بعد التدوينة السابقة ” القوية ” ! و إللي كان إلها ردود فعل إيجابية و سلبية ،، و بعضها ” غبية ” ،، بس يلا مو مشكلة ،، قلنا لأنفسنا ،، يا أسامة بن زيد ،، Think Oz, Think Future ،، عشان هيك قررت أحط بعض النقاط و الأمور و الضوابط و الشروط و الوحام و المحددات للي بدي إياها بشريكتي المستقبلية و شو كمان لازم تعرف عني من هلأ !! و إذا عندها شي ،، عادي تكتبه وين ما بدها !! خصوصاً بعد ما (تقريباً) شفت كل العيّنات إللي أخذوها الشباب أصحابي 😀 😀

و من باب التوضيح فقط ،، الخبرات هاي من ” مجموع ” ما شفته ،، يعني عادي إذا حسيت الحكي عليكم ،، لا توخذوها بطريقة شخصية ،، بالعكس ،، أنا عم بحاول أستفيد منكم بطريقة منيحة والله 🙂 🙂

طيعاً عشان تكونوا بالصورة ،، أنا مش طالب ملاك ،، ولا وحدة ” عاملة ” حالها ملاك ،، طالب وحدة بـ ” تحاول ” تكون ملاك ،، بنية صافية !!

إذا ع الشكل ،، خلقة ربنا ،، بس إن يعني أنا طولي 158 سم و مرات 160 سم ،، و وزني بوصل للـ 55 كيلوجرام ،، فمش تجيني وحدة في فرق كبير بيني و بينها بالطول سواءً بالزيادة أو بالنقصان ،، و نفس الشي بالوزن ،، مش تجيني وحدة مليانة كثير !! ولا تجيني وحدة تكون ” شلمونة ” !! غير هيك ،، أنا بعرفش أفصّل خشمها كبير و عيونها صغيرة و بوزها طالع لقدام و شعرها قصير ولا طويل ولا ملفلف ولا ناعم ..

يعني خلقة ربنا ما راح نحكي فيها .. بس المهم تفتنّي 😉

و إذا ع العمر ،، فأنا انولدت في يوم الجمعة 4-أكتوبر-1985 ،، يعني يكون عمرك مش بعيد كثير عني !!

أما تصرفات البني الآدمين ،، بدنا نحكي فيها ،، و كثير كمان ..

طب الجرة ع تمها ،، بتطلع البنت لأمها ..

بدي أصاحب الأم قبل ما أشوف البنت !! آه ،، كيفي أنا !! حدا عنده مانع !! أنا إللي بدي أتجوز ولا إنت ياخي !! بدي ” أم ” تكون مممممممم يعني خلينا نقول منيحة ،، يعني مثلاً بتعرف شو يعني زوجها ،، و شو يعني بيتها ،، و كيف تهتم فيهم الإثنين ،، و في حالها !! مش تجيني وحدة بعد سنة ولا سنتين ألاقي ريحتها بس طبخ و مش سائلة عن حالها ،، مو من شان شي ،، بس عشان عيني ما تروح هون ولا هون 😛 😛 << الشرع بحلل أربعة ،، فلا تخليني أحتاج أشوف وحدة ثانية 🙂 🙂

بدي أمها تكون كمان تكون ” مطيعة ” و ” على شور زوجها ” ،، مش تكون هي إللي حاكمة البيت ،، ولا راسها براس زوجها !! ولا زوجها خرطي ما إله كلمة ،، يعني المَرة بدها تمشي على شور زوجها ،، مش زوجها ماشي على شور مرته !! يعني صحيح الواحد لازم يوخذ رأي مرته في كثير أمور ،، بس إسمها :: استشارة ،، و له الحرية في إن يمشي عليها و لا لأ ،، بس مش تكون الأم ” قامعة ” دور الأب و هو بحكي حاضر لكل شي !! يعني أحا !! زلمة إنت ولا خروف !! راجل إنت ولا مش راجل يا متعلمين يا بتوع المدارس !!

يعني فعلاً اكتشفت قديه دور الأم مهم بهاي المسألة ،، يا بتخرب بيت بنتها ،، يا بتعمره و بتسعده !! طبعاً بجزء كبير !!

بابا جاي إمتى ؟

بنت بابا ما اختلفنا ،، بس إن شاء الله أبوكي يكون بعرف الحق ،، و يكون هو إللي حاكم البيت ،، مش ” تبيع ” لرأي مرته !! و يكون “ رجّال يئبرني شو رجّال ” ،، لما بنته تزعل و تيجي لعنده ،، يحكم بالعدل ،، و يسعى لإصلاح بيت زوجها ،، ” محضر خير ” ،، مش ” مقطّع أوصال ” !! إن شاء الله تكون واضحة ..

آخ من الـ ” أخ ” ..

إن شاء الله أكون أنا و أخوكي أصحاب ،، بس إن شاء الله يكون منيح معاي مثل ما أنا ناوي أكون منيح معه ،، مو من شان شي ،، بس عشان يوقف معاي بعدين 😛 😛

و صح ،، علاقتي بإخواني بدك تعرفي وين حدود تدخلك فيها ،، و علاقتك بإخوانك كمان لازم يكون في حدود لتدخلي فيها ،، كلنا أهل ما اختلفنا ،، بس يمكن في شي أهلك ما بحبوا إني أتدخل فيه ،، أو العكس 🙂

الباب إللي بجيك منه الريح ،، إخلعه عشان ما يوجعلك راسك !!

و من هذا الباب ،، أنا بدي وحدة يكون أهلها مش هون ،، قصدي يعني مش عايشين بالإمارات ،، أيوا ،، طبعاً ،، مش كل يوم بدي أكون عندهم !! و لا كل ما صارت مشكلة ألاقي مرتي سحبت حالها و راحت ع بيت أهلها !!

هيك بتصير إذا بتزعل هي ،، بتظل في البيت ،، و أنا بظل في البيت ،، يا بتنحل المشكلة ،، يا بتنحل ،، يا بتنحل ،، يا حدا بنام في الغرفة و الثاني بنام في الصالون في أسوأ الحالات 😀 😀 ..

