عن جد بكفي إجتماعات

بنوصل الساعة ثمانية و نص الصبح على المكتب ،، بنطلع على الميزانين ،، بنبصم ،، بنستنى الأصنصير ،، بنطلع فيه ،، بننخنق ،، بيجي الفرج و بنوصل للطابق الخمسطعش ،، بنوصل ،، بنصبح عالموجود ،، بنشغل الكمبيوتر ،، بنشوف الإيميل ،، و بنبدأ !!!!!!

من الساعة 9 ونص للخمسة ونص ،، ستة ،، و أيام للسبعة ،، شو ورانا ؟؟ قاعدين ما نحن بهالغرفة ،، هالأسبوع كان عنا كوستاس و ثيوفيلوس ،، من شركة MNI ،، إللي هي مبرمجة برنامج المدنكست إللي قلنالكم عنه قبل ،، بدهم ينزلوا نسخة جديدة من البرنامج ،، النسخة الجديدة بالعادة بتكون مجموعة من الـChange Requests إللي قدمتهم ضمان لشركة MNI ،، كل قسم عنا في الشركة بكون عنده مجموعة من الطلبات أو تعديلات بدهم إياها في المدنكست ،،

بدأنا يوم الأحد (22-يونيو-2008) : كانت أول جلسة مع قسم الـProduction ،، هدول ما شاء الله أكثر منهم بالطلبات ما في ،، في مليون Change Requests منهم ،، عندهم Production Manager إسمه ” Nazmal ” ،، هذا خبرة ما شاء الله عليه ،، حتى من كثر ما هو رايق ،، بخلص تبعون الـ Production ،، و بصير يساعد الأقسام الثانية !! حتى والله في أشياء مقدمها هو >> كان المفروض تكون مقدمة من أقسام ثانية ،، بس هو ما شاء الله عليه شخص فهمان يعني ،، بس كثير طلبات 😀 😀 😀

كنا شي 17 نفر ،، عازمين البرودكشن و السوبرفايزرز إللي فيه كمان << صاروا كثار ما شاء الله .. ضلينا قاعدين من الساعة 9:30 لل:13:00 ،، كانوا بشوفوا إذا الأشياء إللي كانوا طالبينها شغالة و ماشي حالها ولا لأ ،، شي عجبهم و شي طلبوا يغيروه و و و و و و و ..

أوووووووووووه ،، نسيت أحكيلكم والله إن يوم الأحد و نحن قاعدين في هذا الإجتماع ،، رن جرس الإنذار تبع الحريق ،، شوي و سكت ،، قلنا عادي يمكن حدا بيعلب فيه << متعودين على هيك شي ،، بس طلع في حريق في حمام القسم تبعنا (( الـ IT )) و حريق في الميزانين (( عند البرودكشن )) و في الثالث كمان ،، و فضينا المبنى بعدين ،، و إجت الدفاع المدني و الشرطة يشوفوا شو الموضوع !! طبعاً حبيبكم إستغل الوضع و راح يتغدى في البيت << هع هع هع ..

رجعنا كملنا بعدين مع قسم الـ Authorization و بعدها مع الـ Claims ،، و بعدها مع الـ Special Projects ،، و خلصنا

و قضينا الأسبوع كله على نفس القصة الحمد لله

يوم الخميس ،، عن جد بكفي

 

طبعاً شو بدي أحكيلكم بس عن إللي كان يصير ،، إقرأوا بس :

1- حدا بقولك لا مو هذا إللي أنا طلبته ،، بنيجي بنشوف الملفات و الإيميلات إللي بينا و بينهم ،، بطلع هو كاتب هيك ،، و يوم شافها في البرنامج ،، ما عجبته !!

2-في وحدة إستقالت من الشركة ،، جابوا وحدة ثانية مكانها و حطوها في نص الـProject و هي مو عارفة شي عن الموضوع :: And she have to take the dicisions !!

3- واحد من الشباب بحكي و بحكي و بحكي و بحكي و بشرح و بشرح و بشرح و بشرح ،، و بالأخير بقولك ،، ممكن نسوي طريقة أحسن !!

4- خمسة بحكوا مع بعض ،، و واحد بحكي بالشمال الشرقي ،، و الثاني في الجنوب الغربي ،، و الثالث بحكي في النص ،، و الرابع منحني بزاوية 45 درجة ، و الخامس وصل للمحيط الهندي ،، و بالأخير بحكولك :: أيوا هذا إللي نحن بدنا إياه و كلهم بصيروا يأيدوا بعض !!

5- طبعاً أنا بدون ” كرافتة ” << بنخنق منها ،، و على رأي واحد من المدراء إللي كانوا معانا في الإجتماعات :: نفسي لو أشوف شي يوم لابس برجلك ،، بالقسم بضلك حافي !! و بالإجتماع قاعد متربع على الكرسي << خخخخخخخخخخخخ !!

6- فعلاً إن ما بعجبنا شي ،، بنغير رأينا بالإجتماع مليون مرة !!

7- كله بدو يشغله يخلص أول شي ،، و كله بعتبر كل شي بقدمه : Critical !!

8- عم بتعازموا الشباب مين بدو يوقع على الـ Acceptance Test ،، لأنه الـ Director مسافر ،، و الـTeam Leader استقالت ،، و الـManager مو موجود ،، و الـTeam Leader الجديدة ما عندها فكرة عن الموضوع !!

9- عن جد من لما دوامت في ضمان ،، لاحظت إن في الأيام العادية ،، نص وقت الدوام بضيع على الإجتماعات ،، و النص الثاني على الرد على الإيميلات ،، و بعد الدوام بنخلص المشاكل إللي كانت من الصبح !!

و راح أرجع و أكرر السؤال إللي سألته في التدوينة السابقة :

إلى متى هذه الظاهرة ؟؟

 

1322 Total Views 2 Views Today