أسامة في الكامارو

لولا الشرطة ماكانش أمان ،، والقوي كان أكل الغلبان
دايما أشوفهم أنا في ميدان ،، أو في الشارع كالفرسان

يعني منيح إني أجلت كتابة الموضوع ” 24 ساعة ” بس !! من فترة و أنا بدي أكتب عن شرطة أبوظبي ،، يعني ما شاء الله ،، ما شاء الله ،، ما مر علي شرطة نفس هيك من قبل ،، يعني صارت مواقف بيني و بين شرطة أبوظبي و دبي و الشارقة و رأس الخيمة و السعودية و الأردن و سوريا و لبنان و المغرب !! بس فعلاً مثل شرطة أبوظبي ما شفت !!

في كذا شغلة بصراحة متميزين فيها ،، أول شي ” الهدوء ” يعني بالعادة لما يوقفك شرطي ولا شغلة بتلاقيه بخانقك و معصب و بحكي معك كإنك قاتله حدا من أهله >> غير إن في ” بعض المرات ” بستحقرك بحسهم !! خصوصاً برا يعني ،، شرطة أبوظبي الحلو فيها إنهم فعلاً يعني غيّروا صورة الشرطة إللي ” بتخوّف ” و دايماً مواكبة للأحداث !! يعني مثلاً لما كانت سباقات الفورمولا هون بأبوظبي ،، نزلوا سيارة الصقر إللي زي سيارات الفورمولا ،، و بتلاقيهم دايماً في المولات عاملين نشاطات للأطفال توعية و سلامة و هيك شي ،، حتى برمضان بكونوا واقفين بالشارع بوزعوا تمر و مي للناس ،، نزلوا سيارات نيسان جي تي و كمان كامارو ،، ممممم حملة ” أترك مسافة قبل الحسافة ” كمان كانت شغلة حلوة كثير ،، ” الفن ” في متابعة المخالفين !! << هاي النقطة راح أحكي عنها بعد شوي إن شاء الله ،، دعاية شرطة أبوظبي للدوري الإماراتي و كيف إن السيارة و لاعبين الشرطة مشاركين في المباريات (( مع وزارة الداخلية )) الشرطة المجتمعية إللي سووها كمان ،، ما بعرف كمان شو صار بأبوظبي و نزلوا دراجة حلوة كثير لإلهم:

هذا غير الدراجات الصغيرة إللي نزلوها عشان الكورنيش و و الشواطئ ،، يعني والله في كثير أشياء عم بحاولها أتذكرها ،، و يا ريت لو حدا منكم بتذكر شي كمان يذكرلنا إياه ،، مممممم آه صحيح والله في موقف صار معي مرة ،، مرة دعمت واحد على دراجة نارية ،، هلأ إجت الشرطة و إجت الإسعاف و رحنا خلصنا التخطيط و أنا كنت ناطر إللي خبطته ليطلع من المستشفى ،، إللي عجبني هذاك اليوم ،، إن الشرطي إللي إجا يخطط الحادث ،، أخذ رقم تلفوني عشان يطمن علي و يطمن شو بصير معاي بالحادث و مع الزلمة إللي خبطته ،، و بعدنا لليوم على إتصال الحمد لله ،، هذا الحكي من صيف 2007 🙂 ،، طبعاً في موضوع المشكلة إني ما بقدر أحكي فيه هون بصراحة !! بس فعلاً تعاملت مع ناس بالشرطة بقمة الرقي و الاحترام !! ،، هلأ وين المشكلة ؟؟ صحيح إن نحن مرات بنقعد مننقهر لما حدا يوقفنا ولا يخالفنا ،، و لا بنشوف إنهم زودوها شوي في بعض المخالفات !! << بس ما قدر أعلّق على هذا الشي بصراحة D:

هلأ تعالوا أحكيلكم شو صار معانا مبيرح ،، مبيرح إتصلي نشوان قال بدو يروح يشوف مصرف الهلال شو عاملين على الكورنيش ،، قال عاملين معرض سيارات و ما بعرف شو و فائدة مخفضة إذا بتوخذ السيارة عن طريق مصرف الهلال و و و وو و و و و يلا يا أسامة

رحنا ،، شفنا السيارات ،، و كالعادة ،، شرطة أبوظبي كانت موجودة في الحدث ،، مع إن بصراحة ما توقعت تكون الشرطة موجودة بهيك شي !! إن يعني مو هالشي الكبير إللي تقول ممكن الشرطة تكون موجودة !! بس الناس تركت المعرض و قعدتت تتصور بسيارات الشرطة ،، و نحن منهم 🙂

أنا بالكامارو >> شوفوا الشرطي إللي ع الجنب:

الكامارو و الجي تي:

إحم إحم // حــــــوّل :

هون الحلو بهاي الصورة إن نشوان ما كان بدو يلبس الخوذة ،، و الشرطي بقوله ما بصير لازم تلبسها ،، و نشوان بقوله بخرب ” الجل ” و تسريحة شعري ههههههههههههههه :

و هاي الصورة // لوحة فنّية //:

أسامة في الرابتر:

لا تركزوا على وجهي // ركزوا على Made in UAE :

هدول الصورتين ،، الظاهر الأخ طلال خوري حاط سياراته هناك ،، قلت أعمل جو شوي في الأرقام D:

==========================

هلأ هذا الموضوع كان لازم أكتبه مبيرح ،، بس تأخرت شوي في الكتابة ،، و صارلي موقف جديد اليوم و كان معاي يوسف << طبعاً ما بحتاج أقولكم مين يوسف ،، مهو ما شاء الله بصمته بكل المواضيع 🙂