و شو المشكلة ؟

يعني ما تقنعوني إن في حياة زوجية بدون مشاكل ،، بس بالنسبة لإلي ،، صح إني مرات كثير يمكن بكون عصبي ،، بتقبل اللت و العجن ،، و بنفس الوقت بحب الإختصار ،، فإنتي بدك تعرفي متى تسولفي كثير ،، و متى تختصري ،، و متى تستريحي !! عشان هيك ،، المشكلة بدها تنحل ،، لا مفر ،، يا بتقبلي في المشكلة ،، يا بنحلها ،، يا بنأجلها ،، يا شو ما يكون ،، المهم قاعدين وجوهنا بوجوه بعض !! و المشكلة بدها تظل و تظل و تظل للما نتفق على حل مشترك !! فاهمة ؟؟ ولا أكمل الشرح ؟؟

أبوي و إمي ،، و أبوكي و إمك ..

بالبر و بالإحسان و بالخير ،، غير هيك ،، خط أحمر 🙂

أنـــــــــــــــــــا ..

شوفي يا ستي ،، لاني نسونجي ،، و لاني بشرب (بسكر) ،، و لاني كل يوم مع وحدة ،، و لاني بشرب قهوة (بس قهوة عربية) و لا حتى شاي !!

بحترم كلمتي ،، و بدك تحترميها كمان !! كانت صح ولا كنت غلط ،، بدك تحترميها !! بس إنتي و شطارتك كيف تقنعيني إن ممكن يكون في كلمة ثانية أحسن 🙂

صح ،، يمكن أنا ما أكون أحسن واحد بالحياة ،، بس كمان أنا مش ماخذ أحسن وحدة بالحياة !! أنا بدي وحدة بتظل تحاول تسعى إنها تكون الأحسن بنظر زوجها ،، و بس ،، نظر زوجها هو المهم .. I’m the Loyal One 🙂

تأكدي إن عندي الشجاعة أحكي معك بأي موضوع ،، جديد كان ولا قديم ،، بس بحب أذكرك بالآية رقم 101 من سورة المائدة // ( يَا أَيُّهَا الَّذِينَ آمَنُواْ لاَ تَسْأَلُواْ عَنْ أَشْيَاء إِن تُبْدَ لَكُمْ تَسُؤْكُمْ ) 🙂  ..

صح ،، أبوي أردني من عيلة الحباشنة ،، و إني من فلسطينية لبنان بيت عبد الهادي السعدي ،، و أنا مواليد الإمارات ،، يعني عادي الكلمات تطلع معي مكس !! الشغلة الوحيدة إللي متأكد منها ،، إن فيني نسبة / دفاشة / مش بطّالة لوووووول ،، بس ما عليكي شوي شوي عم بتخف الحمدلله ،، بدك تتحملي ؟؟

آه و أنا بحكي ” مبيرح ” ،، مش ” مبارح ” !! يعني عشان ما تتفاجئي لما تسمعي هاي الكلمة و تقوليلي يرحم ستك إللي كانت تحكي مبيرح !!

و ما عندي مبدأ هذا ابن بلدي !! يعني بدي أعامله غير عن الثاني ،، حسب مواقفه معاي و تعامله معاي ،، بعامله ،، بس ما عليكي ،، بحب أكون أحسن من الكل ،، إن شاء الله بنصير أحسن من الكل مع بعض 🙂

و كمان بحب الشعر ،، و بحب أذكر بهالمناسبة بيت الشهر هذا //

بنت ليا منّك وقعت تشيلك من القاع ،،
أبرك من وجيه الرجال إللي ليا طحت جفَلت ..

و مثلي مثل أي بني آدم ،، فيني شوية عناد ،، شوية صغيرة بس ،، مش كثير ،، يعني عادي أتنح على أغنية ولا أكلة ولا ولا ولا شو ما يكون ،، لازم تفهمي زوجك و تعرفي كيف تتأقلمي مع الوضع و تدعميه و تسانديه ،، مش تنكدي عليه كل مرة !!

و كمان فيني برودة دم – مرات – لدرجة إن ممكن أسبب صداع للأسبرين !!

بفكر كثير ..

و بقولوا عني إني بصرف كثير !! بعرف إن لدرجة معينة هاي شغلة مش منيحة ،، بس إن شاء الله بعد الزواج بصير الصرف على شغلات بتستاهل !!

في مشروع إن أشتري بيت في الأردن ،، فشدي حيلك معاي إن شاء الله عشان يصير المشروع واقع ،، واقع على الأرض ،، مش واقع على راسي !!

هــوايــــاتــــي ؟؟

يا ريت يكون في هوايات مشتركة بينا ،، يعني أوكي لما أكون بحب شغلة ،، راح تجامليني و تعمليها معي ،، و لما تكوني بتحبي شغلة ،، راح أجاملك و أعملها معك ،، بس لازم يكون في هوايات مشتركة !! منها بنتسلى مع بعض ،، و منها بلا المجاملات بيننا يعني !! مش مستاهلة والله !!

خلي عندك خبر ،، بحب حالي ،، و بحبك كمان !! بس هاي مش هواية 🙂 هاي احتراف 😉 ،، المهم ،، يعني بتابع مباريات كرة قدم ،، بشجع الجزيرة الإماراتي – مانشستر سيتي – برشلونة – و منتخب إيطاليا طبعاً !! الإتحاد السعودي كمان !! بلعب بلاي ستشين كمان ،، بحب السينما !! بحب السواقة !! مش تفكري إن راح نقضيها مشاوير يعني !! بحب أحط فيلم على التلفزيون و أقعد أتفرج عليه و أدلع حالي في البيت !! بحب كمان طلعات البر !! و عادي ما عندي مشكلة مع القعدة في الحديقة ،، أوكي ما بحب أشوي كثير ،، بس عادي ،، شوي شوي بنتعود ع الشوي كمان ،، بتموني 🙂 ” التسوق ” حسب المزاج عندي والله !! فلا تتوقعي إني أكون كثير مبسوط لما نروح ع السوق ،، و أصلاً أول شي بدوّر عليه بس نفوت على أي محل هو : كرسي أقعد عليه خخخخخخخخ << يعني عشان ما أكذب عليكي والله .. بحب أسافر ،، بس عمره ما خلص جوازي مو كثر الأختام 🙂 🙂

و عادي بلعب شدة ،، 14 ،، 400 ،، هَند ،، طرنيب ،، حتى باصيرة و كينت ،، بس ما بعرف ألعب تريكس !!

ممممممممم ،، شو في كمان هوايات ؟؟ خلص إذا تذكرت شي ببقى بحكيلك عنه بعدين إن شاء الله !!

خش شوي بالشخصية ..

نكد ؟؟ قليل منه لا يضر 🙂 🙂

مشاكل ؟؟ أوكي أنا موافق ،، بس مو كل يوم كل يوم يعني !!

بدك أرجيلة ؟؟ ممممممممممكن نفكر بالموضوع !!

