أسامة بن زيد

هذا يا جماعة الخير و أخيرا ،، و الحمد لله ،، زبط معاي موضوع السفر و سافرت ،، بعد معاناة استمرت شهور ،، سافرت و الحمد لله و هيني عم بكتب الموضوع هذا و أنا في المغرب ،، في الرباط ،، ياه بيبي ياه .. و تفضلوا تفاصيل الرحلة و اليوم الأول ..

هذا المشروع كان موجود من فترة ،، و كل مرة بتأجل بسبب ظروف أو ارتباطات ،، المهم ،، آخر فصل كان كالتالي // وصلني مسج من واحد من الشباب (( راح نختصر إسمه بـ ” أ-ب-ت ” )) الساعة 1 بالليل بتاريخ 30-12-2008 ،، قالي بدك تاخذ إجازة من الدوام و تسافر ع المغرب ؟؟ أنا طبعاً شفت المسج بس صحيت ،، و قلت أشوف شو بصير معاي في الدوام ،، و أنا في الدوام إجاني إتصال من أ-ب-ت و قلتله خليني بس أتأكد شو بصير معاي في الدوام إن شاء الله و برد عليك خبر ،، جبت جوازي و أعطيته لواحد عنده عشان يطلعلي الفيزا و حجزلي على طيران الإتحاد بس تأجلت بعدين لأن الشب الأول إللي أخذ الجواز ما كان مقدمه على السفارة ،، كان مفكر السفارات معطلة عشان حالة الوفاة الأخيرة إللي كانت في الدولة ،،

قدمولي إياها ثاني يوم إلتغى الحجز القديم و صار عندي حجز جديد من مطار دبي على طيران الإمارات يوم الثلاثاء (( 6-1-2009 )) الساعة 7:50 الصبح ..

كان المفروض مبارك يوصلني ،، بس تغيرت الأمور و وصلني نشوان >> كنا عم نحكي على المسنجر ،، قلتله يلا ؟؟ قالي لوين ؟؟ قلتله على مطار دبي ،، قالي يلا شو ورانا << يسلملي أنا

طلعنا والله على دبي و وصلنا على مطار دبي – Terminal 3 الجديد

بصراحة شغلة يعني ،، فعلاً فخامة ما شاء الله

صلينا الفجر و تحركت أنا باتجاه الجوازات ،، نشوان روح على أبوظبي ،، أنا ما معاي غير اللابتوب و شنطة وحدة صغيرة ماخذها معاي << أحسن مما أستنى بالدور تبع الشنط :-D :-D

كملت تمشاية في المطار شوي

و كله كوم ،، و إني مسطل و مو نايم كوم ثاني ،، من شان الله بس بدي أنـــــــــــــــــام ،، و بدون شي كانوا مبشرينا إن الرحلة طويلة كثير ،، و بنام فيها ،،

بدأت الإستعداد ،، فتحوا البوابة رقم 120 إللي كانت مخصصة لهاي الرحلة ..

<< كيف صورتي بس ؟؟ نعسان حتى الإشباع !!

..

فــــــــــــــــــــــــــــوق السحاب

بس شو بدكم بالحكي ،، بحياتي ما شفت زي السحاب إللي بالمغرب ،، بتحسه ” طوابق ” !!! يعني نحن بهاي الصورة كنا فوق السحاب ،، بس بدأ بدو ينزل ،، صرت أشوف طابق ثاني من السحاب والله !!

مو ضايل غير 100 ميل عن الدار البيضاء

و كمان ما شاء الله ،، ما شاء الله ،، ما شاء الله ،، كلها خضراء !! يا عمي مو زي مطار عمان و لا أبوظبي >> صحراء !!!!!!!

إحم إحم ،، الحمد لله على السلامة

هبطنا في مطار الملك محمد الخامس في الدار البيضاء (( Casablanca ))

بس وصلت لعند الجوازات ،، كانوا حاكيينلي الشباب قبل إن لازم تعطي (( هدية )) للشرطي عشان يمشيك !!

أنا عملت حالي ما بعرف ،، وصلت للشرطي ،، قالي أسامة أردني ما شاء الله ،، و من الإمارات ،، قلتله الحمد لله ،، قالي أهلاً أهلاً والله ،، قلتله أهلين ،، قالي ما عطيتونا عيدية يا أسامة ،، قلتله خلص العيد من زمان ،، قالي ولا حلاوة ،، قلتله شو المناسبة !! قالي يعني يا أسامة إفهم ،، قلتله شو أفهم ؟؟ قالي شو إللي جنبك شو قاعد يساوي !! تفرجت عليه ،، طلع عم بعطي الموظف ” هدية ” .. أعطيته إللي فيه النصيب و ضليتني طالع برا المطار ،، كانت بانتظاري ” القادري ” ،، الكل في الكل

بدأنا تحركنا باتجاه الرباط إن شاء الله

كلها خـــضــــــــــــــــــــــــــــــراء يا نـــــــــــــــــاس

===============

بتعرفوا شو الصورة هاي ؟؟ هاي صورة لنظام نفس نظام سالك بدبي ،، بس هون بتوقف ،، بتدفع ،، بتمشي ،، في المطار للرباط وقفنا 3 مرات أعتقد >> عشان ما تقولوا هاي الشغلة موجودة بس في دبي !!

و نحن ماشيين ،، شفت الإخوان إللي بالصورة هاي ،، بس ما عرفت شو كانت المناسبة !!

بس قلت الصورة حلوة و الجماعة مبسوطين و بدهم صورة :D

لولولولولولولـــــــــــــــــــــــــــــــــــــــيش

الحمد لله على السلامة ،، وصلنا على الرباط ،، حي إسمه حي السويسي ،، أرقى حي بالعاصمة ،، الحلو بهذا الحي الهدوء إللي فيه ،، كلها فلل و قصور للشيوخ و الأمراء ،،

تغدينا و ارتحنا شوي من السفر ،، و يلا على الـMega Mall ،، هو مو مول مول يعني ،، بتقدروا تقولوا // مويل // تصغير مول ،، ع السريع ،، من الباب للكافيه ،، إسمع Armando Cafe ،، طلب ” أ-ب-ت ” شغلة إسمها ” نص نص ” شربنا النص نص ،، حسيته زي الكافيه لاتيه يعني ،، بس الظاهر إنها المكونات بتيجي بالزبط نص قهوة و نص حليب ..

خلنا و رحنا على محل إسمه PAUL ،، محل حلويات و كيك ،،

يا عمي حتى صندوق الإقتراحات شكله روعة والله ،، يعني الواحد من حلاوة شكله بحتار شو بدو يقترح والله

خلصنا من PAUL و روحنا ،،

يعني شو بدي أحكيلكم

فعلاً // المغرب غير // تنشوف شو بصير معانا بكرا إن شاء الله

بقولوا يعني إن ” أ-ب-ت ” متعود نفس الروتين كل يوم >> تنشوف بتغير معانا ولا لأ !!!

إدعولنا

.. انتظروا القادم إن شاء الله ..

هذه التدوينة ادرجت بتاريخ 6 يناير 2009 في الساعة 11:59 م ضمن تصنيف فلاشات, لعب لعب لعب. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.