هذا أنا ..

كل إنسان عنده طريقة للتعبير عن إللي فيه ،، عن كثير شغلات ،، و طبعاً طريقة التعبير بتفرق من مكان لمكان ،، و من زمان لزمان ،، و من موقف لموقف ،، و من نفسية لثانية !! حتى الإنسان نفسه لما يكون صغير بعبر بطريقة مختلفة عن لما يكبر ..

طبعاً أسامة موجود ما اختفى ،، صحيح إن سنة 2013 كتبت فيها موضوع واحد فقط !! بس والله موجود و حتى كتبت 6 مقالات بس ظلوا ” مسودات ” و ما نشرتهم لأني عجزت أكملهم و أعبّر عن الأفكار إللي براسي ،، و هون المشكلة ،، من قلة الكتابة ما عدت أعرف أكتب منيح و أعبر عن إللي فيني كثير ،، هذا طبعاً بالإضافة إن الأحداث صارت مقرفة و مقززة و هيك ..

هاي المرة حبينا نعطيكم ملخص 2013 بطريقة جديدة شوي ،، طريقة أنا نفسي أصلاً كنت قرفان منها من أيام الجامعة ،، و الماجستير كمان ،، كان في بني آدم يهودي إسمه ” أبراهام ماسلو ” ،، هذا كان فلسفجي و شغل نفسيات ،، طلعلنا بشي اسمه احتياجات النفس البشرية و احتياجات الموظفين و هاي الشغلات ،، درسنا ” الهرم ” إللي عمله في مادة الـ ” Organizational Behavior ” ،، مادة زنخة و كلها نظري و حفظ و قرف ،، بس كلمة الحق تنقال ،، بالرغم إنه يهودي ،، و بالرغم إن المادة زنخة ،، بس الهرم كان حلو ،، و فعلاُ أبدع فيه ابن اليهودية ..

الهرم بقسم احتياجات النفس البشرية لخمس أقسام رئيسية ،، أسفل الهرم بكون : الحاجات الفسيولوجية ،، و فوقها حاجات الأمان ،، و بعدين الحاجات الإجتماعية ،، و بعدين الحاجة للتقدير ،، و في رأس الهرم : الحاجة لتحقيق الذات ..

Maslow's_hierarchy_of_needs

و أنا حبيت أحكيلكم عن أحداث السنة الماضية بناءً على هذا الهرم ..

هيا بنا نلعب !!

قصدي هيا بنا نبدأ من الأسفل ،، الأسفل من تحت ،، مش الأسفل من السفالة << للتوضيح فقط 😛

————

الحاجات الفسيولوجية ::

(( التنفس ، الطعام ، الماء ، النوم ، الجنس ، التوازن ، الإخراج ))

ممممممم ،، فسيولوجياً أنا محتاج كل هدول الحمدلله ،، و أنا مو ملاقي كل احتياجاتي هههههههههههههههه ،، إذا ع التنفس ،، فديت أبوظبي و جوّها ،، بس ما تنفسنا هوا غيرها ،، نزلت ع الأردن على عيد الفطر و ع لبنان نحضر عرس أخونا وائل و غيره ما إلكم خص وين تنفسنا ،، و إذا ع الطعام ما عليكم ،، الله يخليلنا المطاعم ،، مو مقصرين معانا ،، صحيح مرات بتأخروا ع التوصيل ،، بس شو بدنا نعمل ،، هاي الحياة !! 

والله بتعرفوا ،، على سيرة الطعام ،، تعالوا أحكيلكم عن موقف صار معانا هاي السنة بالشغل لما طلبنا أكل ،، راح أحاول أحكيه باختصار ،، بالرغم إني بموت بالتفاصيل << زي الشيطان 😀 😀

هذا مرة كنا قاعدين في المكتب ،، و بدنا نتغدى ،، طبعاً نحن بنوصل ع المكتب 9:30 أو 10:00 و أول شي بنفكر فيه :: شو بدنا نتغدى اليوم !!

المهم اتفقنا نطلب من عند مطعم Bliss House ،، اتصلت عليه و صار التالي:

أسامة : السلام عليكم و رحمة الله و بركاته ،، ممكن نطلب لو سمحت ولا عندك مانع ؟

أحمد (المطعم): أكيد يا باشا ممكن تطلب كل إللي إنت عاوزه ..

أسامة : لو سمحت بدنا الوجبة الفلانية و الفلانية و بدون كاتشب و هات بيبسي معاك لو سمحت

أحمد (المطعم): كولا يا باشا

أسامة : ياخي كل ما نقول كولا تقولولنا بيبسي ،، و لما نقول بيبسي تقولولنا كولا !!

