سينما ،، فيلم ،، كوميدي ،، أكشن ،، رومانسي ،، بلاش رعب ،، ناس ،، منيحة ،، زنخة ،، أولاد ،، صراخ ،، رنة تلفون ،، بوشار ،، ناتشوز ،، قول بيبسي ،، سهر ،، ترجمة ،، طابور ،، لا تدز ..

أسامة من نوعية البشر إللي ما بتطيق الأولاد الأصغار ،، يعني لما أشوف أطفال هاي الأيام ،، و أشوف نحن كيف كنا ،، والله فرق يا جماعة الخير !!

على رأي النكتة إللي بتقول / أيامنا كنا نشرب شوية مي و نعمل بحلقنا غرغرغرغرغرغرغرغر و ننبسط فيها طول اليوم ،، و أطفال هاي الأيام عنده آيباد و بلاي ستيشن و كل شي و بقولك زهقان !!

نرجع لموضوعنا ،، جنة الأطفال منازلهم !! مش كراسي السينما !! يعني كثير بتصير معاي مواقف بالسينما و بغير السينما مع الأطفال ،، زنخة !! خلينا بمواقف السينما ..

هسه أنا من النوعية إللي بتحب تدخل السينما آخر عرص << قصدي عرض ،، الساعة 12 بالليل ،، صحيح إن مرة دخلت 3 أفلام ورا بعض !! بس بالعادة أفضل عرض هو الساعة 12 بالليل لأن ما بكون زحمة بالليل ،، على كل حال ،، غلطت ،، و دخلت مرة المساء !! كان فيلم ICE AGE 4 ،، قعدت ،، و قعد جنبي واحد هندي ،، و حط إبنه في حضنه ،، حلو ،، أمورهم الخاصة هاي أنا ما دخلني فيها ،، مشكلتهم ،، يقعدوا زي ما بدهم !! المهم ،، الفيلم بالإنجليزي ،، و الترجمة بالعربي و الفرنسي ،، و هالتحفة إللي جنبي قاعد بترجم الفيلم لإبنه من الإنجليزي للهندي !!!!!!!!!!!!!!! من شان الله !! صرعت ذانتي يا كومار !! شو هااااا ،، روح حل عني !! إذا إبنك عمره 3 سنين ولا 4 سنين ولا 50 سنة ،، ترجمله لحاله ،، صرعتني و الصوت صار جوّا ذانتي ياخي !! ما تحملت الموقف ،، رحت قلتله مطولة معك ؟؟ لازم تترجمله يعني ؟؟ ما اختلفنا إن الفيلم مناسب للأولاد الصغار ،، بس خلص خليه يتفرج على الفيلم ع السكت ياخي !! هو الفيلم بضحّك أصلاً من الأنيميشين إللي فيه أكثر من الحكي !!

الخلاصة إن زاح إبنه عند أمه ع الجهة الثاني و سكت الحمدلله 🙂

مرة كمان كنت مع يحيى الهادي ،، رحنا على السينما ،، عرض الساعة 12 بالليل 🙂 و قعد يحيى ،، و ع يساره أنا ،، و ع يساري كرسي فاضي ،، و بعديه كرسي عليه شنطة و بعده و مرته ،، الزلمة لهجته إماراتية عادي يعني ،، و زوجته شكل نقابها سعودي أو كويتي ،، و جايبين ” بيبي ” معاهم !! يعني و إللي يرحم أبوك و أمك ،، جايب البيبي معك ع السينما الساعة 12 بالليل ليش ياخي ؟ ياخي يعني إستحي على حالك شوي ( الله يستر إذا في يوم من الأيام قررت أروح أنا و مرتي و كان معانا بيبي << من كثر ما حكيت على العالم ) ،، بلش الولد يبكي ،، سكتته أمه ،، و أنا ألف و أطلع عليهم و أقول :: أففففففففف ،، بلش الولد يبكي ،، أخذه أبوه و قعد يلعبه !! و أنا ألف و أطلع عليهم و أقول :: أفففففففففف !! المرة الثالثة قبّعت معاي !! خلص يعني بدنا نعرف نتابع ،، مش جاي على بالي تزعجني و تزعج إللي في السينما على آخر هالليل ،، ع المرة الثالثة لفيت عليه ،، و قلت : أففففففففففف مطولين ياخي !! إلا الزلمة بكل وقاحة برد علي و بقولي // يعني شو تبانا نسوي ؟؟ قلتله ياخي خذ إبنك و إطلع !! الساعة صارت 1 في الليل و جايب إبنك ع السينما !! ما رد !!

