ما هو مبدأك في الحياة ؟؟ يلا ،، بلشوا كذب و خرط علينا تنشوف !! سايقينلي فيها إنكم عندكم مبادئ و قيم و أساسات و عربسات و حركات !! أصلاً أتحدى واحد منكم يكون ماشي على مبدأ !! كلكم ،، يا ماشيين ع الشارع ،، يا ماشيين على بيض !!

بمزح يا جماعة الخير ،، شو مالكم !! لا تتحمسوا كثير من مقدمة التدوينة ،، مش داخل أتخانق معاكم أنا !! أصلاً مليش خلاق إني أعمل مشكلة والله !!

أنا بس جاي أحكيلكم عن كم مبدأ كانوا بعلمونا إياهم ،، و كل ما نكبر ،، بنكتشف قديه إنهم بعلمونا الكذب أكثر و أكثر !!

و أصلاً بعلمونا كيف نكون بلا مبدأ !!

المبدأ الأول / خليك بلا مبدأ ..

هيك أريح ،، عشان ما حدا ييجيي يحكيلك في يوم ليش هيك تغيّرت و إنت ما كنت هيك و و و و و و و و و  من هالحكي الفاضي ،، خلص عاد ،، قال مبدأ قال !! أصلاً المبادئ ما بتطعمي خبز ! ولا حتى شوكولاته !!

أصلاً بيني و بين الحمار ،، اختلاف في وجهات الأنظار !!

المبدأ الثاني / اختصر ..

أنا بحب مبدأ الاختصار ،، خير الكلام ما قل و دل ،، و المشكلة إذا ما حكيت ،، و ما شرحت ،، بقولولك إنت ما شلحت !! بالغلط قصدي ما شرحت !! و إنت ما حكيت كثير ،، و ليش ما وضحّت و فسّرت !!

و المشكلة لما تكون تحكي مع حدا ،، و تقوله / ياخي إختصر / بقوم بزعل !! كإنك سبّيته !! ياخي آه سبيتك ،، و راح أظل أسب عليك كمان !! بس من شان الله اختصر ..

<< الحين بيجي واحد زنخ و بقول / طيب إختصر إنت كلامك في المدونة !

الرد :: هاي مدونتي ،، مش بيت أبوك يا روح أمك !!

لا ،، لا تكذبي ..

ألو

ألو

بابا فين ؟

بابا مش هينا ،، هينا هو ..

أقوله مين ؟

قوله عمو ..

عمو مين ؟

أقوله مين بيكلمه !

طيب بالله عليك بالله عليك بالله عليك ،، أهلك كم مرة حكولك إللي بكذب بروح ع النار ؟؟ و كم مرة حكولك إللي بكذب الله بخنقه !!

طيب ليش يا جماعة لما يتصل حدا و ما بدكم تحكوا معه بتخلونا نحكيله بابا مش هون ولا ماما طلعت و لا جدتي كانت بتحمم و التلفون كان سايلنت و لا انشغلت و ما قدرت أرد !! مهو والله صابني إنفصام يا جماعة الخير !!

يعني بتقولولنا لا نكذب ،، و بتعلمونا الكذب ،، الحين أنا أبر والديني ولا أخلي الله يخنقني !!

شو الحل يا جماعة الخير !!

مهو مش معقول هيك !!

مش حياة هاي !!

طبعاً هذا أبسط مثال للكذب ،، ما في داعي نخش في شغلات على مستوى أثقل ،، مثلاً تحكي لحدا إنك مسافر ع السعودية و إنت بالإمارات !! أو تحكي لحدا رايح عمرة على مكة و إنت قاعد تصيع و تعربد في تايلاند و ماليزيا !!

المبدأ الثالث / ما بعرف ..

لما كنت صغير << على أساس إني كبرت كثير هلأ يعني ،، كان لما حدا يسألني شي ،، أقوله ما بعرف !! و أهلي يقولولي ،، ليش ما بتعرف ؟ شو ناقصك ما تصير تعرف ؟ لمتى بدك تضلك تقول للناس ما بتعرف ؟ جاوب ؟ إذا إنت ما بتعرف مين بدّو يعرف ؟!؟

كبرنا شوي ،، و سمعنا النصائح إللي كانوا يحكولنا إياها ،، بس حدا يسألنا سؤال ،، صرنا نجاوب ،، و نشرح ،، و نسهب الحديث/ بالباء ،، مش باللام / هع هع هع ..

