التيكيت رخيص ،، هات تنسافر !!

نفوت بالموضوع على طول ،، من يوم الثلاثاء كنا قاعدين في المكتب ،، أنا و عبد الله و ريان ،، ما بنشوف غير ريان صار يقول // ليك والله التيكيت على بيروت بـ600 درهم ،، هات تنسافر ،، قلتله يا ريان هدول بقولوا بـ600 بس لما تيجي بدك تشتري بطلع في ضرايب و و و و و و و و و و و و .. كملوا ..

بعد ما إجا بدو يشتري التذكرة و كل شي ،، طلع سعرها تقريباً 1300 وشوي ،، قال والله منيح ،، يا ريان ،، غير ،، بدل ،، أجلها ،، قال يا زلمة والله التيكيت رخيص خلينا ننزل ،، قام قدم طلب إجازة أسبوع ،، إجا بدو يناقش عبد الله ،، قام عبد الله سمعه محاضرة إن الواحد بنزل لما يكون في شي مهم أو إجازة سنوية ،، مو لأن التيكيت رخيص ،، و الـ Leave without Pay لما يكون في ظرف طارئ (( حلو الفيلم على فكرة )) ،، و من هون لهون قام ريان قاله لعبد الله يا خيي خلص إذا ما بدك ما باخذها لهاي الإجازة مو مشكلة ،، بس أنا بدي إنزل أشوف أهلي و إمي قبل ما تسافر على السعودية (( كنا بسعر التذكرة صرنا بسفرة إمه )) ،، و من هون لهون ،، وقعله عليها عبد الله ..

و هو مبسوط و بعز فرحته ،، نكدت عليه و قلتله // و كورس الإنجليزي إلألي عندك ؟؟ بس أنا قلتله هيك ،، تلفون وجهه بألوان قوس قزح كلها !! قال ييييييييييييييييييييييييييييييييييي كيف نسيتها لهاي !!

مبيرح الصبح متصل فيني ريان ،، بقولي خلص بدي أسافر إن شاء الله ،، قلتله خلص نويت ؟؟ قالي خلص الإنجليزي حكيت مع الأستاذ و قالي إن ما في داعي يمتحن و علطول راح يدخله على كورس الـILETS بدون ما ياخذ كورسات إنجليزي ،، و ريان ما صدق ،، علطول صار بدو يرتب كراكيبه ،، و وين النكتة في الموضوع ،، ريان و صاحبه في الغرفة كانوا قاعدين مع جيرانهم ،، إلا وحدة منهم بتحكي إنها مسافرة بكرا على بيروت ،، قالها ريان والله عن جد ؟؟ طلعوا على نفس الطيارة ،، قال معناته خلص إذا هيك ما عاد فيها قعدة في أبوظبي ،، على بيروووووووووووووووووووووووت ..

إتصلي ريان و قالي بدو يروح يشتري شنطة ،، قلتله خلص مو مشكلة بمر عليك و بنطلع سوى إن شاء الله ،، رحنا بدنا نشتري شنطة ،، في محل بحمدان سنتر ،، ما عجبه عنده شي ،، لاقى شنطة بـ250 و قال غالية ،، رحنا بعدين على جمعية أبوظبي التعاونية إللي على الميناء ،، شفنا كم شنطة ،، منها الحمرة إللي صورتها تحت ،، بس قال حقها 199 غالية ،، لفينا كمان شوي في الجمعية ،، لاقى وحدة DELSY ،، عجبته ،، و يدوبك حقها 450 درهم !! و إشتراها !!

و صلته على بيته ،، و أخذت منه بطاقات البنك تبعونه (( عشان ما يرجع و يكون عليه 30985309845 درهم على الـ Visa Card تبعه !!

شنطة ريان

======

بيت القصيد

بيت القصيد من القصة هاي كلها إن ريان بعشر دقايق طقت براسه و صار بدو يسافر و حسم الموضوع ،، و أنا إللي كل ما أخطط شغلة بتخرب بعدني لهسه ما عرفت شو بدي أعمل بإجازتي !!!!!

عمان :: بعدها ما انحسمت !!

الأردن :: مو جاي على بالي (( بس شكلي راح أكون مضطر بالأخير )) !!

اليونان :: Theofilos بدو يحتفل بالكريسماس بالبرازيل !!

إجيت بدي أروح على غانا عند دكتور كان يدرسني ،، بس طلع غانا ما عندها سفارة بالإمارات ،، في سفارة بالسعودية !!

الوالد بقولي روح على الأردن و كم يوم بسوريا !!

الوالدة بتقولي شوف رحلات الجروبات على ماليزيا و تركيا !!

!! و أنا بعدني مو عارف شو بدي أعمل !!

======

🙂 أدعولي ،، إمتحانات الماجستير قربت و أنا كمان قربت 🙂

3023 Total Views 1 Views Today