دلعيني ،، بدلعك !!

بدلعك ،، بتدلعيني ..

ما بدلعك ،، بتدلعيني ..

ما بتدلعيني ،، بكسر راسك 😉 😉

بدي عيشة ” هنيّة ” ،، بس برجع بقولك ،، قليل من النكد لا يضر ،، يعني أكيد النساوين نكد ،، و الشباب كمان ،، بس إن يعني مو ع كل شي نقلب نكد !!

صح و بحب أذكرك إن الزوجة إذا ما كان زوجها راضي عنها ،، ما بتشم ريحة الجنة 🙂 بس – إن شاء الله – أكون أنا كمان معاكي منيح كثير 🙂

غير هيك ،، في موضوع مهم بدك تعرفيه ،، أبوي و إمي بتمشكلوا في البيت ،، و أبوكي و إمك بتمشكلوا في البيت ،، أنا ما بعرف عن مشاكلهم ،، و إنتي ما بتعرفي عن مشاكل والديني ،، بتعرفي ليش ؟ لأن :: What’s in Vegas, Stays in Vegas !! يعني المشاكل إللي بتكون في بيتنا ،، بتظل في بيتنا !! مش تشاوريلي فيها فلانة و فلانة و تصيري تسمعي من فلانة و تلحقي كلام فلانة و مدري شو !! هاي المشاكل بيننا ،، بتظل بيننا !! هذا الموضوع بالذاب ما بحب أحكي فيه كثير !! بنفس الوقت ،، هذا الموضوع كثير حساس !! و أتمنى أتمنى أتمنى إني ما أعيد و أزيد بهذا الموضوع كثير .. لأني ما راح أتهاون فيه بالمرة !!

و يا ريت لما تحكيلي شغلة ،، تحكيلي مين إللي بحكيها ،، ما بحب كلمة :: بقولوا !!

و تكوني بالغة عاقلة راشدة ،، مش طفلة !! و كل همّك الكرتون !!

ناوية تختبريني بالخطبة ؟؟

بحب أحكيلك كم شغلة بخصوص موضوع الاختبار ،، الأولى : لا تختبريني ،، لأنك راح تتعبي 🙂

الثانية بحب أحكيلك كمان إني مش راح أختبرك ،، مش راح أحطك في ” موضع ” اختبار لأن بالأخير بدي وحدة إللي تكمل العمر معاي ،، مش فترة الإمتحان بس و بعدين تنسى المقرر !!

و الثالثة إن ما بحب أقارن بينك و بين فلانة ،، فلا تحطي حالك بهيك موقف أصلاً ،، مع إن أكيد راح تكوني إنتي الأحسن ،، ولا ما كنا اخترنا بعض << كيف بس ؟؟

و الرابعة و الأهم ،، إني بتصرف بـ عفوية !! فـ الله أعلم كيف بدك تفسري تصرفاتي !!

حبيبي وين بدنا نعمل العرس ؟؟

أقولك و ما تزعلي ؟؟ دعابة دعابة ،، قلنا الإحترام !! المهم ،، لوقتها فرج و رحمة ،، بس ممكن فندق ،، ممكن قاعة ،، ممكن بيتنا !! ما في شي محدد ،، حسب إمكانياتنا ساعتها بنحدد وين ،، عشان هيك خليني أعرف أجمّع شي منيح للعرس لو سمحتي و لا تطلبي كثير شغلات وقت الخطبة !!

صح و حابب أحكيلك شغلة كثير كثير كثير مهمة ،، أنا كثير عملت مقالب بالشباب يوم عرسهم ،، يعني لا تزعلي إذا عملوا شي مفاجأة !! عادي جداً !! الحياة سلف و دين ،، و أنا مسلف الكل الحمدلله 😀 😀

طيب و شهر العسل ؟؟

أول محل بدي أروحه معك – إن شاء الله – هو مكة المكرمة !! بعدين ممكن ننحرف على راحتنا 🙂 أو كمان ممكن ننحرف أول ،، و بطريق الرجعة للإمارات إن شاء الله بنروح على مكة ،، المهم مكة لازم نروحها إن شاء الله ،، يعني ولا مرة رحت لهلأ ،، و مكة بالذات نفسي كثير أروحها ،، أما وين بدنا نروح كمان ،، فالقرار متروك لوقتها ،، بنشوف دولة مستاهلة ،، يعني مثلاً قبرص ،، اليونان ،، المغرب ،، التشيك !! يعني مش راح أبطر أكثر من هيك ،، إلا إذا والله حدا بحب يهديني شهر العسل !! مش لازم يكون شهر شهر ،، ممكن نمشيها أسبوعين لوووووووووووووووووول

طيب إنت قديه بتحبني ؟؟

بحبك لدرجة إني مأمنك على حياتي ،، مش تغدري فيني و أنا نايم ولا تسمميني 😛

و كمان صحيح ،، بما إن الدراسات أثبتت إن الحب الموجود قبل الزواج بروح بعد الزواج ،، أنا حاب أبدأ حبي لإلك من بعد الزواج 🙂 عشان يكبر و يكبر أكثر ،، منيح هيك ؟؟ >3

حبيبي كمّل صحني أنا شبعت !!

شوفي يا حبيبتي ،، كل إللي تزوجوا ،، كرشتهم صارت كيلو قدام !! و السبب إن نساوينهم ما بتكمل أكلها ،، و هو بضطر يجبر الصحن ،، باختصار ،، مش حاب أكون هيك !!

طيب و شو بخصوص لبسي ؟؟

شوفي يا شيخة ،، عن نفسي ،، ما عندي مشكلة تكوني محجبة ولا لأ !! بنحكي فيها بوقته إن شاء الله ،، بدي ما يكون عندك مشكلة بلبس البنطلون !! و بحب الفساتين إللي من فوق لتحت !! و التنورة ،، بس مش كل تنورة تنورة !! الجلباب ما بحبه !! و لما نكون في البيت ،، مش مهم اللبس كثير 😀

ما اختلفنا إن هاي مسألة أذواق ،، بس إن يعني أنا حبيت أحكيلك شو بحب و شو ما بحب !!

الخلاصة المهمة // لا تحرجيني قدام ربنا بسبب لبسك لو سمحتي 🙂

بالمطبخ ..

