلاقيها مدعومة !!!!!!!! الحمار إللي كان قدامي (( أو يمكن الحمارة على ما أعتقد )) راجع علي ريوس (reverse) و داعملي السيارة من قدام !!!

ضربولي الدعامية

رحمتك يا رب ،، إتصلت على الشرطة ،، قالولي روح على مركز شرطة المدينة و قدم بلاغ ،، وصلتلهم قالولي بنكتبلك ورقة الحين و بكرا الصبح تراجعنا عشان نعطيك ورقة التصليح لأن الحين خلص وقت الدوام الرسمي (( هذا كله و أنا ما عندي ليسن ،، بس الحمد لله الشرطي طلع رقم ليسني من الكمبيوتر )) ،، طلعت من عندهم و رجعت على الدوام ،، قعدت شوي ،، و رجعت رحت على المرور عشان أطلع بدل الفاقد ،، كان معاي ساعتها 800 درهم ،، و كان لازمني كمان شوية فلوس ،، لأن بدل الفاقد بـ300 درهم ،، و كان علي مخالفة 500 درهم ،، و 30 درهم غرامات تأخير على المخالفة ،، فقلت بسحب فلوس من جهاز الـATM إللي عندهم ،، حطيت البطاقة – و ليتني ما حطيتها – ما رضيت تطلع الوسخة ،، يا الله ،، يعني أنا ما كان ناقصني غير هيك شي ،، والله بعدها جديدة يا ناس ،، حكيت مع البنك ،، قالولي ” أوتوماتيكلي ” بتتلف البطاقة و بنطلعلك وحدة جديدة و بدها 4 أيام ،، و المحترم تبع البنك قالي :: ” أرجوك حضرتك راعي إن يوم الخميس إجازة رسمية ” ،، قلتله :: ” ياخي والله بعدها جديدة و ما لحقت أتهنى فيها ” ،، قالي ” هيه كدة البروسيس حضرتك ” ،، رزعت الخط في وجهه و رحت على الكاونتر ،، طلعت بدل الفاقد الحمد لله و ما دفعت المخالفة ( مع الأيام إن شاء الله بتندفع ) :V:

اللسين الجديد

على فكرة ،، هذا الليسن مكتوب عليه من الخلف // بدل فاقد ،، :he3:
إللي قبليه كان مكتوب عليه // بدل تالف <<< خخخخخخخخخخخخخخخخخخخخ : انكسر معي !! :he3:

المهم ،، رحت ثاني يوم على الشرطة عشان يعطوني ورقة التصليح ،، لقيت هناك واحد من موظفين ضمان ،، كمان حدا داعمله سيارته يا حرام و هو صافها في الدوام !!!

طيب يعني إلى متى ظاهرة الدعم و الهروب المستمر ؟؟

:ooo:

=============================

موضوعنا الثاني في المكس هو ” جامعة الدكتور جاد ”

بتتذكروا دعاية // مع نــيــدو كــنــا ولاد صغــــار ،، مع نــيــدو صرنا كبــــار

يا جامعة الخير ،، المدرسة صارت كبيرة ،، و كبيرة كثير كمان ما شاء الله ،، صار فيها إلها فرعين ،، واحد بأبوظبي و واحد بالعين ،، غير المكتب الرئيسي كمان إللي في أبوظبي ،، و بدهم يخلوا الدوام ” شفتات ” ،، شفت من الساعة 8 الصبح للساعة 4 العصر ،، و الشفت الثاني من الساعة 4 العصر لغاية الساعة 12 بالليل << بعدين سندريلا بتفقد حذائها ههههههههههههههههههههههههههههههههههههههههههه

يعني مبيرح لقيت على السيارة مكتوب // ^^ شوفوا الصورة ^^ و علقوا على راحتكم :

Wash Me - مدرسة جاد

الظاهر إن البنات في عندهم مشكلة مع نظافة السيارة ،، مع إني غستلها من جديد ،، بس بسرعة توسخت الحمد لله ..

 

و على فكرة كمان ،، في بنتين من المدرسة ،، عفواً قصدي الجامعة :J: جابولي هدية ،، قصدي كيس هدايا ،، لحالكم شوفوه :

هدية من بنتين في الجامعة

طيب و الحل يعني ؟؟ شو أعمل بحالي أنا ؟؟

=============================

في 30-7-2006 ،، باختصار شديد ،، كان هذا اليوم أكثر يوم بضحك فيه بحياتي ،، لدرجة إن جسمي ” تجبس ” و ما قدرت أتحرك و كانوا راح يودوني على المستشفى من كثر الضحك ،، قبل 732 يوم في الأردن ،، كنت أنا و عبد الله جلاد و جميل و أنس الجيوسي ،، فعلاً كانت طلعة غير ،، و بعدني محتفظ بالورقة تبعت المطعم إللي أكلنا فيه قبل ما نروح على الكافيه ،، وحتى بالكلينكس إللي وقعنا عليها كلنا 🙂

بيتزا القيصر الصغير

الكليــــــــــــــنكس

🙂 والله كانت طلعة غير ،، يا رب تنعاد إن شاء الله 🙂

=============================

ممممممم ،، ما ظل شي ،، بكفي لحد هون ،، بس حيب أحطلكم هاي الصورة ،، الـBoard إللي عنا في القسم  و أعلام دول الموظفين  و كل واحد متى ناوي يوخذ إجازته .. و أخونا ريان راسم شعار ” شيكاجو بولز ” << موديل قديم ريان بصراحة

الأعلام ما عدا باكستان

إلى متى ظاهرة خربشة الموظفين على الألواح ؟؟

=============================

نقاط سريعة على البيعة:

1- قرار تعيين الوالد ” مدير للوحدة الطبية ” تم إعلانه رسمياً في النادي و الجرايد الحمد لله ..
2- زيشان ،، إللي شوي كان مسؤول عن بنات المدرسة ،، سافر ،، يروح و يرجع بالسلامة إن شاء الله ..
3- التخوت خلصنا تركيهم في غرفتي الحمد لله و أخيراً رجعت أنام على تختي ،، يعطيكم العافية يا رب حسن و يوسف 🙂 ..
4- يا جماعة الخير عندي إمتحان TOEFL بتاريخ 10-8-2008 عشان الماجستير إن شاء الله ،، حدا بقدر يساعدنا بشي ؟؟

=============================

و باليوناني بحكيلكم // كالي نيختا << تصبحوا على خير

2871 Total Views 1 Views Today