يعني أنا صارلي فترة بدي أكتب هالموضوع ،، من أيام عيد الأضحى الماضي ،، بس إن بعد ما صار موقف جديد مع شرطة أبوظبي ،، قلت خليني ” أبـء هالبحصة ” و أحكي هالكلمتين ،، بلكي حدا بستحي على حاله ! بما إن يعني النفسيات عم بتزيد و بتزيد أكثر و أكثر !!

هذا قبل عيد الأضحى الماضي ،، نزلت ع الأردن يومين قبل ما أنزل ع لبنان عشان عرس أخونا وائل العثمان تاريخ 18-12-2013 ،، كنت عم بسوق سيارة أختي ديانا و إمي قاعدة حدي ،، صرنا عند النزول إللي على المطل بين منطقة الجبيهة و أبو نصير بعمّان ،، مش متذكر ماشي مسرع و لا مش مسرع ،، أصلاً سرعة الشارع يمكن 60 ،، فأكيد أنا ماشي أكثر من هيك ،، المهم ،، فجأة ،، و بكل جحشنة ،، بلاقي شرطية واقفو بوجهي بالشارع ،، دحّينا برييييييييييييييييييييييك و وقفنا !! إلا بتحكيلي صف ع اليمين ..

وقفنا على جنب تنشوف شو وجعها ،، الدورية فيها الشرطية إللي وقفتني ،، و شرطيتين ثانيات ،، و شرطي كمان ..

الشرطية / الرخص ؟

أسامة / لحظة أشوفلك إياهم ،، لقيت الليسن ،، و ما لقيت ملكية السيارة ،، قلتلها ما بعرف أختي وين حاطة الملكية تبعت السيارة !!

الشرطية / ليش مسرع ؟

أسامة / ما انتبهت ع سرعة الشارع أصلاً ..

الشرطية / هاي فيها مخالفة و حجز رخصة ..

أسامة / و هُو بالله طريقتك هاي إنك تنطي في الشارع قدامي مش مخالفة !!

الشرطية / هذا قانون و بطبقه ،،

أسامة / طيب بالله يعني لو إجاكم واحد سكران ؟

إلا بتدخّل الشرطية إللي بالسيارة و بتحكيلي / هذا واجبنا و نحن بنطبقه ،، و دخل الشرطي إللي معاهم بالسيارة و صار يحكي / مش عاجبك يا عمّو روح إشتكي !!

بلشوا يكتبوا بالمخالفة ،، و بلش الشرطي و الشرطيتين يكثروا حكي ،، و أنا إمي قاعدة حدي ،، يعني ما إلي خلاق أعمل مشكلة هلأ ،، و من باب كسر الشر ،، قلتلهم // معلش استعجلوا شوي لو سمحتوا عندي موعد مع إمي بالمستشفى و ما بدي أتأخر ،،

لازم الشرطة يضيفوا لمستهم ع الموضوع / مش راح يطير المستشفى !!

أخذت المخالفة و شفت عليها حجز الرخصة لمدة أسبوع !! و أنا كلها يومين و مسافر !!

خلصت مشوار المستشفى ،، و رجعت ع البيت الحمدلله ..

ثاني يوم حكيت مع واحد من الشباب تنشوف شو الإجراءات و الترتيب عشان أطلّع رخصتي ،، و قررت إني أروح ع دائرة السير ،، حالي من حال هالناس الحمدلله 🙂

مش متذكر المكان والله وين كان ،، بس كان قريب من إدارة الدفاع المدني أو هيك شغلة ،، و بمر بوسط البلد و أنا رايح لهناك ،، لأن صار معي موقف من المواقف إللي بتحسسني إن ما ظل في أردنيين في البلد .. ضعت في الطريق ،، فوقفت على طرف الشارع أسأل حدا ،، لقيت زلمة كبير في العمر ،، السلام عليكم و رحمة الله و بركاته ،، و عليكم السلام و رحمة الله و بركاته ،، مرحبا عمو ،، عمو وين لو سمحت دائرة السير ؟؟ خيّوو بتضلك ماشي دِغري .. هلا والله بدِغري ،، طلع سوري ،، سوري منك ،، بس إن يعني صاروا يدلوا في البلد أكثر منا الحمدلله ..