صحيح إنتي متوقع الحصول على جواز سفر إيطالي من كثر ما راح آكل معكرونة و باستا و سباغيتي و من هالحكي ،، بس يكون بعلمك ،، عندك سنتين / خلالهم بدك تكوني بتعرفي تطبخي : منسفمفتولفريكةورق عنبمعكرونة بالباشاميلبطاطا بكزبرة ( هاي بسيطة ) – بازيلا و فاصوليا و لوبيا – الباميا ما بحبها كثير 😀 – البرياني و المندي بنجيبه جاهز لا تلبكي حالك فيه – ..

آه صح ،، السباغيتي بحبها تكون طويلة ،، مش تقصيها ..

و معاكي سنة زيادة عشان تتعلمي / الكروش و الفوارغ / !! فاهمة ؟؟ مش تجيني وحدة ما بتحبه !! ولا وحدة تحكيلي روح عند أمك تطبخلك إياهم !! فاهمة كمان مرة ؟؟ قال ما بنوكل كروش قال !!

و عادي ،، مش فارقة معاي إذا بتحبي الكاتشاب ولا لأ ،، أنا عن نفسي ما بحبه كثير يعني ،، بكال خردل و مايونيز و ثاوزيند سالاد 🙂

و مش لازم تطبخي كل يوم ،، عادي باكل أكل بايت يومين و ثلاثة ! المهم يكون مبطوخ في البيت ! و مش غلط إذا كل أسبوعين أكلنا برا ع الغداء ،، العشاء عادي يكون كل يوم ماكدونالدز ،، مش إشكالية يعني ،، بس كمان بحب البيض بالهوت-دوج ( و ممكن أساعدك و إنتي عم تعمليه ) ،، و سلطة الشمندر و الجزر ،، و هيكا يعني !!

و عن نفسي ،، ما بحب آكل بصحون ” Gــزاز ” ،، بضايقني الصوت لما كل شوي تضرب المعلقة بالصحن !!

و عشان ما تحرجيني في يوم من الأيام ،، ولا تحرجي حالك ،، عادي ،، مش راح أظل أعلق كثير إذا كان الأكل ناقص ملح ولا زيت ،، المهم الرز يطلع مستوي 😀 ،، بس إنتي كمان – الله يهدينا و يهديكي – عادي إذا بتذوقيه و إنتي عم تطبخيه ..

و صح نسيت أحكيلك ،، بدك تقومي بعزايم !! مش مثل مرت واحد من الشباب قال ما بعزمنا عنده لأن ما بحب يخلي مرته تطبخ !! بدك تقومي بعزايم !! بدك تقومي بعزايم !! بدك تقومي بعزايم !! مش تحكي ما حكيتلك !! بس ما عليكي ،، إنتي بيّضي وجهي في العزايم ،، سواءً قدام أهلي ولا أهلك ولا أصحابي و لا صاحباتك ،، و أنا بدلعك ،، لا توصي حريص 😉 :*

و – الله يرزقنا – يا رب و تظل اللحمة موجودة ع الوجبات دايماً !! شوفي يا شيخة ،، أبوي إذا الأكل ما فيه لحمة ،، ما بعتبرها وجبة !! أنا مو هيك ،، أنا إذا الأكل ما فيه رز ،، ما بعتبره وجبة ،، يعني بمر يوم و ما بكون في رز ع الأكل ،، و بمر اليوم الثاني و ما بكون في رز ع الأكل ،، و بمر اليوم الثالث و ما بكون في رز ع الأكل ،، اليوم الرابع بتكوني في ” الوطن ” 🙂 حالة وحدة بس إللي ممكن أسمح فيها ما يكون في رز ،، إذا كانت الوجبة إللي عم نوكلها هي أحد الأكلات المذكورة سابقاً ،، و يا ريت تكون كروش أو مفتول 🙂

آه صح ،، سمك و ملوخية ناعمة – تبعت الفلسطينية – ما باكل ،، الملوخية ورق (ناشفة) ضيفيها ع الليستة كمان لو سمحتي ،، مش فارقة معاي إذا بلحمة ولا دجاج ،، المهم الملوخية نفسها ،، آسف نسيت أحكيلك إياها قبل شوي ،، هيني بعتذر ،، مش تقولي أسامة ما بعتذر !! مع إني ما بحب أعتذر والله ،، ولا بحب حدا يعتذرلي ،، التصرفات الجاية كفيلة بتصليح الغلط 🙂 في شي مش واضح لغاية هلأ ؟؟

رايح جاي ،، رايحة جاية ..

نوعية الزيارات و الطلعات الأولى / للأهل ،، إذا كانوا أهلي و أهلك في بلد واحد ،، بسيطة ،، إجازة ثلاث أسابيع ،، أسبوعين عند أهلي و واحد عند أهلك ،، هيك شي يعني .. إذا كانوا أهلي و أهلك في بلدين مختلفين ،، بنشوف كيف بنرتبها ساعتها أنا و إنتي 🙂 🙂 و لو ،، أهلي أهلك ،، و أهلك أهلي – إن شاء الله 🙂

نوعية الزيارات و الطلعات الثانية / هلأ شوفي يعني ،، هم أصحابي ( أو فيكي تقولي إخواني ) كلهم كم واحد ،، تعرفي على نساوينهم ،، عجبوكي ،، صاحبيهم ،، ما عجبوكي ،، إنتي حرة ،، بس تذكري إن هذول راح يضلوا أصحابي و إخواني ،، فإذا بينك و بين مرته شي ،، أنا ما خصني فيه !! يعني يمكن إنتي ما راح تطيقيها ،، أو هي ما راح تطيقك !! المهم أنا أظل أطيق صاحبي و أخوي ،، هلأ إذا هو بطّل طايقني عشان مرته مش طايقيتك ،، ساعتها خليها عليّ ،، أنا بشوف كيف أتفاهم معه ،، و اقتراحك مرحّب فيه ساعتها والله 🙂 🙂

و لازم أحكيلك إن ما بحب النقاشات تبعت سعر البندورة ارتفع ،، و البامبرز عاملين عرض ،، و البطاطا الأردنية أحسن من اللبنانية و من هالحكي !!

و على سيرة أصحابي و صاحباتك ،، فرصة بما إن فتحنا الموضوع ،، يا ريت ما تحكيلي في يوم من الأيام شوف فلان شو جاب لمرته ولا شو فلان شو عمل لمرته !! هاي حياتي أنا ،، و حياتك إنتي ،، حياتنا ،، كل إثنين متزوجين عندهم حياتهم الخاصة و ظروفهم الخاصة ،، فكمان بطلب منك إنك تركزي على إللي عندك ،، و تعرفي كيف تنمّيه ،، مش تنقّي فيه !! و ما إلي خص إذا زوج أختك جابلها شي لازم أجيبلك مثله !! حياتنا نحن !! قناعاتنا نحن !! إمكانياتنا نحن !!

