و تكنسلت الفولفو

يقول الراوي // أسامة بن زيد // إن بمثل هذا التاريخ بس قبل سنة ،، 29-5-2007 ،، كنا رايحين على الجامعة أنا و نشوان و أسامة الطويل ،، كان يومها آخر يوم دوام في ” فصل التخرج ” ،، يعني كنا بدنا نخلص الدوام و نروح على بيوتنا عشان الأسبوع الجاي نيجي على العين و نبدأ إمتحانات الفاينل ،، هذاك اليوم ما كان عنا غير محاضرة وحدة و إللي هي ” قانون الأعمال ” ،، و كان لازم نتصور صورة بدشداشة و غترة و عقال عشان دفتر الخريجين.

في كافتيريا الجيمي - قبل ما ندخل على محاضرة قانون الاعمال

المهم ،، المحاضرة خلصت الساعة 1:20 الظهر ،، قلت دعاء ركوب السيارة و رحنا على المصور – ما في غيره طبعاً ،، إسمه : ساحل عمان – طلع مسكر ،، رجعت قلت دعاء ركوب السيارة و رحنا على الجيمي مول ،، قلنا نتغدى و نحاوط شوي و نرجع بعدين للمصور و طبعاً هذاك اليوم ما كان عندي دشداشة ،، فقمت إستعرت وحدة من عند واحد من الشباب معانا ،، هي من ناحية العرض ،، نفس الشي علي ،، بس من الطول ،، طويلة شوي علي ،،

نرجع لموضوعنا ،، رحنا و تغدينا في الجيمي مول و حاوطنا شوي ،، و بعدها الساعة 3 وشوي !!! وين نروح وين نروح ،، قلنا بنروح على السكن أحط أغراضي أنا و نشوان في السيارة ؛ لأن نشوان من أبوظبي و راح يرجع معي على أبوظبي إن شاء الله و أسامة الطويل من راس الخيمة ،، و فعلاً والله ،، طلعنا بالسيارة ،، بس هاي المرة نسيت أقول دعاء الركاب ،، و صار إللي صار

وصلنا عند دوار حديقة الطوية ،، و كنا حاطين كاسيت لقيته في السيارة ،، أعتقد إن كان لأخوي ،، كانت نانسي عجرم بتغني و بتقول في مطلع أغنيتها:

أيامي بقربك أحلى دنيا و أحلى جو
و عمري ما دقت الهنا لولا حبك إنت لو
و الله جوك أحلى جو
والله جوك أحلى جو

و على أنغام هاي الأغنية ،، بدي أدخل الدوار ،، دخلته ،، بدي أطلع – أنا ماشي سيدا – إلا تاكسي دخل من اليمين و صار قدامي ،، لو لفيت على اليسار راح أدخل فيه ،، قمت لفيت على اليمين ،، ضربت الرصيف و كملت السيارة و شاحت على الجزيرة إللي بين الشارعين

يوم دخلنا في الجزيرة إللي بين الشارعين

دخلنا في الجزيرة ،، السيارة ما عادت تتحرك ،، بس بعدها الماكينة شغال ،، قلت للشباب : الحمد لله على السلامة ،، كله سليم الحمد لله ،، يلا شباب صور تذكارية صور تذكارية <<<< شوفوا الناس بشو و أنا بشو !!!!!!

إتصلنا على الشرطة و دليناهم على المكان ،، و عبين ما إجوا لعنا قعدنا نتصور ،،

شوفوا أسامة يا حليله هو و نشوان كيف قاعدين و مبسوطين آخر الإنبساط في ” حديقة بين الشارعين ” 😀

أسامة و نشوان مبسوطين على الحشيش

و هاي صورة لإلي و لشعراتي الحلوين أيامها ،، و الهواء العليل ينسم علينا

أنا و شعراتي و الفولفو

طبعاً وصلت الشرطة (( دورية كابريس )) و إجا بعديها كمان دوريتين (( لاندكروزر ،، و باثفايندر )) بس ما في داعي أحكي شو إللي صار << حرصاً على كل شي ،،

و هون نشوان البطل (( شمشون الجامعة )) بحاول يطلع السيارة من مكانها بقواه الخارقة << بس محاولاته بائت بالفشل

نشوان - شمشون الجامعة

و يا حرام على الوردتين الحمر ،،  // بتعرفوا ،، ما أذكر ولا مرة إن إجاني ورد هدية ،، كانوا هدول أول وردتين بيوصلني ،، و كنت محتفظ فيهم في السيارة من كثر ما كنت مسبوط فيهم والله – حتى يوم عملت عملية الزايدة الدودية ،، ما إجاني ولا وردة ،، كله شوكولاته و حلو و عطور و و و //

الورد الأحمر

المهم ،، والله و بعد ما طلعت السيارة من الجزيرة ،، رجعنا فيها على السكن و وقفناها هناك عبين ما نشوف شو بدنا نعمل فيها ،، و طبعاً ولا واحد منا انتبه إن الرادييتر مكسور !!! و قعدوا يشوفوا الشباب إللي في السكن السيارة و أنا فاتح الغطاء من قدام عشان تبرد و الكل ييجي و إلا يعرف شو إللي صار و كيف و و و و و وو ” الست حشورة “