اليوم مريت على يوسف على أساس بدنا نطلع نقعد بمكان برا ،، المهم ،، دخلت بالخالدية و طلعت ع الشارع الرئيسي // هلأ أنا صرت بالحارة الأولى من ع اليمين ،، حتى والله يمكن مو بالحارة الأولى ،، بالحارة الصغيرة إللي بتكون موجودة للي طالع من دخلة !! و الظاهر إني زودتها شوي و كنت و بدي أروح ع الحارة اليسار ،، من أقصى اليمين لأقصى اليسار ،، و ما خليتها بنفسي والله D:

لقيتها ،، و ضليتني ماشي ،، (( في هذه الأثناء كنت عم بحكي مع يوسف عن سيارات التحريات الجديدة )) شفت سيارة لكزس وراي ،، ما شاء الله عليها ،، سيارة آخر موديل و عليها رقم أبوظبي رباعي أحمر ” مرتب ” !! قعد يولعلي الضو العالي ،، و أنا مطنّش !! قلت يمكن هذا واحد لفيت عليه و بدو يسب !! فقلت يا أسامة ” إعقل ” و بلاش تتخانق مع العالم هلأ !! و صلنا لعند مجوهرات المنارة و بريستيج للسيارات ،، و الزلمة بلف وراي من حارة لحارة ،، قلت يمكن واحد من الشباب أصحابي و حاب يتزانخ علي ،، نزلت الشباك شوي ،، شفته من المراية ،، قلت ما بعرف ،، رفعت الشباك و ضليتني ماشي D: ،، وصلنا للإشارة إللي بعديها ،، إجا جنبي ،، أنزّل الشباب ولا ما أنزّل ،، أنزّل ولا ما أنزّل ،، إلا يوسف بقولي نزّل شوف شو بده ،، نزلت الشباب ،، ما بشوف غير بإيده جهاز اللاسلكي بحكي مع العمليّات الظاهر ،، تطلع فيني و قالي // معاك الرائد فلان الفلاني وقف في الباركينج لو سمحت ،،

لوووووووووووووووووووووووووووووول

و يا حبيبي ده إللي يخاف من العفريت >>> يطلعله

وقفنا في الباركينج ،، إجاني ،، و أنا بعدني يعني قاعد في السيارة !! مو إن أنزل و أحكي مع الزلمة ،، بس احترمت حالي و بدون ما يسألني أعطيته الليسن و الملكية D:

و صار بينا النقاش التالي:

التحريات: يعطيك العافية ..

أسامة: الله يعافيك يا رب ..

التحريات: انتبهت شو سويت ؟؟

أسامة: ولا شي ،، شفتك بصراحة عم بتعطيني الضو العالي بس فكرت إني لقيت عليك بالغلط و جاي بدك تخانق و ما حبيت بصراحة أتخانق

التحريات: لا ،، قبلها شو سويت عن الإشارة ؟؟

أسامة: آآآآآآآآآآآآآآآه إنت بتلحقني من هناك

التحريات: هاي لفة إللي لفيتها ؟؟ من أقصى اليمين لأقصى اليسار ؟؟ إنزين كمّل للإشارة إللي قدام و لف ياخي !!

أسامة: والله كنت طالع من الزحمة و و و و و و و

التحريات: و ليش ما وقفت ؟؟ ولا ما قدرت تشوف من المخفي ؟؟ يعني 3 مخالفات ،، اللفة و المخفي و عدم الإنتباه .. يعني تعرف هاي شو مخالفتها ؟؟ سجن أسبوع و شهر حجز للسيارة !!

يوسف تدخل: والله شفناك بس بصراحة يعني ما كنا عارفين إن هيك سيارة برقم حلو ممكن تكون سيارة تحريات 🙂

التحريات: الحين عادي توقع نطلعلك من كل مكان ،، بورش أودي بي أم باص تكسي فان أي شي ،، فتحمل و إنتبه على عمرك

أسامة: أشرتله بأصابعي على عيوني ،، و قلتله // من عيوني 😉

التحريات: على كل حال الله يحميك و هاي المرة ما بخالف ،، بس أنا سجلت رقم السيارة و إذا توقفت في المستقبل بكون مسجل إن هاي السيارة خالفت قبل

أسامة: يعطيك العافية ،، يسلمو كثير

التحريات: في أمان الله

..

بصراحة ،، ما راح أقول غير إن الزلمة // OOOVVVEEERRR محترم كان بتعامله معانا ،، يعني والله إني استحيت منه !! هذا و أنا آخر مرة استحيت فيها كانت يمكن من عشر سنين !!

.. التعليق على هذا الموقع بترك فيه المايكروفون لأخوي يوسف يعبّر عنه ..

..

هذا موقف بس حبيت أذكرلكم إياه عن طريقة شرطة أبوظبي في التعامل مع الجمهور بصفة عامة ..

============

جاي في السريع //

* اللهم احفظ هذا البلد آمنا مطمئناً و جميع بلاد المسلمين إن شاء الله يا رب ..

* الأحد الجاي ،، مو بكرا ،، الأسبوع إللي بعده إن شاء الله عندي فانيل بالماجستير >> يعني دعواتكم لو سمحتوا ..

* إن شاء الله أقدر أحافظ على نفس مستوى الكتابة و أحسنه أكثر و أكثر و الاستمرارية بين المواضيع ..

* شو كمان ؟؟

* ممممممممممممممممم .. U CAN ؟؟ << الحكي موجّه لشخص هو عارف حاله ..

============

مسج التدوينة :: إمشي عدل ،، يحتار التحري فيك 🙂

و السلام عليكم و رحمة الله و بركاته

====================

.. SooN 2 Jordan إن شاء الله ..

4680 Total Views 1 Views Today