وطاة دار جدي الله يرحمه بالكرك

الوَطاة – بفتح الواو – مصطلح أردني و يعني ” الأرض المزروعة الغير مستوية ” ،، كان جدّي – الله يرحمه – بالكرك يحرث و يزرع فيها بعد ما يخلص من رعاية الغنم .. و منها استوحيت اسم مجموعة قصصية قصيرة قررت إني أدونها ،، عل و عسى حدا يستفيد من محصود الوطاة ..

الوطاة تجمع من بين القدْر إللي الشخص ببذل فيه بالأرض عشان يستفيدوا منها الناس و الأجيال القادمة ،، و الأجيال القادمة بتطلع بقر و خسارة فيها أصلاً الجهد إللي إنبذل ..

الوَطاة – بفتح الواو – هي من نسج أفكار و خيال أسامة بن زيد – حفظه الله و رعاه و قدّس الله سرّه – و لا تمت للواقع بصلة ،، و كل المواقف هاي من تأليفي و الأشخاص المذكورين مش موجودين بالحياة الواقعية و أنا بس عم بألف قصص و المواقف كلها خرافية و ما صارت و أي تشابه بالأسماء و الصفات و المواقف أنا أصلاً ما بعرف كيف صار !!

الإسم الوحيد المذكور صحيح في جميع القصص هو اسم :: أسامة بن زيد ..

القصة الأولى // مسكة الباب //

كنت أدور على شقق و بيوت لما إجيت بدي أتزوج – و لمرحلة معينة في حياتي – أموري ميسّرة الحمدلله ،، الموضوع ما أخذني أكثر من أسبوعين و حوالي 7 أو 8 شقق بس ..

بادر “زينغو ” و قالي :: يا خيّي تعال عنا على البناية بتصير تروح و تيجي مع “تونج” و بتتسلوا على الطريق و بنصير جيران ..

المهم ،، فكّوكّوا من كل السواليف إللي صارت من تاريخ 25-10-2014 لغاية 28-04-2017 .. إن شاء الله بنرجعلهم بقصص أُخرى ،، أُخرى من هيك ..

طلعنا من البيت و نقلت على بيت جديد الحمدلله الحمدلله الحمدلله الحمدلله على جميع النعم ،، و الحمدلله كانت ثالث شقة في جولة البحث عن بيت جديد 🙂

خذوا الجديد ،، الحمدلله أهلنا علمونا على النظافة ،، بس إجيت بدي أطلع سألت الناطور و المندوب إذا في شي مطلوب مني ؟ إذا بتحبوا أشيل ورق الحيطان ولا أخليه ؟ إذا و إذا و إذا ،، قالولي :: لا خليه أصلاً أحلى من الحيطة ..

نظفنا البيت و طلعنا منه الحمدلله و رحنا على البيت الجديد ،، المفروض يعني الحين إني أتصل على المؤجر القديم عشان يرجعلي الـ 2000 درهم التأمين ..

قلنا يلا الزلمة مش راح يطير ،، بس خليني أخلص أموري و أرتب الأغراض و الكراتين في البيت الجديد و بحكيه ..

إلا بشوف إتصال من المندوب تبع شركة الإيجار ::

عبد الملك :: ياخي والله أنا مستحي أحكي معاك بالموضوع بس والله الأستاذ زينغو قالي أتصل فيك و أحكيلك الموضوع و إنت بتعرف إني أعزك و أحترمك بس والله إني مجبور ..

أسامة :: شو فيه ؟ شو ماله الأستاذ زينغو ؟

عبد الملك :: قال لازم تشيل ورق الحيطان ..

أسامة :: طيب ما أنا سألتكم عنه و قلتولي خليه !! الحين غيرتوا رأيكم ؟؟

عبد الملك :: والله ياخي هو شافه و قالي أبلغك ،، و في شي ثاني كمان ..

أسامة :: الله يستر ،، قول قول يا عبد الملك ..

عبد الملك :: مسكة الباب لازم ترجع القديمة !!

(( طبعاً أنا أول يوم سكنت فيه في البيت ،، بدلت مسكة البيت القديمة و جبت وحدة جديدة تفتح الباب من الجهتين عشان ما تصير معاي مرة و أطلع من البيت و أنسى المفتاح و أنحبس برا البيت !! ))

أسامة :: بتحكي عن جد ولا بتمزح ؟؟

عبد الملك :: والله ياخي بتكلم جد ،، قال لازم ترجع المسكة الأصلية ..

أسامة :: المسكة الأصلية بدلتها أول يوم سكنت فيه و أعطيت القديمة للناطور ..