الله يحميهم و يعينهم و يصبرهم على إللي فيهم يا رب 🙂

نرجع لموضوعنا ،، وصلنا ع سوق السمك ،، آسف قصدي دائرة السير ،، أصلاً أنا نفسي تلخبط بينهم ،، كيف بدي أشرحلكم المنظر يعني ،، يمكن في ناس ما شافته ،، بس حاولوا تتخيلوا سبع كاونترات ،، و 100 بني آدم ،، بدزوا بعض عشان يحكوا مع الشرطي !! يعني إن من شان الله ما عرفتوا تحطوا ماكينة للدور !! المهم ،، رحت لعند ” المدعي العام ” و قلتله هيك هيك صار معاي ،، قالي طيب و شو المشكلة ؟؟

عوّاد ما مات ،، عوّاد صار مدعي عام .. #مقصودة

قلتله / يعني هاي طريقة توقفوا فيها بني آدم !!

قالي / الشرطية كانت عم بتطبق القانون ..

قلتله / و القانون بقول إنها تنط زي ال*** قدامي ع الشارع هيك ؟

قالي / لو سمحت هاي زميلتنا و موظفة دولة و ما بصير تغلط عليها !!

قلتله / يعني لما تيجي توقفني على سرعة ،، فلازم الشرطية تستوعب شو يعني واحد مسرع !! يعني يمكن مسرع بالعمد ،، يمكن عم بلعب بالتلفون ،، يمكن البريكات خربانة ،، ولا بتحب أفوت بالجزيرة بين الشارعين ؟ و فوق كل هذا ،، إفرض ياخي إجاها واحد سكران و طيّرها هي و الدورية كلها !! و لا أقولك ،، ياخي إذا هي عندها مشكلة في البيت و جاي تنتحر قدامي ،، هذا مش ذنبي أنا ..

فجأة بفوت ع الخط السكرتير تبع المدعي العام و بقولي / إنت شو إللي ودّك إياه يا عمو ؟

بكل برادة جاوبته // الله يبعثلكم واحد سكران يا رب يطيركم كلكم في دورية وحدة ،، يا الله ،، خليكم تعرفوا يومها شو يعني / قانون و عم بنطبقه / ،، قولوا آمين ..

سكت المدعي العام و سكرتيره ،، قلتلهم / شو بطلتوا بدكم تطبقوا القانون ؟

و سحبت حالي و طلعت من عنده ..

رحت على الكاونترات ،، حاولنا نوقف بالدور ،، أصلاً مش عارف هو كان دور ولا دفاشة !! و أخذت الرخصة الحمدلله 🙂

الحمدلله على كل حال ..

أنا عندي تعليق على جملتين لو سمحتوا ..

الجملة الأولى // الإنسان أغلى ما نملك ..

و فعلاً ،، كانت واضحة هاي الشغلة ،، من كثر ما هو غالي ،، بنخليه يرمي نفسه عالشارع قدام السيارات .. واضحة أهمية الإنسان في ” فرض ” القانون بطريقة حضارية جداً و مؤدبة كثير و تنم عن حرص شديد على أرواح المواطنين الغالية ،، بجميع فئاتهم ،، من شرطة و من سوّاقين ..

الجملة الثانية // هدفنا بيئة مرورية آمنة …. حماية للأرواح و الممتلكات 

و هاي مكتوبة آخر سطر في ورقة المخالفة

 ،، تعليقي عليها بسيط كثير :

يا تكون قد كلامك ،، يا يكون كلامك على قدك ..

و في رواية أخرى – بفتح الألف أو ضمها – مش فارقة معي بصراحة !!

كلام ما تطوله ،، أنصحك ما تقوله ..

مش تيجي تكتب شي و إنت أبعد ما يكون عنه !! فهمت يا **** ؟ ولا بتحب أشرحلك أكثر ؟؟

و شكراً عفواً ..

إن بيني و بين الحمار ،، اختلاف في وجهات الأنظار ..

المهم ،، الموضوع إللي صار مع شرطة أبوظبي ،، آخر حادثة بيني و بينهم يعني ،، هي إللي خلتني أكتب هالموضوع ،، يمكن كل واحد كان بحالة شكل ،، بس إن / المكتوب مبيّن من عنوانه / ..

