الجنة ،، النار ،، عذاب القبر ،، فتنة المسيح الدجال ،، قيام الساعة ،، البعث ،، إحياء الموتى ،، نار اليمن ،، يأجوج و مأجوج ،، الشمس من مغربها ،، كتاب باليمين ،، كتاب باليسار ،، إنت وين مكانك ؟؟

السلام عليكم و رحمة الله و بركاته ،،

كيف حالكم ؟؟

أنا عن نفسي تمام ،، أو بالأحرى :: الحمدلله ،، بتختصر كثير شغلات ..

الحمدلله في كل شي ..
الحمدلله على كل شي ..
الحمدلله على الدوام ..
الحمدلله على الصحة ..
الحمدلله على النفسية ..
الحمدلله على العافية ..
الحمدلله على كل النعم ..
الحمدلله على نعمة الإسلام ..

طيب ،، خلينا بآخر الحمدلله حكيناها ،، إللي هي :: الحمدلله على نعمة الإسلام ..

طبعاً يعني ما عنا خلاف إنها تكاد تكون أكبر نعمة ربنا عطانا إياها هي نعمة الإسلام ..

و هاي هي النقطة إللي صارلها فترة متعبة مخي و تفكيري ،، أو فيكم تقولوا متعبيته كثير بصراحة !!

ما بدي أناقش كيف الإسلام علّمنا ،،
و لا بدي أناقش كيف لازم نعبد ربنا ،،
و لا بدي أناقش الشباب الغير المسلمين ،،
و لا بدي أناقش فضل الإسلام علينا ،،
و لا حتى فضله ع البشرية كلها ،،

في شغلات نحن يمكن ما إلنا خص فيها ،، بس كمان في أسئلة بتدور في بال الواحد و ما بقدر يلاقي جواب يشفي غليله فيه !!

طيب ،، هلأ أنا أسامة ،، أسامة بن زيد ،، عمري 28 سنة و شوي .. درست الحمدلله في المدرسة و خلصت جامعة ،، بكالوريوس و ماجستير ،، انولدت مسلم ،، و إن شاء الله يا رب أموت على الإسلام ،، دايما بنحاول قد ما نقدر إن تكون نية أفعالنا و عباداتنا خالصة لوجه الله – تعالى – ..

يمكن ،، يمكن ،، يمكن ،، أكون في يوم من الأيام أكون غيرت حياة شخص ،، شخصين ،، عشرة ،، خمسين ،، و في أحسن الحالات و أكثرها تفاؤلاً ،، أكون أفدت ١٠٠٠ شخص طوال فترة حياتي لحتى ما تنقبض روحي !!

المفروض ،، إني إذا بموت على الإسلام ،، مؤمن بالله و ملائكته و كتبه و رسله و اليوم الآخر و القدر خيره و شره ،، و إني بشهد أن لا إله إلا الله و أنا محمد عبده و رسوله ،، و بقيم الصلاة و بدفع الزكاة ………………… إني بدخل على الجنة إن شاء الله .. طبعاً يمكن يكون في تعذيب لغسلي من الذنوب و الخطايا .. نسأل الله أن يعفو عنا و إن يدخلنا الجنة بغير حساب يا رب يا رب يا رب ..

( اللهم إنا نعوذ بك من عذاب نار جهنم و نعوذ بك من عذاب القبر و نعوذ بك من فتنة المسيح الدجال و من فتنة المحيا و الممات ) ..

طيب ،، كلام جميل ،،

السؤال القوي ،، في ناس – على سبيل المثال لا الحصر – مثل توماس أديسون ،، يوحنا جوتنبرغ ،، مخترع الإنترنت ،، مخترع العجلة ،، مخترع الحبر ،، مخترع الورق .. و حتى ستيف جوبز !!

على حد علمي ،، و على حسب ما قرأنا ،، لم يرد إن في واحد منهم مات على الإسلام !!

طيب يا ربي يعني هدول رايحين ع النار ؟؟

والله ما عم بفتي ولا عم بحاسب الناس عن ربنا و لا و لا و لا و لا ..

بس كمان يعني معقولة هدول الناس إللي غيروا تاريخ “”””””” البشرية “””””” كلها ما نشوفهم في الجنة !! طيب مهو كمان – من بعد فضل ربنا – عليهم و علينا ،، هدول إلهم فضل كبير كثير كثير علينا !!

صحيح إن هذا العلم و الإنجازات ربنا كان كاتبلنا إياهم ،، بس إن يعني إلهم فضل علينا ،، يعني لما تحكي سعيد علي أحمد محمد يوسف ،، كم واحد راح يعرفه ؟؟ يمكن ولا حدا منكم بيعرفه << ولا حتى أنا والله !!

بس لما تيجي تحكي عن توماس أديسون !! مهو جدي ،، و أبوي ،، و أنا ،، و أولادنا ،، و أحفادنا ،، و أحفاد أحفادنا ( لو ما قامت الساعة لوقتها ) راح يكونوا بعرفوه !!

يعني ما حدا – غير ربنا طبعاً – بعرف قديه هذا الإنسان خدم البشرية !!

مرات بفكر فيها ،، إن مهما كانت الأعمال ،، كبيرة ولا صغيرة ،، لازم تكون النية خالصة لوجه ربنا ،، طيب يعني ما اختلفنا إن أديسون يمكن ما كانت نيته لربنا ،، الله أعلم شو كانت نيته ،، بس إن يعني غيّر حياة البشرية كلها يا جماعة !!

اللهم إنا نسألك حسن الخاتمة ،، و يا رب اجعلنا من أهل الجنة إللي بدخلوها بغير حساب 🙂 🙂

<< شايفين الكلام كله إللي فوق ،، هذا مكتوب تاريخ 24-2-2014 ،، اليوم التاريخ 25-8-2015 و أنا قررت أكمّل الموضوع إن شاء الله >>

طيب أنا شو أسوي ؟؟

في آية من القرآن صارلها فترة عالقة في مخي و عم بتذكرها قبل أي تصرف أعمله ،، أو قبل أي نقاش ممكن إني أدخل فيه ..

طيب والله بنحاول ،، و بنظل نحاول إن نحاول ،، بس كمان مهو الصحابة ،، هذا و الرسول – عليه الصلاة و السلام – دعالهم ،، و خايفين ما يدخلوا الجنة ،، شو علمنا نحن مقارنة بأعمالهم !!

طيب ماشي ،، ما اختلفنا

..

كان في صورة انتشرت من فترة عن اليهودي إللي اكتشف علاج لشلل الأطفال ،، طيب ما هذا أنقذ مئات الملايين من البشر !! يهودي ،، معقولة يتساوى بالحساب مع إللي بتفنن في تصعيب أمور الحياة على المسلمين ! بس بعده مسلم و بصلي و بقول لا إله إلا الله ..

ماشي ما اختلفنا إن في فرق بين الكفر و الكبائر و المعصية و الخطيئة و و و و وو و .. بس إن يعني !!

المهم ،، أنا عارف إن الموضوع كله فات ببعضه ،، و أنا شكلي بلّشت أخبص ،، فخلاص ،، لحد هون و بكفي ..

و السلام عليكم و رحمة الله و بركاته

و لا إله إلا إنت سبحانك إني كنت من الظالمين ..

و سبحانك اللهم و بحمدك ،، أشهد أن لا إله إلا أنت ،، أستغفرك وأتوب إليك ..

====

و أخيراً نشرت الموضوع بتاريخ 12-09-2015 الحمدلله ..

865 Total Views 3 Views Today