(( قول بيبسي << خارج النص 😉 ))

أحمد (المطعم): ممكن رقم التلفون بتاع حضرتك عشان العنوان ؟

بلا بلا بلا بلا بلا بلا بلا Bla Bla Bla Bla Bla Bla

أسامة : كم بدكم وقت للتوصل لو سمحت ؟

أحمد (المطعم): نص ساعة يا باشا ..

أسامة : إلك 40 دقيقة ،، بس إذا إجيت متأخر ؟

أحمد (المطعم): خليها علينا يا باشا ..

أسامة : أوكي ..

المهم الزلمة تبع التوصيل إجانا بعد 50 دقيقة !!

أخذت الأكل ،، و قلتله شكراً ،، قالي وين الفلوس ؟؟ قلتله تفاهم مع أحمد ..

المهم أنا أخذت الأكل و من باب إني ” أبرّي ذمتي ” اتصلت على أحمد و قلتله هي الأكل وصلنا بعد 50 دقيقة شكراً مع السلامة !!

هلأ لغاية هون ،، مش مشكلة ،، خلصنا أكل و الحمدلله و خلص الموضوع ..

طبعاً قولوا إللي بدكم إياه ،، قولوا حرام قولوا حلال قولوا إللي بدكم إياه !! مش فارقة مع إللي خلّفني ..

هلأ وين الطامة الكبرى ! إن ثاني يوم جاي السواق تبع المطعم بقول الفلوس تبعت مبيرح ما دفعتوها !!

أحـــــــــــــــــــــــــــــــــــا !!

اتصلت على أحمد (المطعم) و قلتله عيب عليك حركات الرخصنة هاي ،، إلا برد بحكيلي قال أنا معرفكش عشان أعزمك ببلاش إنت و إللي معاك و أنا ماليش دعوة و عاوز الفلوس و لو ما دفعتش حجيبلك الشرطة ..

أسامة : بتعرف وين العنوان صح ؟؟ تعال إنت و الشرطة تشوف ،، ناطرك و يا ريت ما تتأخر لو سمحت لأن عندي شغل !!

المهم اتصلت على مديره بدبي و اتفقنا و بلش اللبناني يعتذر إن هذا تصرف فردي و ما بمثل المطعم ولا إدارتها و و و و وو وو و و ،، عبين هيك ،، إجا أحمد (المطعم) عنا ع المكتب و تخانقنا و سمع إللي فيه النصيب و رجع ع المطعم !! ياخي طز فيك إنت و رخصنتك !!

خلص بكفي ما إلي خلاق أكمل بالموضوع تبع المطعم ،،

نرجع نكمل الاحتياجات الفسيولوجية / خلصنا التنفس و الطعام ،، و الماء الحمدلله فديت مي مسافي و العين مو مخلينا عطشانين الحمدلله ،، ضايل الجنس و التوازن و الإخراج ..

الجنس ،، الجمس ،، الجنس ،، الجمس ،، لا لا أكيد ماسلو قصده عن الجمس ،، والله شكله عن جد قصده عن الجنس ،، المهم ،، الجنس برا و بعيد ،، شايفين كيف ،، بالرغم إنها من الإحتياجات الفسيولوجية للبني آدم ،، بس بعدني ماسك حالي و ما تهوّرت الحمدلله 😀 😀 ،، و شكله كمان هاي السنة راح أضل ماسك حالي 😛 😛 ،، شو بدنا نحكي بس ،، الحمدلله يا رب ع كل نعمك 🙂

و إذا ع التوازن ،، فكوكم منه ،، هو ظل فيها توازن !!

و إذا ع الإخراج ،، خشّوا ،، قصدي الإخراج سليم الحمدلله ،، المهم ما يكون وصلكم شي من الريحة 😛 😛

على سيرة الإخراج ،، أخرجتوا اليوم الصبح ولا لسه ؟؟

————

حاجات الأمان ::

(( السلامة الجسدية ، الأمن الوظيفي ، أمن الموارد ، الأمن الأسري و الصحي ، أمن الممتلكات ))

السلامة الجسدية : الحمدلله ما كان في حوادث كبيرة هاي السنة إللي كان فيها اصابات بشرية ،، و ما تخانقنا خناقة محترمة إللي الواحد يقول إنها أثرت ع سلامته الجسدية ..

و بهاي المناسبة ،، بنتذكر بيت الشاعر محمد بن فطيس المري // ولا يغرّك لو بدا جسمي سليم ،، والله إن جسمي سوار المقبرة //

مين سليم ؟ عرفتوا شو صار معه ؟

الأمن الوظيفي : الحمدلله صابرين علي ،، و المدير الجديد مقتنع بأدائنا ،، (( و العهدة على الراوي )) ،، بقولوا في نية ترقية ،، إن شاء الله يا رب تتيسر و تتم على خير ،، و شغلي الخاص كمان في تحسن الحمدلله ،، الحمدلله ،، الحمدلله ..