بلشت الناس تزعل !! و تضايق ،، و صاروا يحكولنا ،، قولوا / ما بعرف ،، كلمة ما بعرف بتريّح !!

يعني أحا !! لا هيك عاجبكم و لا هيك عاجبكم !! ياخي إثبتولكم على رأي عشان أعرف شو أسوي أنا !! يعني ياخي يا هيك يا هيك !! صرت بعرف إني ما بعرف 😀 😀

على كل حال ،، قل الحق ،، و لو على نفسك 🙂

ما أروع قول ” ما بعرف ” ،، و ما أسوأ سماعها !!

المبدأ الرابع / وحدة بوحدة ..

هذا المبدأ ،، على غيري تمشّيه ،، مش علي أنا 🙂

المبدأ الخامس / مالنا دخل في الناس ..

هـــــــــــيــــــــــــــه ،، شو بدي أحكيلكم عن هذا المبدأ !! حكي كثير ،، كم مرة أهاليكم قالولكم شوفوا فلان كيف علاماته أحسن منكم ،، شوفي يا بنتي كيف بنت فلانة بتطبخ و بتمسح و بتنظف !! شوفوا كيف عيال فلان بلعبوا ع السكت !! و شوفوا كيف بنات فلانة بشتغلوا كل شي عن أمهم و ما بخلوها تلمس شي بالمطبخ !!

و لما تيجي إنت تحكيلهم / طيب شوف ابن فلان عنده بسكليت ،، ولا بنت فلانة عندها باربي ،، ولا أولاد فلان جابوا بلاي ستيشن ،، و لا بنات فلانة سافروا ع البلد الفلاني ..

بوصلك جواب و بكل برود :: مالنا دخل في الناس !!

يعني للشغلات إللي بتعبجكم ،، شوفوا و شوفوا و شوفوا ،، و للشغلات إللي ما بتعجبكم ،، مالنا دخل في الناس !!

عسى ما عوّركم !! #للعقول_الواطية

المبدأ السادس / إللي بضربك أضربه !!

إللي بضربك أضربه ،، بالله عليكم أهلكم ما كانوا يحكولكم هيك !!

و بيجي المدرّس في المدرسة بحكيلك :: إللي بضربك ،، قوله : الله يسامحك !!

و المشكلة إن المدرّس بحكي لإبنه :: إللي بضربك أضربه !!

كل إللي كان بيجي في بالي يومها ،، هو إني أضربه ،، أو أخلي حدا يضربه عني بما إني ما بحب أتخانق ،، و جسمي ما كان جسم واحد يخانق !! و بعد ما أضربه ،، أٌقوله :: الله يسامحك !!

رضاؤكم هو هدفنا !! هيك بكون طبّقت الشغلتين ،، ضربته ،، و قلتله الله يسامحك !!

كيف بس ؟ 😉 😉

المبدأ السادس / الإعتذار ..

أنا ما بحب حدا يعتذرلي ،، و ما بحب أعتذر لحدا ،، و بنفس الوقت يا حيوان إذا تخانقت مع حدا و ما اعتذرلك ،، بتقوله :: على الأقل كان لازم تعتذر !!

ولك شو بدك يا زلمة !! أبصيرش هاظا الحكي !! يا هيك يا هيك !!

بس مش حيوان و بتتشرّط !! قصدي شحات و مشارط !!

يا ما بدك إياه يعتذر ،، يا بتسد بوزك و تخرس لما يعتذر !!

أما توجّعلنا راسك بمبدأك الزبالة ،، مش حياة هاي !!

مهو يا حبيبي ،، ما يصير تعامل الكل بصدود ،، الوفي لازم تعامِـله بوفا ،، و الردي لا راح جعله ما يعود ،، الجفا ثم الجفا ثم الجفا ..

و مثل ما قال باسم يوسف من يومين / شجاعة الإعتذار مطلوبة ،، بِـغض النظر عن القبول أو الرفض ..

المبدأ السابع / الصراحة وقاحة ..

بالوجه مراية ،، و بالقفى صرماية !!

