أسامة بن زيد

كان المطلوب مني أبيع سيارة ،، يا الفورد ،، يا الباسات ،، و بما إن الفورد أكبر ،، و دبتها بتكفي أحط فيها ” الكراكيب ” تبعتي ،، قلت أخلص من الباسات ،، والله لا يعلقكم بنفس العلقة إللي علقت فيها !! تعالوا تنشوف ..

وصلت السيارة من الأردن ،، بعد ما كان وسيم عم بستخدمها هناك ،، كنا مفكرين نجمركها برقم أردني ،، بس طلعت not worthy إنها تتجمرك ،، فقلنا نرجعها لهون ،، بلشت بدي أبيعها ،، و أنا ما بفهم بهاي الأمور ،، قام أخونا // خالد حامد الخراز : الملقب بـ أبو فارس // صوّرها و نزل صورتها في موقع على النت ،، بلشت العالم تتصل ،، شي من هون ،، و شي من هناك ،، في كذا واحد شافها ،، ما عجبني السعر ،، حكيت مع أبوي و قالي :: خلصني منها !! قلتله : حاضر..

المهم ،، قربت سفرتي على الأردن ،، الأحد بلشت حالة الأزمة ،، الإثنين عندي جامعة ،، الثلاثاء فاضي ،، الأربعاء عندي جامعة ،، الخميس وقفة عرفة أنا مسافر إن شاء الله ،، يعني ما ضل عندي غير يوم الثلاثاء 24-11-2009 أخلص فيه الموضوع ،، و فعلاً ،، إجا دكتور مصري و معاه ممرضة صينية مدري فلبينية ،، شافوها ،، رحنا بدنا نفحصها ،، المحل الأول قال ما بفحص إلا لبعد العيد ،، و الثاني كان مسكر ،، راح عند واحد كهربائي بيعرفه قاله ما فيها مشاكل و وو و و و و وو و و بالأخير قالي الدكتور المصري أنا ساعة زمن و حبقى أرد عليك ،، قلتله بس لا تتأخر لأني بدي أخلصها اليوم إن شاء الله ،، رجع حكى بعد شوي قالي لأ خلاص و نبقى نشوف لو صار نصيب بعد ما ترجع من السفر << مهو أنا بدي أتجوز بنتهم !!

رجع حكى معاي واحد ثاني (( مهندس مصري // اسمه مصطفى ))  قالي بدو يشوف السيارة ،، قلتله بصراحة ،، بدك تشوفها و ترد علي خبر و تقولي إديني يوم أفكر (( شغل أفلام مصرية ))،، ما بدي إياها لهالشغلة ،، إذا عجبتك السيارة راح نطلع علطول على المرور ،، قالي ماشي ..

رحت لعنده للزلمة شاف السيارة ،، و ” على أساس اتفقنا ” ،، قالي كم بدك فيها ،، قلتله  XY000 قالي كثير ،، قلتله كم بدك ؟؟ قالي ناقص 3000 درهم ،، قلتله و نخلص ؟؟ قالي و نخلص ،، و رحنا على المرور !!

هون بدأ الفيلم : وصلنا على المرور ،، بدنا ننقل التأمين ،، هلأ السيارة بإسم أبوي ،، و أنا عندي وكالة فيها من الأردن ،، مو مصدقة من السفارة أو من الخارجية ،، تبع التأمين بقوله لمصطفى // 50 درهم // قاله ليه ؟؟ قاله رسوم نقل التأمين ،، قاله مفيش discount ،، هههههههههههههههههههههههههههههههههه هو يقوله هيك و أنا أفرط ضحك قدامه للزلمة ،، قاله لأ مفيش قاله ياخي غيركم بـ 20 !! قاله تبع التأمين روح عند غيرنا !! يعني حتى تبع التأمين طفر منه !! >> أنا قلت الله يستر ،، من أولها هيك !!