الخلاصة ،، دقيقتين بالضبط ،، كانوا ضابين الشنطة و طالعين الحمدلله 🙂

و لا لما رجنا أنا و محمد الناصر نحضر فيلم تك تك بوم ،، تبع اللمبي ،، كان في واحد مصري جايب صاحبته الفلبينية معه ،، يومها عرفت إن اللمبي تفوّق على شارلي شابلن ،، لأن الفلبينية ضحكت على حركات اللمبي أكثر من الشب المصري خخخخخخخخ ..

آه صح ،، مرات بتلاقي ناس بتتفاجأ إنهم بالسينما ،، يعني تخيل حالك رايح تحضر فيلم ،، أيام سينما الماسة بحمدان سنتر في أبوظبي ،، و قبل الفيلم تروح بدك تشتري شيبس و بوشار ،، و تلاقي أبوك و أمك جايين يحضروا نفس الفيلم !! الله يسامحكم ،، لو حكيتوا من الأول كنا إجينا مع بعض بدل ما أدفع تاكسي خخخخخخخخخخخخخ ..

و يا ريت كمان لو تعرف شو الفيلم إللي رايح عليه قبل ما تروح تحضره !! يعني مرة رحت أنا و أخونا حسن منصور على فيلم اسمه Chernobyl Diaries ،، على أساس إنه أكشن ،، بعد ما قطع أكثر من الفيلم ،، اكتشفنا إنه فيلم رعب يا جماعة !! تباً ،، لقد وقعنا في الفخ !! أصلاً عادي ،، بتصير في أحسن العائلات ،، و في أضرب العائلات كمان ..

و مرة كمان رحنا على الخالدية مول بدنا نحضر فيلم Drive ( على فكرة ،، الفيلم كثير حلو ) ،، المهم ،، طبعاً لما يكون إسم الفيلم Drive ،، الكل راح يخطر في باله إن فيلم سباقات سيارات و دعاس و تزويدات و حركات ،، عشان هيك ،، لما دخلنا الفيلم ،، كانوا كل الحضور تبعون بني ياس و الشهامة خخخخخخ ،، بعد نص ساعة من الفيلم ،، بلشوا الشباب يشغلوا مقاطع سباقات سيارات و لعب و تخميس ع تلفوناتهم !! و بعدها بشوي ،، القاعة كلها فضيت ،، انصدموا يا حرام ،، لا سباقات و لا هم يحزنون ..

و في أشكال أضرب من هيك ،، إللي بتروح ع السينما ،، و بتوصل لعند موظفة الكاونتر ،، و بتلاقي الشباب بسألوا بعض :: ياخي شو بنحضر ؟؟ ياخي تضرب منك لإله لإله لإله لإله لإلكم كلكم !! يعني صارلكم نص ساعة واقفين في الدور ،، ما عرفتوا تسألوا بعض هذا السؤال يا تحف منك لإله لإله لإله لإله لإله لإلها للكل !! تضربوا تضربوا تضربوا !!

الحمدلله السينمات صاروا يحطوا أكشاك عشان تشتري التذكرة و تدفع بالكريديت كارد لحالك ،، لا زحمة و لا طابور و لا تحف !! و المشكلة بتيجي بالناس إللي بدها تتعلم ع الجهاز و إنت واقف وراهم على الدور ،، يا الله ما أسوأها !! و بيجي تبع السينما عشان يعلمه عليها ،، برد و بقوله ::

I know how to work on it sir !! don’t worry .. Thank You !!

و أنا بقوله :: Fu** You ياخي !!