إذا صاحبك قعد ينصحك و يقولك إللي عم تعمله غلط و و و و و و من هالحكي ،، بتقول في نفسك أصلاً هذا ما بحبّلي الخير و هو حاسدني و غيران منّي و و و و …

و إذا صاحبك قعد يجاملك و يسايرك في تصرفاتك ،، بتقول عنه منافق و مجامل و بدّو مصلحة منّي ..

المهم ،، ريّحت ضميرك ؟!

راح يضل لساني يحكي ،، لك ،، لما يكون في شغلة مش عاجبيتني .. و ما راح يحكي ،، عليك ،، لما يشوف الغلط ..

أصلاً مين هو الصديق الحقيقي ؟ جاوبني ؟

الصديق الحقيقي يا حبيبي هو إللي بظل ينصحك لا تعمل مصيبة ،، لا تعمل مصيبة ،، بس إذا قررت تعملها ،، هو أول واحد بكون معك فيها 😀 😀

فعلاً هذا هو الصديق الحقيقي و الوفي ،، أوفى من الكلب حتى !!

و كما قال الشاعر //

كفّنت بالضلع الأيسر كل زلة رفيق ،، و دفنتها ما تركت إلا شذى طبيها ..

خلك مع الناس لا متكلف ولا دقيق ،، طيّات الأيام مدري وش ورى غيـبَـها ..

المبدأ الثامن / ماسك الدين من ذيله !!

أوصيكم و نفسي بتقوى الله – عز و جل – ،، لما تيجي تحكي لحدا و تنصحه بالقرآن و السنة ،، بقولك ياخي ياخي ياخي ياخي ياخي .. و لما تشد عليه بالنصيحة أكثر ،، بقولك ياخي لما نصير ع زمان الرسول – عليه الصلاة و السلام – ..

طيب ياخي مهو بأشكالك و أمثالك عمرنا ما راح نصير ع زمان الرسول – عليه الصلاة و السلام – ..

و لما ييجي هو يناقشك ،، بصير يقولك ،، قال الله و قال الرسول و الإسلام بحكيلنا و الإسلام علّمنا !!

يا تحفة << ما بدي أقولك يا بجم !! لما كانت الشغلة ضد مصلحتك ،، قلت لما نصير ع زمان الرسول – عليه الصلاة و السلام – .. و لما صارت الشغلة مع مصلحتك ،، صرت تفهم في الدين و تشرحلي و توعظي و تعطيني دروس في الأخلاق !!

يعني شو أسوي ،، نتكلم زي الناس ،، و يفهموا زي الحيوانات !!

المبدأ التاسع / الأخلاق و عدم الضمير ..

هيك حكالنا أستاذ الإنجليزي لما كنا بالثاني ثانوي علمي شعبة 7 بمدرسة ربعي بن عامر << أحقر و أسفل مرحلة في حياتي الدراسية والله !!

قاللنا المدرس مرة / أهم حاجة يابني ،، الأخلاق و عدم الضمير !!

تنذكر و ما تنعاد من أيام ..

بس المبدأ بصراحة كل يوم عم بقتنع فيه أكثر و أكثر 😛 😀

المبدأ العاشر / إثبـــــــت ..

خليك ثابت على مبادئك ،، تنشوف لوين راح توصل !! بس يا ريت تميّز بين / المبدأ و المفهوم / ..

المبادئ لا تعرف التجزئة ،، المفاهيم تتغيّر باستمرار 🙂

و وحدهم من خاضوا حروباً من أجل غايتهم ،، استحقوها بصعوبة ..

و ما حدا حكى شي صح غير أبو بكر سالم // و الزمن ما تغيّر ،، بس ،، أهل الزمن متغيّرين ..

==================

“” برا و بعيد “”

من مسلسل شارلوك هولمز – الموسم الثالث – : 

التعليق ::

إللي يبيك لو دربه الشوك بيجيك ،، ناس اشربت ملح البحر لجل دانة ..
علّموا من خابت الهقوات فيه ،، لا يجي عقب البطا ينبش مكانه ..

==================

لا صرت صح و وقتك أغلاط بأغلاط ،، ليه تتعذب به وتتعب وتشقى؟؟

رح للقمر و افرش على سطحه بساط ،، وخل الحثـــالة لو بها خيـــر ترقــى ..

حدا عنده مبادئ كمان حاب يضيفها ؟

و السلام عليكم و رحمة الله و بركاته ..

5602 Total Views 2 Views Today