نوعية الزيارات و الطلعات الثالثة / ” الواجبات الإجتماعية ” ،، يعني و العهدة على الراوي ،، إني ” بحترم الواجب ” ،، إن شاء الله راح تحترميه إنتي كمان ،، حتى لو مش عاجبينا ،، اعتبريها ” دواء ” ،، طعمه يمكن يكون مقرف ،، بس مجبورين عليه !!

نوعية الزيارات و الطلعات الرابعة / بدك تطلعي مع صاحباتك ،، أوكي .. بدي أطلع مع أصحابي ،، أوكي ،، بس يا ريت ننتبه على ” العيار ” !! كمان أوكي ؟؟

نوعية الزيارات و الطلعات الخامسة ( و هاي الأهم ) / أنا و إنتي لحالنا ،، و الشيطان ثالثنا !! لووووووووووول بمزح بمزح ،، قصدي عن الطلعات إللي بطلعها أنا و إنتي لحالنا ،، يعني هاي خليها خاصة بينا 😉 😉 ،، بس إن كارفور بلاش ما يكون مرة كل أسبوع ،، بنحاول خليها مرة كل أسبوعين،، بنحاول ،، إن عشان نلحق نعمل شغلات ثانية في العطلة بدل ما يضيع وقتنا بين كارفور و اللولو و الجمعية و سوق الخضرة 😀

آه صح ،، بدي أحكيلك شغلة ،، لما أكون طالع مع أصحابي ،، أوكي بتصليلي مرة ،، مرتين اشتقتيلي ،، ثلاثة بدك شي للبيت أجيبه معاي و أنا جاي ،، الرابعة بتكون عن جد كثير !! يعني الشغلة مش تطفيش ،، بس كمان يا حبيبتي مش أذى !!

و كمان بدي أحكيلك شغلة ،، لما نكون في بيت واحد – إن شاء الله – و أكون طالع مع أصحابي ولا إنتي طالعة مع صاحباتك ،، يا ريت كل حدا يبلغ الثاني وين هو ،، لعدة أسباب ،، الأول يعني من باب إن بنتطمن على بعض ،، و الثالث من إن إذا بدي أمر آخذك ،، و الثاني إن يعني إذا – لا قدّر الله – صار شي و ما رديتي علي و لا خلصت بطارية تلفونك ،، أعرف وين ألاقيكي !! مش تفكريها يعني من باب المراقبة ،، لا والله مو هيك قصدي ،، بس إن يعني أنظري إلى الجانب الإيجيابي في الموضوع يا حبيبتي :*

و يا ريت تكوني بتعرفي تسوقي !! أسهل عشان توخذي ليسن إماراتي – إذا ما كان عندك ،، و مو مشكلة ع السيارة ،، بنزبطها إن شاء الله 🙂

و في نوع طلعات كمان تذكرته هلأ ،، النوع السادس من الطلعات / للصالون !! أوكي بدك تزبطي حالك و ترتبي حالك و تهتمي بحالك عشان زوجك ،، و هذا شي أكيد كل إنسان بحبه !! بس يعني مش من صالون لصالون !! عادي شوفي صالون و لا إثنين بالكثير و خلصي أمورك معاهم ،، و يعني مش عشرين مرة بالشهر !!

و بما إن فتحنا هذا الموضوع ،، ” التبرج ” حلو لزوجك ،، مش للشعب كله !! متفقين ؟؟ و ع فكرة ،، ما بحب التخبيص و التلوين كثير بالوجه لو سمحتي !! خصوصاً يوم العرس !! مش حابب أشوف وحدة ما بعرفها واقفة جنبي !!

إنت شو بتشتغل ؟؟

وظيفتي منيحة الحمدلله ،، الحمدلله ،، الحمدلله ،، الله يرفعني فيه أكثر و أكثر ،، و شغلي الخاص كمان الحمدلله الحمدلله الحمدلله في تحسن مستمر ،، لازم تعرفي عنه طبعاً ،، و ببقى بشاركك فيه يعني .. بس هذا شغل جانبي ،، يعني لا تتكلوا عليه كثير 🙂 بنتكل على الله وحده 🙂 و الله ولي التوفيق 🙂 🙂

بدك تشتغلي ؟؟

و أنا كمان بدي إياكي تشتغلي ،، يعني بدل القعدة في البيت ،، بس يعني كمان مو تطنشي البيت على حساب الدوام ،، بدك تداومي داومي ،، بس إعرفي أولوياتك ،، مش كل يوم في الدوام و تقوليلي ما لحقت أطبخ !! ولا تقوليلي بنطبخ مرة بالأسبوع !! لا يا حبيبتي !! ما حزرتي 🙂

ناوية تصرعينا مسلسلات تركية و برامج تلفزيون ؟؟

مش بزيادة أنا بالمسلسلات التركية ،، و ببرامج التلفزيون حسب شو بدك ،، إذا برامج طبخ عشان تجربي فيني ،، أوكي ،، أنا موافق ،، بس برامج ثانية يعني ممكن ما أكون متشجع كثير أتابع معك .. بس مو مشكلة ،، إنتي تابعي إللي بدك إياه ،، و أنا بلتهي باللابتوب شوي ..

شو إنترنت ما إنترنت ؟؟

هذا بتعتبريه ضرتك !! بس بالعقل يعني ،، إنتي ظلك دلعي فيني عشان ما ألاقي وقت أصلاً للكمبيوتر و الإنترنت 😀

بخصوص الموبايل ؟؟

تلفوني في الوقت الراهن أيفون-5-أس-32جيجا ،، بعرفش إذا من هون لوقتها بظلني حامله ! بس إن يعني عشان أكون صريح معاكي ،، كثير شغلات بخلصها ع التلفون !! يعني بهمني دايماً يكون مشحون ،، مش تشوفيه قرب يطفي و ما تحطيه بالشاحن ،، غير هيك ،، تلفوني ما عليه باسوورد ،، هذا لا يعني إني أشوفك عم بتنبشي في المسجات إللي فيه و المكالمات و كل شي !! شغل المحقق كونان مش عندي !!

صح و بحب أحكيلك كمان إني بستخدم الموبايل و أنا بسوق ،، و برد ع المسجات و ع الإيميلات ،، ماشي ما اختلفنا إن غلط و ما بصير و و و و ،، بس يلا هاي فرصة تكوني بتردي ع المسجات و الإيميلات تبعوني و أنا بسوق لو سمحتي يعني إذا ما بتكلف عليكي كثير 🙂 😉

أعياد و مناسبات ..