أسامة كان بحب يروح ع السينما لحاله ،، بعدين صار يروح مع الشعب ،، و كان متعاقد مع واحد من الشباب للأفلام العربية ،، بما إني كنت مقاطع زمان ،، بس المحروس تزوج و صار يروح مع مرته ،، و تغيّرت شلته ،، يلا ،، مو مشكلة ،، و تطورنا أكثر شوي و صرنا نروح مع جماعات كاملة 😀 😀

على سيرة الجماعات ،، كنا قاعدين مرة بكافيه في أبوظبي إسمه “فرينزي كافيه ” بالخالدية ،، مع سماحة مولانا ريان أبو الحسن ،، قاعد أنا و إياه و الشباب أصحابه ،، يلا سينما ؟؟ يلا شو ورانا !!

دخلنا ع السينما في المارينا مول ،، كان فيلم 1000 مبروك << الله يبارك فيك يا رب 😀 😀

كنت أنا و ريان و وليد و فيصل و فراس و فواز ،، ما بعرف شو كنا متعاطيين يومها !! تقول محششين قاعدين ع الكراسي ،، و من كثر التحشيش ،، من أول ما حطوا دعاية كوكاكولا أنا و ريان فرطنا !! فرطنا فرطنا !! يعني من الدعايات حششنا الحمدلله !! بلش الفيلم ،، و نحن فرطنا أكثر !! و حش في العالم أكثر و أكثر كمان الحمدلله 😀 😀 😀

المهم ،، قاعد قدامنا شب إماراتي و معه وحدة ،، ما بنعرف هي مرته هي أخته هي صاحبته ،، نحن ما دخلنا 😀

كل إللي بعرفه إن من كثر ما ضحكنا ،، كل شوي يلف علينا و يقول :: بس خلاص ،، يلف و يقول :: بنتابع الفيلم ياخي ،، لحد لما لف ثالث مرة و قال :: ياخي إنتوا أول مرة تدشون (تدخلون) سينما !!

و أسامة بكل برادة و سرعة بقوله :: لا ياخي هاي ثاني مرة ندخل سينما !! و طلع صوتنا ضحكة مش طبيعية هههههههههههههههههههههههههههههههههههههههههههههه قام الزلمة أخذ إللي معه و طلع من السينما !! ياخي أنا ما بحب أجاوب على العالم و أكون ملسون هيك ،، بس والله هم بستفزوني يا جماعة الخير !!

على سيرة ريان ،، رحت مرة أتعشى معه بالليل ،، بمطعم الريان بالخالدية ،، خلصنا عشاء و أكل ،، بقول ريان / بتعرف شو ناقص ؟ ،، شو ؟ ،، ياخي لازم سينما !! لا ياخي دخيلك الساعة 12 بالليل و بكرا دوام  و و و و و ،، يا زلمة يلا ،، يلا ،، دخلنا حضرنا فيلم Catch .44 ،، عادي ،، بس يومها ،، كل إللي بتذكره ،، إن أول مرة بشوف واحد بدخل السينما و مدخّل معه شاي !! شاي يا ريان !! الله يهديك و يهدينا يا رب !! يعني بيبسي ،، مي ،، عصير ،، يا سيدي ريدبول ،، بس مش شاي !! ولا كنا لحالنا في السينما ،، دحنا لعبنا لعب !! و الكراسي فيهم تخت و الجو جميد و عشائري 😀

و صحيح ،، قاعات الـ IMAX ،، ما بنصحكم فيها !! تكسرت رقبتي و أنا بلفها من اليمين لليسار عشان أقرأ الترجمة ،، ههههههههههههههه ،، والله متعبة الشغلة ،، أما عاد إذا إنتوا والله عاملين فيها أحفاد أكسفورد ،، روحوا ،، إن شاء الله مفكرينها فارقة مع إللي خلفني ؟؟

و أحلى شي إذا كنتوا رايحين السينما و معاكم وحدة !! مرت صاحبك ،، صاحبتك ،، مين ما تكون ،، المهم يكون معاها جزدان !! خليها تعبي الشوكولاتة و البيبسي ،، يعني مش معقول البيبسي بالسينما سعره 11 درهم و في الدكانة درهمين 😀 😀

فرق والله بصراحة ،، العقل السليم في التوفير السليم << إسمعوا مين إللي بيحكي !!