أخذنا رقم لفحص السيارة ،، فحصناها طلع ما فيها مشاكل الحمد لله ،، إجينا على التسجيل !! ما خلونا ،، قال لازم صاحب العلاقة يكون موجود !! يا جماعة الخير هاي وكالة فيها !! قال لأ مش مصدقة من السفارة ،، شوف الضابط ،، قال لأ ما بقدر أساعدك ،، قلتله هي تذكرة سفري أنا مسافر بعد بكرا إن شاء الله و بدي أخلص الموضوع قالي شوف الضابط الثاني ،، الضابط الثاني قالي نفس الكلام ،، حكيت مع واحد بعرفه ،، قالي :: روح الحين و بكرا الصبح أنا بخلصلك الموضوع إن شاء الله !! قلتله : حاضر .. دفعلي الزلمة نص المبلغ ،، و النذل قلتله بس إن سيارتي الثانية بشارع حمدان ،، قالي في تكاسي كثير هنه أنا رايح بني ياس ،، أبوكي يا النذالة طرقني تاكسي من المرور لشارع حمدان !!

نمنا و صحينا و صار يوم الأربعاء ،، اتصلت مع صاحبي // قالي روح عند فلان الفلاني و هو بوقعلك على الوكالة ،، قلتله شكراً و بحكيك إن شاء الله بس أخلص ،، شوي و متصل فيني مصطفى (( المصري إللى بدو يشتري السيارة )) بقولي أسامة إنت ما قلتليش ليه إن السيارة مبدل لونها ،، قلتله أنا قلتلك إنها كانت عند أخوي في الأردن و قلتلك إن بدل لونها من العنابي لأسود ،، قالي لأ ما قلتليش أنا عاوز أروح أفحصها .. قلتله مصطفى أنا قلتلك من مبيرح إن ما عندي وقت ،، لحالي في المكتب و ما في حدا موجود (( الـsenior مسافر كان يومها )) فقلتله روح افحصها و ارجع ،، قالي لأ نروح مع بعض !! قتلله أنا مصدقك والله روح افحصها و جيبلي النتيجة !! قالي لأ ،، قلت أمري لله ،، علقت مع مصري !!

رحنا على الفحص ،، الزلمة قال نص ساعة بس و ببلش << كان بدو يفطر تبع المحل ،، بلش يفحص ،، خلص ،، ” تخوزق المصري “ طلع ما فيها شي الحمد لله ،، إجا الهندي بقوله 150 درهم ،، قالي معاك يا أسامة ؟؟ أصلي ممعيش دلوقتي فكة ،، قلت ” مصري ” شو بدو يطلع منك ،، رحنا على المرور ،، مريت على الزلمة إللي حكالي عنه صاحبي ،، وقّع على الورقة ،، كملت إجراءات التسجيل و مشي الحال الحمد لله << لحد هون ..

هلأ بلش الفيلم الجديد ،، الزلمة بدو يوصلني للشركة ،، قلتله طيب يا مصطفى ،، خلينا نخلص الحساب بينا لو سمحت ،، قالي ” بص حضرتك ” السيارة غالية أنا لقيت كدا و كدا و كدا ،، قلتله مو مشكلة ،، الله يعطيك خيرها و يكفيك شرها ،، قالي : آدي باقي الفلوس ،، أعطاني إياهم ناقصين 1000 درهم !! أحّـــــــــــــــــــــــــا !! بدك تنصب علي أنا !! لا و بقولي معلش يا أسامة ربنا يعوّضك و كل سنة و إنت طيب ،، قلتله معلش يا مصطفى : ربنا يكون في عونك و إطلع بـالـ 1000 ،، من لما طلعنا للمرور للما وصلنا الشغل ،، طلع بـ 500 درهم ،، و ضايل 500 هسه !!