أمن الموارد : من كثرها عاد !

الأمن الأسري و الصحي : الأسري مش بزيادة بصراحة ،، لأن في ناس الأولويات عندها مختلفة للأسف .. و الصحي كمان مش بزيادة ،، ممممممم ،، مش جاي على بالي أحكي عن حالتي الصحية لأن أصلاً المدونة ما راح تكفي أحكيلكم 🙂 🙂 🙂 و لما الدكتور شافني اكتفى بقول : الله يعينك .. بس الحمدلله على كل النعم 🙂 🙂

أمن الممتلكات : ممتلكاتي هي نفسها من السنة الماضية ،، ما فيها تغير الحمدلله << كيف بس ؟؟ حسستكم إن عندي كثير ممتلكات و مقتنع و مكتفي الحمدلله و مش عارف وين بدي أروح فيهم .. هههههههههههههههههههههه

————

الحاجات الاجتماعية ::

(( الصداقة ، العلاقات الأسرية ، الألفة الجنسية ))

الصداقة : قرفت نصكم .. و مثل ما بقول المتفلسف الغبي إللي بعيد الحكي كل سنة مفكر حاله مخترع شي جديد لما تسأله شو علمتك السنة الماضية و بجاوب : بينوا أصحابي و طبية قلبي و الكلام العبيط هذا ..

المهم ،، يا ريت الموجودين حالياً يطولوا أكثر و أكثر ،، لأني ما إلي خلاق أصاحب ناس جداد 🙂

العلاقات الأسرية : شو بدي أحكيلكم لأحكيلكم .. الحكي ما بكفي أعبر عن العلاقات الأسرية ،، بس بقولوا إمي إن شاء الله ناوية تزورنا قريباً ..

الألفة الجنسية : الجنسية أردني الحمدلله ،، عم بنفشخ بما فيه الكفاية ،، و مثل ما قالت نجوى كرم // فشختيني !! ههههههههههههههه

————

الحاجة للتقدير ::

(( تقدير الذات ، الثقة ، الإنجازات ، احترام الآخرين ، الاحترام من الآخرين ))

تقدير الذات : ذاتي أكبر من إن واحد مثلي يقدره 🙂

الثقة : ثقة ولا ضمان << إيــــــع ،، نكتة بايخة و قديمة و أصلاً نصكم ما فهمها ،،

على كل حال ثقتي كبيرة في حالي و في إمكانياتي ،، و لو حتى مرات البني آدم بمر بمراحل اهتزاز بالثقة ،، بس عادي ،، الطيارة بتطير رحلات لمدة 16 و 17 ساعة ،، و بتتعرض لبعض المطبات و الاهتزازات ،، بس العبرة في النهاية إنها بتوصل للي بدها إياه إن شاء الله ،، و بتنزل على الأرض بثبات .. و هذا أهم شي إن شاء الله 🙂

الإنجازات : يمكن ما أنجزت كثير هاي السنة ،، أو بالأحرى ،، ما أنجرت شي إللي يرضي غروري ،، بس بعدني بمرحلة المطبات 🙂 إن شاء الله بتجاوزها هاي السنة 🙂 و راح أورجيكم هاي السنة شو راح أسوّي إن شاء الله ..

احترام الآخرين : كان في نقاش دايماً بيني و بين أمنا سمية – حفظها الله و رعاها – على مسألة الإحترام ،، إن هي بتحكيلي لازم الواحد يحترم إللي أكبر منه و و و وو و و و و أسامة ما كان يحترم حدا إلا ع مزاجه ! الموضوع عندي مرتبط بالتصرفات ،، مش بالعمر ! و ما زال النقاش مستمراً والله .. بس على الأقل ،، دايماً بنحاول نحترم كلمتنا إللي بنعطيها للناس و نلتزم فيها ..

و أصلاً أصلاً أصلاً أصلاً ،، أنا محترم ،، بس المشكلة عندي لسان بغيّر ألوان وجهك لو تغلط !! الله يحفظه يا رب 😀 😀

و أصلاً عادي ،، نفس الخطا منهم ينعاد و أزعل ،، و ينعاد و أرضى ،، و ينعاد و أسكت ،، و ينعاد و أسامح ،، و ينعاد ..

أما عن الإحترام من الآخرين : هذا إنتوا بتجاوبوا عليه ،، مش أنا .. بس على كل حال // شكراً للي بحترموني مع إنهم مش طايقيني 🙂 كمان بنوجه دعوة للبعض بأنهم يهتمي فيني لأنه غيرهم مستعد يبدع بإهتمامه ..