و لا تنس توخذ معاك علبة الكلينكس كلها معك ،، يعني لما تروح بدك تشتري بوشار ،، بتشتري بوشار ،، و بيبسي إذا ما كان معك ،، و ناتشوز ،، و علبة الكلينكس ،، والله بتلزمك ،، يعني كل شوي راح تعبي بيبسي و بوشار و تشقشط من هون و هون و توسخ إيديك !! و إذا كان معاك مي ،، بتعبي الكلينكس مي بعد ما تخلص أكل عشان تغسل إيدك !!

و مرة أخونا وائل عثمان علّمنا حركة جديدة ،، بتدخل معاك ثلاث شارامونات (شالامونات – مصاصات – قشّات ) ، و بتفوتهم ببعض ،، بتصير تشرب من البيبسي و هي محلها بين الكراسي ،، بدون ما تحرك رقبتك ولا تحرك إيدك عشان تشرب 😀 😀 << شكراً وائل 🙂

في نوعيات بشر ،، خسارة تدخل السينما ،، لأنها بتخرب الفيلم ،، يعني نوعية أسامة مثلاً ،، أو نوعية الناس إللي لما يمر مشهد بضحّك بضلوا ساكتين ،، و بس تخلص الناس ضحك بصيروا يضحكوا << مش أنا 😀 😀

و لا لما تدخل فيلم رعب مرة و تلاقي واحد من الشباب كل شوي يرمي تعليق على الممثل و الممثلة ،، قلب الفيلم كوميدي والله ..

و ما في أزنخ من إللي ما بحط تلفونه سايلنت ،، ياخي بأول الفيلم بكتبولك و بحكولك إن خلي تلفونك سايلنت ،، ليش الزناخة ياخي !! خلص استحي على حالك و حطه سايلنت ،، ولا لازم تسمع مسبات ؟؟ دودة فيك يعني ما بتبرد إلا لما حدا يسب عليك ؟؟

لا لا ،، في أزنخ من إللي ما بحط تلفونه سايلنت ،، في الناس إللي بتمد رجولها ع ظهر الكرسي ،، مرّة واحد من الشباب رايح ع السينما ،، و إجا واحد مد رجوله على الكرسي إللي جنبه ،، قاله نزلهم لو سمحت ،، راح هذاك بلّش يسبسب ،، دقوا ببعض ،، و راحوا ع الشرطة 😀 😀

العبرة مما سبق >> الحبيب صار يقعد آخر كرسي في السينما عشان يكون وراه بس الحيطة 😀

و أصلاً صارلي فترة مش عم بروح كثير ع السينما .. زهقت ،، و ما ظل / من يشتد به الظهر / 🙂

في البيت ،، الحمدلله ،، موصّل اللابتوب ،، و ماكينة البوشار موجودة ،، و هيك أريح ،، الحمدلله الحمدلله الحمدلله ..

==================

“” برا و بعيد “”

بالعادة هاي الفقرة بتكون عن لقطة من فيلم ،، بس بما إن الموضوع كله عن الأفلام ،، فخلينا نطلع شوي من الأفلام ،، و نفوت بحفل الأوسكار 😀 😀

Selfie Time With The Guys !!

التعليق :: شكراً لإلكم أيها القوم على الوقت الجميل ..

==================

المهم ،، شو في أفلام جديدة هاليومين ؟؟ و مين بحب يروح ؟؟

طيب كلفوا على حالكم و إحكولنا شو في مواقف بتصير معاكم في السينما !!

عادي والله الرد ببلاش << بكرا بس أصير مشهور أكثر و أكثر راح أخليه بفلوس إن شاء الله ،، اصبروا عليّ 🙂

و السلام عليكم و رحمة الله و بركاته ..

7290 Total Views 3 Views Today