وصلنا لعند الدوام ،، قالي بص الضو ده والع من مبارح ،، قلتله هاي إن مية المسّاحة ناقصة ،، قالي أصلي خايف يكون في حاجة كدا و لا كدا دا شكله بتاع الزيت ،، قلتله مصطفى شوف الرسمة إللي على المساحة ،، و شوف الرسمة إللي طالعتيلك !! قالي أنا مش مطمن !! رحنا جبنا قنينة مي و عبيناها و راح الضو >> على فكرة: دفعنا حق المي من الفكة إللي بالسيارة !! يعني ما كلف على حاله يطلع درهم و نص !!

أسامة : لو سمحت ضايل 500 درهم
مصطفى: معلش بقى تبقى تسامحنا فيهم
أسامة : للمرة الثانية بقولك ضايل 500 درهم
مصطفى: تصدق أنا بس عشان ظروفك و إنك مسافر اشتريتها منك ولا أنا قالولي ما أشتريش الفولكس واجن
أسامة (( سراً )) : أحا يا حيوان عم بشحت منك يا كلب !!!!!!!!!!!
أسامة (( جهراً )) : معلش بقى ،، اطلع بالـ 500
مصطفى : طيب نتفاهم شوي البيع أخد و عطى
أسامة : معلش أنا قلتلك إن ما بقدر أطلع من الدوام ،، و طلعت ،، و صارلي ساعتين و نص برا !! (( أنا طلعت من المكنب الساعة 9:30 ))
مصطفى : ياخي تصدق إنت صعب
أسامة : مو مشكلة صعب ولا سهل ،، خلصني لو سمحت
مصطفى : تصدق السيارة سعرها غالي
أسامة : أنا قلتلك من مبيرح سعر السيارة ،، و قلتلي بدك إياها بأقل من 3000 درهم ،، كان ممكن أضل أحكي و أحكي و ما أنزلك الـ 3000 ،، بس أنا اختصرت الموضوع و قلتلك ماشي
مصطفى .. أسامة .. مصطفى .. أسامة .. مصطفى .. أسامة .. مصطفى .. أسامة .. مصطفى .. أسامة << نفس الحكي بتكرر !!
مصطفى : طيب خليهم 300 ،، لسه حبدل زيت و أروح أعبي بترول
أسامة : ليش يعني هدول بنحسبوا على البيعة !!!!! ما لسه دافع عنك الـ 150 تبعون فحص ،، رجعلي إياهم و روح حط فيهم بترول و زيت !!
مصطفى : ياخي ما تديني حق البترول
أسامة : أبووووووووووووووووكي يالشحاتة !!
مصطفى : طيب أنا خلاص مش عاوز السيارة ..
أسامة : على قلبي زي العسل ،، الفلوس عندي ،، و مش حترجع تشم ريحتها ،، و السيارة خليها عندك ،، مثل ما ” أنا ” بدلت على إسمك بدون الوكالة ،، برجع ببدل على إسمي ” بدون ” موافقتك ،، و بقولهم السيارة مسروقة !!
مصطفى : لأ مش عاوزين الكلام يبقى كدا
أسامة : أنا مش عايز كلام بالمرة ،، إطلع بالـ 500 و خلصني خليني أرجع على شغلي

مصطفى : تصدق إنت صعب أوي ،، أنا قالولي ما أشتريش السيارة من أردني

أسامة : و أنا قالولي ما تبيعش سيارتك لمصري :sun:

شفت قصته مطولة ،، مرت نص ساعة !! صارت الساعة 12:30 !! مديت إيدي على جيبته تبعت القميص ،، أخذت الـ 500 درهم ،، و قلتله مكتبي بالطابق الـ15 ،، إبقى تعال إذا عندك شي !!!!!!!!!!

======================

نستنتج مما سبق // ما تبيعش سيارتك لمصري

هذه التدوينة ادرجت بتاريخ 26 ديسمبر 2009 في الساعة 4:59 م ضمن تصنيف شوية طيش. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.