مرحب عرب ،، بما إن بعدنا عم نحكي عن احتفالات الربع قرن من عطاء !! بمناسبة مرور 25 عاماً على اليوم الذي غيّر تاريخ البشرية :: 4-10-1985 ،، بعد فيه كثير أشياء عم بتدور و تلف و تتمشى و تتفسّح و تروح و تيجي و تطلع و تفوت و تسرح و تمرح براسي !! شاركوني فيها ..

كلوا عشان تكبروا ،، طيب هينا أكلنا ،، كبرنا ؟؟ و بشو كبرنا ؟؟ بالطول ؟؟ بالوزن ؟؟ بالعقل ؟؟ بالتفكير ؟؟ بالطموح ؟؟ بالإنجاز ؟؟

أقولكم ،، و هيني كبرت !! و شو صار !! مروا الـ 25 سنة ،، و ما حدا بعرف إذا ضايل في عمرنا قدهم ولا لأ !!

يعني لو ما أكلنا ،، ما كنا راح نكبر ؟؟

دخلنا الروضة >> بكرا بس تكبر بتصير المدرسة أسهل
دخلنا الإبتدائية >> بكرا بس تكبر بتصير الإعدادية أسهل
دخلنا الإعدادية >> بكرا بس تكبر بتصير الثانوية أسهل
دخلنا الثانوية >> بكرا بس تكبر بتصير أدرس منيح أول ثانوي و ثاني ثانوي و التوجيهي بصير أسهل
دخلنا توجيهي >> بكرا بس تكبر بتصير الجامعة أسهل
دخلنا الجامعة >> التأسيسي صعب بس بكرا بس تكبر بصير التخصص أسهل
دخلنا التخصص >> بكرا بس تكبر بتصير الشغل بكون أسهل
خلصنا البكالوريوس >> بكرا بس تكبر بصير الماجستير أسهل
دخلنا الشغل >> اشتغل سنة خذ خبرة و بعدين بكرا بس تكبر بتصير تقدر تترك و تلاقي شغل بطريقة أسهل
قعدنا 3 سنين – الحمد لله – بنفس المكان >> بكرا بس تكبر بتصير تكتسب الخبرة أسهل

صارلنا 25 سنة عايشين بـ ” وهم ” إسمه :: بكرا بس تكبر بتصير أسهل و أسهل !! و كل مالنا عم بضيع عمرنا ” هيك “

يمكن هو ما عم بضيع ،، بس ” بكرا بس تكبر ” راح تعرف إنك اشتغلت عشان تخلي شيبتك و كبرك في السن أسهل و أسهل !!

قالولي بكرا بس تكبر بتعقل ،، بعد بدي أكبر كمان ؟؟ عشان يصير العقلان عندي أسهل و أسهل ؟؟ لأني كل ما قلت بدي أترك الطيش و أعقل ،، بطلعلي إبليس و بقولي // بدري يا شيخ !! فما عدت عارف ،، أسمع كلامه ؟؟ ولا أتركه و أتسهّــل ؟؟

بكرا بس تكبر يا أسامة و تتزوج ،، بتصير تعرف إن هي بدها تخطىء ،، و إنت بدك تعتذر !! رأيكم هيك بتصير الحياة أسهل ؟؟

بكرا بس تكبر روح إلعب و إعمل إللي بدك إياه مين ماسكك ،،

إجينا بدنا نلعب بالدراجات بالصحراء ولا حتى بالجيت سكيز << من باب المثل لا الحصر >> قالولنا عندك مدرسة و ما بدك يصير شي لا قدر الله و تنكسر و ما تروح تدوام

كبرنا !! و إجينا بدنا نعملها بالجامعة ،، قلتلولنا ضايلك كم سنة في الجامعة ،، خلصهم و إلعب بعديهم بلاش ما تأثر على دراستك

كبرنا أكثر شوي !! و صرنا نشتغل ،، قلنا إجا الفرج ،، بتعرفه لفرج ؟؟ قالولنا هلأ شغل و ما بدك تخرب على دوامك و تتعطل و و و و و و و و

!! طيب متى ؟؟ متى راح ييجي “” بكرا بس تكبر “” من شان الله حدا يقولي !!

بكرا بس يا أسامة بتسافر و بتلف و بتسوي و بتعمل و ما بتخلي شي بنفسك ،، و هيني ناطر بعدني “” بكرا بس تكبر “”

المشكلة كل ما أشوف الناس إللي حوالي ،، بحس في منهم ما استنى و كبر بسرعة ،، و في ناس هي من تيتي إذا بتكبر ،،

و بزيد إيمان بإن “” بكرا بس تكبر “” هو عبارة عن شي (( صعب المنال ))

.. يحميني ربي ..

و السلام عليكم و رحمة الله و بركاته

3491 Total Views 1 Views Today