أنا بعرف عيد الفطر و عيد الأضحى 😀 أما عيد الحب و عيد راس السنة و عيد النخلة و عيد الحمير ،، ما بعرف فيهم كثير ،، و عشان نكون متفقين ،، لا تتوقعي كثير هدايا !! يعني مناسبة أول مرة حكينا مع بعض و أول مرة شفتك و يوم الطلبة و يوم الجاهة و يوم الخطبة و يوم العرس و يوم النكسة و يوم ورا يوم حبيبي ما جاني نوم حبيبي واديني جيت حبيبي واديني جيت ،، (( يلا نعيش سوا ،، حبيبي )) << هذا أهم مقطع 🙂

المهم بدك تعرفي شغلة وحدة ،، بمناسبة ،، و بدون مناسبة ،، زوجك ثم زوجك ثم زوجك ،، راح أعيد و أزيد و أستمر في الحكي و الفعل إن زوجك بدو يكون أولويتك !! بدك تعرفي كيف تهتمي فيني و تدلعيني في كل الحالات !! فاهمة ؟؟

بس ما عليكي ،، خليها عليّ ،، و شوفي كيف راح تعيشي كومة من المفاجآت 🙂

الشيطان يكمن بالتفاصيل ..

و أنا التفاصيل ،، و بحب أحكيلك إني كثير بهتم بالتفاصيل ،، الإهتمام دايماً موجود الحمدلله ،، و بأدق التفاصيل ،، و لحالك راح تتفاجئي من هاي الشغلات 🙂 الأيام كفيلة بإثبات هاي النقطة 🙂 و كثير نقاط كمان 🙂 🙂

حكي الناس ،، و الحكي عن الناس ؟؟

أوكي ،، بفهم إن كثير شغلات راح تحكيلي فيها : شو راح تحكي الناس علينا ؟ بحب أحكيلك إن كلامك صح ،، و بحب أحكيلك كمان إن ما حدا من هالناس شاريلي انبساطي من فلوسه !! فهمتي ولا بحتاج أشرح أكثر ؟؟

أما الحكي عن الناس ،، نسأل الله إن نخففه أكثر و أكثر و أكثر ،، و إن لما تصير مشكلة عن جيراننا ،، مش نوقف عند الباب نتنصت عليهم !! خلص ،، الله يستر علينا و عليهم يا رب 🙂

ما أدري + ما أعرف + ما سمعت = حياة سعيدة إن شاء الله !!

حبيبي ممكن تتغير عشاني ؟؟

و لو يا حبيبتي ،، إذا ما تغيّرت عشانك ،، عشان مين بدي أتغير !! إنتي بس شدي حيلك 🙂

إنت ليش مش رومانسي !!

ذكرتيني بنكتة ،، واحد أردني بحكي لزوجته ،، حبيبتي بس أرجع ع البيت بدي رومانسية ،، البنت إتصلت على أمها و قالتلها زوجي بدو رومانسية يمّا ،، حكتلها الأم والله يا حبيبتي ما بعرف شو هاي بس على كل حال انقعي الرز !!

ما عليكي ،، ربنا – عز و جل – و الرسول – عليه الصلاة و السلام – أمرونا بالخير في النساء ،، و الله يقدرنا و نعطيكم قدرهم و زيادة ،، سواءً أم ولا أخت ولا زوجة و لا بنت و لا مين ما تكون – بس مش سبيل يعني – 🙂

ابتسمي 🙂 🙂

مثل ما بقولوا // ابتسم ،، هاي ثاني أحسن شغلة ممكن تسويها بشفايفك !! شايفة كم ابتسامة بالموضوع ؟؟ بالرغم من كل المشاكل و وجع الراس ،، بس عادي ،، بدي أظل مبتسم الحمدلله 🙂

و ناوي تصرف علي ولا أصرف على حالي ؟

حسابك يا روحي مسامحينك فيه ،، شغلك بعطيكي راتبك ،، إنتي حرة فيه ،، و المصروف إللي مجبور أعطيكي إياه كل شهر كمان إنتي حرة فيه ،، بس بتوقع منك إني لما أحتاج شي ،، تكوني ” أول ” سند لإلي .. استوعبيها منيح لهاي ،، هذا عمر ،، و ما حدا بعرف شو ممكن يصير مع الأيام .. و الزلمة بدو مرته تكون سند و ظهر لإله ،، مش تفكره ATM للسحب بس !!

شراشف التخت !!

و أكياس المخدات ،، بحب أحكيلك إني بحب أنقيهم !! عندي متعة لما أختارههم !! فما عندي مشكلة لما بدك تروحي تشتريهم إنك تخبريني !! بستمتع أنا بهاي الشغلة ،، و إسألي إللي كانوا معاي لما فرشت الاستوديو إللي قاعد فيه حالياً !!

آه صح ،، و بدك تهتمي بتبديلهم و نظافتهم دايماً يعني ما بدها حكي !!

أواعيي و Oz1985

شوفي يا شيخة ،، أواعيي حاط عليها إسمي ،، مش حباً في الذات فقط ،، و لا شوفة حال !! بس في عدة أسباب ببقى بحكيلك بعدين عنهم إن شاء الله ،، إذا عندك اعتراض ،، احكيه من هلأ !! و إذا بدك أعملك شي بإسمك ،، دا يوم المنى يا شيخة 🙂

شعاري على أواعيي

بخصوص OsamaZaid.Com ..

هيني عم بقولك ،، المفروض تشجعيني على الكتابة ،، مش تقوليلي المدونة عم بتضايقني ،، يعني بفهم إن يمكن بعض البنات يمكن تكون ردودهم مستفزة مرات ،، بس ما عليكي ،، طول ما إنتي محافظة عليّ ،، ما راح أحتاج أشوف حدا ثاني ،، و أصلاً ما بدي أشوف حدا ثاني غيرك 🙂 🙂 فـ شدي حيلك منيح !! و أصلاً عادي يعني ممكن نخلي الناس ما ترد إذا بدنا 🙂 🙂

أصلاً أنا بتوقع منك كمان إنك تطلبي مني إن تصيري تكتبي معاي هون !! بكون كثير مبسوط ساعتها !!

الكتابة هي يعني من أسمى مراتب التعبير ،، يعني صعب الواحد يعبر عن كل شي في باله بالكتابة ،، بس إذا عندك استعداد تكتبي و تعبري عن أي موضوع ،، أنا كثير بكون فخور فيكي 🙂 و فخور إنك شريكتي 🙂 🙂

مصباح علاء الدين ..