===========================

الحين وصلنا للجزء الأصعب من الموضوع // كيف بدي أبشر الوالد ؟؟؟؟؟؟؟؟؟؟

احترت كثير بهذا الموضوع ،، بس ما عليكم ،، أبوي و بعرفه ،، أعطيه الموضوع بدون مقدمات و خلصه على السريع

إتصلتله و دار بينا الحوار التالي//

أسامة بن زيد // ألو ،، السلام عليكم و رحمة الله و بركاته
زيد بن محمود // هلا و عليكم السلام و رحمة الله و بركاته
أسامة بن زيد // بابا ،، من الآخر ،، مين أغلى ؟؟ إبنك ولا الحديد ؟؟
زيد بن محمود // شطبتها ؟؟
أسامة بن زيد // لا والله ،، بس تخيرت أدخل بتاكسي و لا أدخل بجزيرة و اخترت الجزيرة ،،
زيد بن محمود // مين كان معاك ؟؟
أسامة بن زيد // أنا و أسامة و نشوان ..
زيد بن محمود // صار في حدا منكم شي ؟؟
أسامة بن زيد // لا ،، الحمد لله كله سليم
زيد بن محمود //  ** أمها إلا هي حديد ،، و الحين شو ناوي تعمل ؟؟
أسامة بن زيد // بدي أشوف حدا من الشباب و أوديها على الصناعية إن شاء الله و بنشوف شو بصير
زيد بن محمود // أوكي ،، و إذا لزمك شي كلمني
أسامة بن زيد // يسلمو ،، مع السلامة
زيد بن محمود // يعطيك العافية ،، مع السلامة

شو رأيكم بالنقاش ؟؟؟ قوي !!! و صريح جداً الحمد لله

جربت أشغل السيارة ،، ما رضيت تشتغل ،، إتصلت على واحد من الشباب إسمه // سلطان الظاهري // و إتصلت على محل الخليج للريكفري تبع السيارات ،، و إجوا على السكن ،، و ويدنا السيارة على الصناعية الحمد لله

هيبة يا ناس - السيارة على الونش

و رحنا هناك شفنا كمن محل ،، و قالولنا الرادييتر مكسور ،، لازم رادييتر جديد ،، دور دور دور دور دور ما في العين

كلمت الوالد هيك هيك هيك الموضوع

و روحنا على السكن ،،

ثاني اليوم الصبح بشوف الوالد متصل علي و بقولي وينك ؟؟ بقوله نايم في الغرفة ،، قالي أنا جبت الرادييتر و ساعة و بكون عندك إن شاء الله ،، قلتله بتحكي عن جد ،، قالي والله جاييك يلا قوم تجهز ،،

جاب الوالد الرادييتر و رحنا على الصناعية ،، و في الصناعية طبعاً السيارة كانت واقفة عند مسجد موجود هناك ،، مو متذكر شو كان إسمه والله ،، بس يمكن مسجد الصحابة ،، و راح الوالد قلصها بالفورد تبعته (( سابقاً – حالياً الفورد معاي ))

الفورد و الفولفو ،، و الحبل الأحمر

و وديناها عند إللي قالي في اليوم السابق إن هو بزبطها ،، شاف الرادييتر ،، قال هذا ما بينفع ،، لازم موديل ثاني ،،

يا بني آدم ،، شو المشكلة ؟؟؟؟؟ قال // سيارة مال إنتا في توربو وكالة ،، لازم رادييتر يكون في فتحة ما هازا رادييتر ،،

رجعنا على السكن ،، حطيت أغراضي في سيارة أبويي و رجعت معاه على أبوظبي ،، و ظلت السيارة في العين

طبعاً بشرت الوالدة بالموضوع و الحمد لله ،، قالتلي و ليش ما إتصلت أمس يوم سويت الحادث ،، قلتلها لو إتصلتلك راح تخافي و تقلقي و تقولي يمكن صار فيني شي ،، بس أنا قلت بس آجي على البيت و تشوفيني سليم ما فيني شي الحمد لله بترتاحي و بتطمني !!

طبعاً صارت أمور عشان نصلحها و ما نصلحها و طلعت الماكينة إللي مضروبة ،، مو بس الرادييتر ،، بعد ما جبنا واحد جديد !! و بعدها لهذا اليوم موجودة في حجز البلدية في العين لأن ظلت بدون أرقام ،، طبعاً نسيت أحكيلكم إن هاي الماكينة إللي كانت على السيارة ،، كانت الماكينة الثالثة إللي بنركبها على السيارة ،، من كثر ما لعبنا فيها الحمد لله أنا و أبوي ،،

و توووووووووووتة تووووووووووووووتة ،، خلصت الحتوووووووووووووتة ،،
يا ترى حلوة ولا فتفووووووووووووووووووتة ؟؟

بانتظار تعليقاتكم و آراءكم إن شاء الله

أخوكم // أسامة بن زيد

3487 Total Views 3 Views Today