بس R.R بالذات ما بدي أحترمه ،، ولا بدي احترامه لإلي !!

————

الحاجة لتحقيق الذات ::

(( الابتكار ، حل المشاكل ، تقبل الحقائق ))

هاي هي قمة الهرم ،، الحاجة لتحقيق الذات ،، كثير منا بقولك / مش ملاقي نفسه / أو / مش محقق ذاته / ،، هاي مشكلة ،، و هاي مشكلة كبيرة ،، لأن هاي هي أسمى مراتب الاحتياجات تبعت النفس البشرية ،، و إللي مهما كانت الإحتياحات الثانية موجودة ،، ما راح يكتملوا بدون وجود رأس الهرم ..

ابتكرنا كثير كثير شغلات ،، و كثير شغلات منها للأسف ما كملنا فيها ،، مرات وقت ،، مرات ظروف ،، مرات ارتباطات بمشاريع ثانية ،، مرات الخنوث إللي اتكلنا عليهم و ما بحترموا كلمتهم !! 

على كل حال / بنقول إن شاء الله ننجز شيء إضافي بـ 2014 ،، مو من شان شي ،، بس مو حلو نأجلهم كمان مرة لغاية 2015 !! خخخخخخخخخ

و حل المشاكل ؟ بحل وحدة بطلعوا عشرة الحمدلله ،، و بعدني عم بحل ،، كثير كثير كثير كمية المشاكل إللي كانت عندي هاي السنة ،، مع تقريباً (( كل )) البشر إللي حواليني ،، أما المشاكل مع الحيوانات ،، مش سائل عن حلها أصلاً 🙂

خليني أخلص من البشر إللي بهمني أمرهم ،، و بعدين بشوف الحيوانات شو عم تعمل 🙂

و آخر أقسام الحاجة لتحقيق الذات هو تقبل الحقائق ،، و هاي أنا عندي كثير مشاكل فيها كمان ،، جزء منها العناد ،، جزء منها هو تركيبة شخصيتي ،، و جزء مني إني ما بعرف ليش بضل أنا دايماً بحب أكون الشخص إللي بحط الحقائق و بصنعها ،، مش إللي بفترج عليها و بحاول يتأقلم معاها ،، لأني فاشل في التأقلم مع الحقائق إللي حواليني .. / نسأل الله الثبات / 🙂 و كمان نسأل الله القدرة على تقبل ما لا أستطيع تغييره 🙂

————

.. قصف (( 2013 )) عشوائي ..

طبعاً في شغلات ثانية غير هاي الاحتياجات ممكن أحيلكم عنها .. مثلاً إيماننا موجود الحمدلله ،، بالرغم إني مرات بحس إنه ضعيف ،، عشان هيك الواحد لازم يقوّي إيمانه ،، حتى لو الشغلات المحيطة فيه ما بتساعد أو عم بتحرضه على شغلات ثانية و ناس ثانيين ..

و كمان بدي أشكر كل واحد أعطاني كلمة و احترمها ..

و كمان يسلمو للناس إللي اتصلوا فينا و نحن كنا مقصرين معاهم هاي السنة ..

و بنقول كمان / إلهي حقق لي حلماً بات يكبر بداخلي يوما بعد يوم ..

السابع من سبتمبر كان يوم منيح الحمدلله ،، تنشوف شو نتايجه ..

الأول من ديسمبر كان يوم سيء الحمدلله ،، تنشوف شو آخرته ..

أكبر كذبة مستمرة / بلاد العرب أوطاني .. ما ظل فيها شام ..

مشكلتي الحقيقية ليست النسيان، مشكلتي كثرة الذكريات ..

اللهم ارزقني نعمة يعجز عنها شكري ،، ولا تبتليني بلاءً يعجز عنه صبري ..

في مواقف بحياة البني آدم ،، بعدها الحياة ما بترجع نفس ما كانت قبل هاي المواقف ..

الله يجعل 2014 سنة خير إن شاء الله يا رب ..

هذا و بعدني ما عبّرت عن شي ..

كتبت ،، و قد أيقنت يوم كتابتي ،، بأن يدي تفنى ،، و يبقى كتابها ،، فإن كتبت خيراً ،، سأجزى بمثله ،، و إن كتبت شراً ،، عليها حسابها ..

==================

“” برا و بعيد “”
من فيلم ” Star Trek Into Darkness “ 

عيشة شو يا شيخ !!

التعليق :: مثير للإشمئزاز ،، إنغماسهم بدور الأبرياء ،، رغم ضجيج صوت الضحايا بداخلهم ..

==================

.. و ها قد بدأ العد التنازلي ..

5 4 3 2 1

.. أهلاً 2014 ..

و السلام عليكم و رحمة الله و بركاته

6833 Total Views 1 Views Today