عبد الملك :: خلاص أنا بقول لمستر زينغو إنك كسرتها و جبت وحدة جديدة ..

أسامة :: قوله إني أعطيتها للناطور من أول يوم سكنت فيه !!

عبد الملك :: خلاص خلاص أوكي أنا بقوله كذا ..

مع السلامة ،، مع السلامة ..

مفكرين الموضوع وقف هون ؟ لا طبعاً ،، اصبروا و إنتوا تشوفوا ..

المهم ،، بعد فترة إتصلت على المكتب أسألهم عن التأمين ،، بقولولي لسه لسه ،، مرة بعدها لا والله المدير مش موجود ،، لا والله ما عنا فلوس الحين و بتعرف السوق واقف ،، مرة ناطرين نشوف تكلفة إزالة ورق الحيطان ،، مرة خلص بنرد عليك خبر الأسبوع الجاي ،، مرة والله الشيك جاهز و بكرا تعال استلمه ،، و مرة المدير بكرا راجع من السفر ،، و ما شاء الله عليهم ..

المهم ،، من فترة بسيطة بعثتلهم إيميل إن عيب عليكم يا جماعة الخير صارلي 7 شهور طالع من البيت و بعدكم ما خلصتوا أموركم ؟

شوفوا عاد شو بوصلني ::

بوصلني إيميل فيه شغلات والله إني كنت بستحي أحكيها للناس أصلاً ،، بس قطعته لعرق الحياء الحمدلله على هالناس ..

يعني فيه شغلات ،، أنا نفسي مستغرب منها كيف بكتبوها ،، و ” كلهم ” – ما عدا مسكة الباب – كانوا أصلاً من قبل ما أسكن في البيت ،، و لما كنت أحكي للصيانة عنها كانوا يحكولي :: أوكي بنشوف المدير ،، أوكي هلأ هاي مش قصة كبيرة ،، أوكي بنبدلك إياها بس والله حالياً ما في بدجت للصيانة ،، و لكم تفوا عليكم !!

قال صيانة الشقة كلفتنا من بعدك :: 3785 درهم و هي تقرير شركة الصيانة و من تيتي الصغيرة أصلاً إذا عملتوها 🙂 🙂

أطربوا مسامعكم ..

قال مسكة الباب – هاي مشكلتكم إذا الناطور ضيّعها ..

مفتاح البيت – قال في نسخة ناقصة .. على أساس يعني لما ييجي حدا يسكن فيها بتعطوه نفس المفتاح يا بقر !!

الـ Door Stopper ،، قال ما في وحدة بالصالون ،، قلتلهم يا تحف أصلاً البيت ما كان فيه و أنا اشتريتهم جداد شوفوهم بعدهم بلمعوا !!

بدكم أسخف من هيك ؟؟ كملوا كملوا ..

السوكت إللي بالحيط تبع أنتين البناية مكسور ،، عرفتوها هاي إللي بنحط فيها الكيبل تبع التلفزيون القديم ؟؟

طبعاً شو بدي أقولهم غير إن :: أنا سكنت البيت بـ 2014 و كان التلفزيون إتصالات eLife ،، السوكت إللي إنتوا بتحكوا عنه انقرضت التكنولوجيا تبعته من عشرين سنة ،، عيب عليكم !!

عاد وسعوا وسعوا وسعوا ،، خذوا أسخف وحدة ::

قال البلاستيكة تبعت كلينكس الحمام مش موجودة ..

ولكم أنا لما سكنت البيت ما كان فيه محل لكلينكس الحمام أصلاً و رحت جبتها من آيكيا ( الله يخليلنا إياه ) و ركبتها !!

لا كنت بمزح معاكم ،، هاي مش أسخف وحدة ،، اسمعوا اسمعوا هاي أسخف وحدة ::

كرسي الحمام ،، مش فيه هاي القطعة إللي بنقعد عليها ؟ قال في وحدة من البلاستيكات إللي على الكرسي مش موجودة !!

ردّيت على إللي فيه النصيب ،، و ختمت الإيميل بـ ::

تباً لكم و لِما صنعت أيديكم !!

تذكرت خال فهد العرادة لما كان يقول :: يا خر* ،، شنو هذا !!

قلنا واطيين ،، قلنا وسخين ،، قلنا نذلين ،، بس مش هيك !!

الحمدلله الذي عافانا ،، الحمدلله الذي عافانا ،، الحمدلله الذي عافانا ..

نشوفكم على خير إن شاء الله ..

و السلام عليكم و رحمة الله و بركاته ..

298 Total Views 2 Views Today