جبنا سيارة جديدة الحمدلله ،، هسه السيارة قالولي ببعثولي إياها ع المرور بكرا عشان التسجيل تبعها ،، حكيت مع واحد من الشباب بداوم بمكان بالشرطة ،، قلتله عندي رقمين ،، و بدي واحد منهم ،، قالي الأول موجود و الثاني لأ ،، قلتله مو مشكلة ،، منيح كثير ،، متى فاضي ؟ قالي بكرا يوم بتسير المرور خبّرني و بنتلاقى هناك إن شاء الله ،، تمام ؟ تمام ..

السيارة ما إجت ثاني يوم 🙂 تأجلت كمان يوم ،، وصلت السيارة ،، و إتصلت على الشب ،، قالي اليوم ما بقدر أطلع أمس كان المفروض نطلع ،، قلتله البركة في المعرض إللي بعث السيارة ..

المهم ،، سحبت حالي ،، و رحت على المرور ،، بدي آخذ رقم عشان الدور ،، لقيت شرطي هناك ،، قلتلي بدي رقم معيّن ،، قالي هذاك مكتب الضابط ،، شوفه و إن شاء الله بيساعدك ..

رحت لعند الضابط ..

أسامة / السلام عليكم و رحمة الله و بركاته ،،

الضابط / و عليكم السلام و رحمة الله و بركاته ،،

أسامة / يعطيك العافية ،،

الضابط / الله يعافيك ،، آمر أخوي كيف أقدر أساعدك ؟

أسامة / بدي رقم للسيارة بس ما يكون ولا رقم نفس الثاني !!

الضابط / بتحصّلهم ع الكاونترات ..

أسامة / بدي الرقم أربعة واحد صفر ثمانية خمسة ..

الضابط / ليش يعني هذا الرقم ؟

أسامة / والله بصراحة تاريخ ميلادي ،، و مو جاي على بالي أحفظ رقم جديد !!

الضابط / بس ؟ بسيطة هاي ،، دقيقة أشوفك شو الفئات الموجودة ،، أوكي كم الرمزي المروري مال ليسنك ؟ (أعطيته إياه) قالي خلص حجزتلك إياه ،، بس تروح ع الكاونتر بتلاقيه محجوز بإسمك ..

أسامة / شكراً كثير ،، و يعطيك العافية ..

الضابط / حياك أخوي !!

رحت ع الكاونتر و سجلت السيارة الحمدلله 🙂

شكراً شرطة أبوظبي 🙂

يعني أنا بدي مشاركتكم بموضوع ،، لو قلت للشرطي في الأردن : بدي رقم اللوحة على عيد ميلادي ،، شو راح يرد عليّ ؟

شاركونا لو سمحتوا تنشوف

و بحب أحكيلكم شغلة كمان صحيح ،، ما حدا ييجي يسوق وطنيات علينا و إنت ما بتحب الأدرن و إنت أصلاً كنت مسرع و غلطان فليش عم بتحمل الحق على الشرطة إنهم نطوا عليك و هالحكي !!

و ما ييجي واحد يقولي هذا تصرف فردي ،، كم واحد منكم في الأردن توقّف بنفس الطريقة ؟!؟ و مش بحاجة أحكيلكم كم مرة توقّفنا على خط عمّان الكرك بسبب السرعة !! و النقاشات الجميلة جداً مع الشرطة 🙂

و لا يطلعلي واحد يتفلسف علي و يقولي فلوس و ما فلوس ،، هي السعودية و فيها فلوس ،، و هي الأردن فيه مخوخ ،، شفنا شو طلع معاهم 🙂

فلو سمحتوا ،، إحكوا حكي زي العالم و الناس ،، و بلاها للعنجهيّات و العنتريّات الفاضية هاي !!

==================

“” برا و بعيد “”

من فيلم 300 Rise Of An Empire”“

 

التعليق :: على يميني ثقة ،، و على شمالي غرور ،، و فوق رأسي ريشة ،، و تحت قدمي كل شخص يمسسني بسوء ..

==================

 شهيتي مفتوحة للكتابة هاي الأيام ،، تحمّلوني شوي لو سمحتوا ،، و ناطركم تشاركوني بتعليق الشرطي ،، مش تحلقولنا 😉

و السلام عليكم و رحمة الله و بركاته ..

يحميكم ربي 🙂

5294 Total Views 1 Views Today