يا ريت تشوفي هذا الجزء منيح ،، و تخلي أبوكي و أمك كمان يشوفوه و ينصحوكي فيه ،، إنتي رايحة ع بيت زوجك ،، مش على مكان راح تحكي فيه المصباح و يطلعلك مارد المصباح و يلبيلك كل طلباتك ،، من شان الله افهمي الزواج منيح !! صحيح الأيام كفيلة بتعليمنا كل شي ،، بس فرصة يكون عندك هاي الفكرة من قبل ما تحكّي المصباح !! عشان هيك ،، إذا بدك شي احكيه من هلأ لأبوكي ،، الأب مستعد يحقق أحلام لبنته غير الأحلام إللي بحققها الزوج لزوجته !!

نصيبي من الهم .. 

و شوفي كمان ،، إذا بالك مشغول ،، سكري الخط !! بمزح بمزح ،، قصدي إذا كان في يوم من الأيام بالي مشغول ،، يعني لازم تحسي ،، مثل ما أنا بدي أحس و أشارك لما يكون بالك مشغول ،، و مثل ما نصحني أحد الأخوة بصراحة ،، شوفي يا شيخة ،، نصيبي من الهم راح آخذه راح آخذه ،، و نصيبك من الهم راح توخذيه راح توخذيه ،، هاي سنّة الحياة ،، يعني مثلاً لما كنت أقول ما بدي أرتبط ،، ربنا ممكن يبدلك هم الارتباط بأي هم ثاني ،، هم الشغل ،، هم الصحة ،، هم شو ما يكون ،، عشان هيك ،، أنا قررت إن يكون في حدا يشاركني و أشاركه هموم الحياة ،، مش بس الهموم ،، و أكيد الانبساط كمان 🙂

و بنقول //  ( رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ ) [البقرة/286]

تسكنوا إليها ..

في الآية 21 من سورة الروم ،، يقول الله – عز و جل – : ( وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ ) ..

يعني إفهمي إن لو الموضوع بإيدي و بإيدك ،، كنا قتلنا بعض !! بس ربنا إللي جعل بينا مودة و رحمة ،، فاستغليها ،، مش تخربيها !! بدي : أسكن إليها ،، مش : أتخانق معاها !!

قرأتي كتاب الرجال من المريخ و النساء من الزهرة ؟؟ أنا ما قرأته ،، بس يعني بفهم إن الزلمة بفكر بالشرق ،، و المرأة بالغرب ،، و هون سر الحياة !!

نظافة البيت ..

الحمدلله الحمدلله الحمدلله ،، بشهادة كل واحد دخل البيت عندي ،، الكل مستغرب كيف شاب عزابي و البيت مرتب و نظيف ،، و اللبيب بالإشارة يفهم ،، ولا كمان هاي بتحبي أشرحلك أكثر ؟؟

بس يعني ممكن أساعدك ،، يعني مثلاً إذا كنتي عم تكنسي الأرض ،، أرفع رجولي عشان تعرفي تكنسي منيح ،، بس لا تتوقعي كثير 🙂 بمزح 😛

و ضيوف الفجأة ..

لما كنا في بيت أبونا – حفظه الله و رعاه يا رب – كانت دايماً إمي – حفظها الله و رعاها – تحكيلنا إن البيت لازم يظل مرتب عشان إذا إجا عنا حدا فجأة !! هذا طبع منيح ،، و ما أعتقد عندك مشكلة فيه ،، صح ؟؟

حبيبي عم بتعب من شغل البيت ،، بدي خدامة ..

أقول ،، استريحي ،، خليها لوقتها ،، و لنشوف ظروف الحياة و الخلفة كيف !! بكير عليها من هلأ !! بس من ناحية المبدأ ،، قابل جداً للنقاش طبعاً 🙂

اضرب المرأة بالمرأة ..

أعتقد واضحة ،، مش محتاج شرح يعني !! و عشان ما نوصل لهاي المرحلة إن شاء الله ،، بدك تحفظي العِشرة ..

إسألوني عن نكران العشرة ،، أحدثكم عن أناس كانوا بجانبي يوماً و لم يعودوا يذكروني الآن ،، كان سبب فراقهم سخيفاً جداً ،، كسخافة قراري باختيارهم يوماً ..

الوقت الوقت الوقت ..

كثير بحترمه ،، و بحب أحكيلك إني حاط ساعة بالحمّام !! و عشان تعرفي أهمية الوقت عندي ،، يا ريت تقرأي هذا الموضوع ..

فلوسي ..

مش كثير ،، بس صرت أجمّع بالحصالة آخر فترة لوووووول ،، لا لا ما عليكي ،، شاريين زلمة إنتوا 😛 😛 ،، بس في نية نشتري بيت في الأردن إن شاء الله بعد ما نبلش نجمع و نحدد أهدافنا 🙂

ما في Expiry Date ؟؟

بحب أذكرك إن عقد الزواج ما فيه Expiry Date !! بتحطي مواد حافظة منيح عليه عشان يطوّل أكثر و أكثر ،، بدك تبلشي تخربي العيارات ،، بخرب كل شي ،، مش حاب أخوض بهذا النقاش كثير ،، بس الله لا يحيجنا لإله 🙂

.. ( لا تدري لعل الله يحدث بعد ذالك أمرا ) ..

بس بحب أحكيلك إن أغراض البيت ،، للبيت ،، مش للي جابهم !!

بـ ســــــــــــــــلام ..

هاي الحياة إللي بدي إياها ،، برجع بقولك ،، نكد أوكي مو مشكلة ،، عيشة ” هنيّة ” ،، كلنا بدنا إياها ،، بس موضوع بـ ســــــــــــــــلام ،، هذا يعني إن أنا يمكن عملت كثير مشاكل بحياتي و تخانقت مع كثير ناس ،، مش كثير كثير ،، بس ما أعتقد إن كنت أنا دايماً السبب ،، كل واحد عنده أفكاره و هو حر فيها 🙂

و في واحد اسمه ألبرت أينشتاين بحكي / إذا أردت أن تحيا سعيداً ،، اربط حياتك بأهداف ،، و ليس بأشخاص / .. عشان هيك بربط سعادتي و سعادتك بأهداف لحياتنا بنتفق عليها سوا إن شاء الله ،، مش سعادتي لما أطلع مع أصحابي ولا تطلعي مع صاحباتك ولا شو ما يكون !!

بس !!

لا تؤجل انبساط اليوم إلى الغد ..

اليوم إللي بروح ،، ما بيرجع ،، و بدل ما أنبسط بكرا ،، بنبسط اليوم و بكرا ،، و بدل ما أعيش عشر سنين مبسوط ،، بعيش خمسطعشر سنة مبسوط !! افهموا من شـــــــــــــان الله ،، لأن بكرا ممكن أكون مريض ،، ممكن أنشغل ،، ممكن أعلق في الدوام ،، ممكن مليون شغلة ،، عشان هيك ،، ما بحب ،، ولا بدي في اليوم من الأيام ،، أأجل لحظة انبساطي !!

و سجلي عندك إني ” أنا ” صاحب المقولة إللي راح تصير مشهورة – إن شاء الله – //

لا أريد أن أعيش غداً ،، لاحقاً .. أريد أن أعيش اليوم ،، الآن ..

 +18 و مرات +25

في شغلات ثانية ما بتنكتب ،، بس لازم نكون متفقين عليها ،، بنتحاكى فيها بعدين إن شاء الله ،، بيني و بينك بس ،، لما أعرف مين إنتي إن شاء الله !!

==================

“” برا و بعيد “”

من فيلم ”Ride Along“

التعليق :: و إلك أكثر من إللي راح تعطيني إياه ..

==================

 هلأ شوفي ،، أنا يمكن ما حكيت كل شي ،، بس كمان حابب أحكيلك إن عادي ممكن أتنازل عن كم شغلة – إلا الكروش – يعني الحياة مشاركة يا حبيبتي ،، يمكن أحتاج أتنازل شوي ،، أو تتنازلي شوي ،، أو أرتقي شوي ،، أو ترتقي شوي ،، المهم نكون متفقين إن كل المشاكل بدها تنحل !! مع بعض بس !! مش مع العالم كلها !! إللي في بيتنا ،، بظل في بيتنا ،، بتحافظي على بيتك ،، عشان بيتك يحافظ عليكي ..

و في احدى القصص المعبرة ،، شوفي يا بنت ،، هاي حياتي ،، و حياتك ،، و حياتنا ،، مش راح أوقف عند كل نملة بلاقيها بالطريق !! ولا راح أضيع وقتي و أنا عم بدعس فيه ع النمل إللي بالطريق !! بدي أظل ماشي ،، و بدك تظلي ماشية ،، و بدنا نظل ماشيين سوا إن شاء الله .. عندك اعتراض ؟

الله يرزقنا – و إياكم – الجنة يا رب 🙂

و يمكن ما حكيت إلا النص ،، لأن قوانين الرقابة هيك بتنص 😀 😀 ،، لا بمزح ما عليكم ،، حكيت كثير منيح ،، حكيت شغلات أنا فعلاً بدي إياها ،، و مش حابب الطرف الثاني ما يكون عنده فكرة عنها من الأول 🙂

و بعرف لما نكون في بيت واحد – إن شاء الله – كل شي بيتغير ،، بس على الأقل نكون متفقين على كم شغلة من هلأ 🙂

طبعاً و بحب أفتح المجال لكل شخص بعرف أسامة ،، يحكي إللي بدو إياه ،، و مثل ما قلتلكم ،، إذا وحدة عندها استعداد ترد ،، ترد تأشوف !!

و السلام عليكم و رحمة الله و بركاته

——

ممكن أعدل على هذا الموضوع خلال الفترة القادمة ،، التعديل راح يكون بعد هذا الجزء ،، و راح أضيف تاريخ التعديل عشان التوثيق ..

التعديل رقم 1: 17-2-2014 /

* من الآنسة دينا عثمان / بشكرك على تذكيرنا بنقطة أسماء الأولاد و البنات .. عزيزتي شريكتي المستقبلية ،، بخصوص أسماء الأولاد ،، إذا ولد ،، إن شاء الله راح يكون طلال أو زايد .. إذا بنت ،، سميها على راحتك 🙂

التعديل رقم 2: 25-2-2014 /

* بحب أحكيلك كمان إن ما بمشي على مبدأ وحدة بوحدة 🙂 إللي بقربلي متر ،، بقربله عشرة ،، فكيف لو كان هذا الشخص هو مرتي و حبيبتي و شريكتي 🙂

* فرصة تعرفي إني الحمدلله الحمدلله الحمدلله محافظ على صلاتي قد ما بقدر ،، و على أذكار الصباح المساء ،، بنزاحم السيئات بالحسنات قد ما بنقدر إن شاء الله يا رب 🙂

* و يا ربت تكوني بتعرفي تعملي قهوة عربية ،، لأن هاي هي نوعية القهوة الوحيدة إللي بشربها 🙂 و آه صح ،، بالعادة ما بفطر 🙂

* و عشان تعرفي شوية تفاصيل عني كمان ،، ما بحب المسد كولات !! قولي أكيد إنتي ما راح تعمليلي هيك شي في يوم من الأيام ،، صح حبيبتي ؟؟

* و إذا في تفاصيل أكثر كمان لازم أحكيها ،، بحب أحكيلك إن نوع الكلينكس ( المحارم ) المفضل عندي هو : فاين عود 🙂

* صح ،، شكلك خلقة ربنا ما اخلتفنا ،، بس يا ريت يكون شعرك طويل ،، لا تحبطيني و تقصيه في يوم من الأيام .. أنا بحب الشعر الطويل ،، مش تجاكريني و تقصيه !!

* ممممممم بحب الحفايات ،، حب عذري ،، بس إن عشان لما آجي أتربع و أنا قاعد ،، أسهل لي أشلح الحفاية و أتربع ،، مع إن صارلي فترة عم بحاول أغير هاي العادة ،، و بعدني مستمر في تغييرها عشان خاطرك والله 🙂

* أهم شغلة بدك تعرفيها ،، يا ريت يا حبيبتي تعرفي كيف تديري الأمور المالية و ما تخليني على راحتي بهذا الموضوع ،، ممممممممم ،، هلأ هو بعرف عن حالي إني إنسان ” صرّيف ” ،، فلا تكوني نفسي 🙂 يعني عشان أقدر أوفر شي نصيع فيه سوا إن شاء الله يا حبيبتي 🙂

* و نعمة أتمنى إن يكون عندك إياها ،، أخت متزوجة !! بعدين بتعرفي ليش ،، مممممممم ،، الأيام كفيلة بإنها توضح الأسباب 🙂

يحميكي ربي ..

11865 Total Views 3 Views Today